إنساندهكى فقر، غناءِ رحمتڭ درجهلرينه بر مقياسدر. إنساندهكى عجز، قدرت و كبرياسنه بر ميزاندر. إنساندهكى تنوّعِ حاجات، أنواعِ نِعَم و إحساناتنه بر نردباندر. اويله ايسه فطرتڭدن غايه عبوديتدر. عبوديت ايسه، درگاهِ عزّتنه قصورلريڭى «اَسْتَغْفِرُ اللّٰه» و «سبحان اللّٰه» ايله إعلان ايتمكدر.
* * *
﴿اِنَّ الْاَبْرَارَ لَفٖى نَعٖيمٍ ۞ وَاِنَّ الْفُجَّارَ لَفٖى جَحٖيمٍ﴾
إعلم أيّها العزيز! هر بر إنسان ايچون حيات سفرنده ايكى يول واردر. بو ايكى يولڭ اوزونلغى قيصهلغى بردر. امّا بريسنده أهلِ شهود و أهلِ وقوفڭ شهادت و تصديقلريله اونده طوقوز منفعت إحتمالى وار. ايكنجى يولده مسئله معكوسهدر. اونده طوقوز ضرر إحتمالى واردر. ايكنجى يول ايله گيدنڭ نه سلاحى وار، نه ذخيرهسى. طبيعى يولده پك چوق قورقولره معروض قالاجغى گبى إحتياجلرينى دفع ايچون چوقلره منّت آلتنده قالير. فقط برنجى يوله سلوك ايدنڭ، هم سلاحى، هم أرزاقى برابردر. پك سربستانه گيدر. برنجى يول قرآن يوليدر، ايكنجى يول ايسه ضلالت يوليدر.
أوت أهلِ شهودڭ، أهلِ وقوفڭ تصديق و شهادتلريله ثابتدر كه، ايمان يُمنيله يوروين أمن و أمان ايچندهدر. و بِالآخره مركزِ حكومته اولاشديغنده اونده طوقوزى بيوك مكافاتلره مظهر اولاجقلردر. فقط، ضلالت ظلماتى ايچنده يوروينلر أثناىِ سفرده قورقودن، آجلقدن هر شيئه و هركسه تذلّل ايتدكدن صوڭره، محلِّ حكومته واصل اولديغنده اونده طوقوزى يا إعدام ويا أبدى حپسه محكوم اولاجقلردر. بناءً عليه عقلى اولان، ضررلى بر شيئى، دنيوى، أدنا بر خفّت ايچون ترجيح ايتمز.