و كذا إنسان حياتِ دنيويه جهتيله بر چكردك اولوب، پك بيوك ثمره و سنبللر ويرمك ايچون كنديسنه توديع ايديلن جهازاتى، بعض مادّهلرى ألده ايتمك ايچون طاووق گبى طوپراقلرى، گوبرهلرى، نجسلرى أشمهيه صرف ايدر، فائدهسز تفسّخ ايدر. و حياتِ معنويه جهتيله أمللرى أبده قدر اوزانان بر شجرۀ باقيهدر.
و كذا إنسان فعل و سعيى جهتيله ضعيف بر حيوان اولوب دائرۀ سعيى پك طاردر. إنفعال، سؤال، دعا جهتيله رحمٰنِ رحيمڭ عزيز بر مسافريدر. دائرهسى خيال قدر گنيشدر.
و كذا إنسانڭ حياتِ حيوانيهدن آلديغى لذّت بر سرچه قوشنڭ لذّتى قدر دگلدر. چونكه إنسانده حزن، كدر، قورقو وار، اونده يوقدر. فقط جهازات، حسّيات، طويغولر، إستعدادلر إعتباريله حيوانلرڭ أڭ أعلاسندن فضله لذّت آلير. إنسانڭ شو وضعيتنه دقّت ايديليرسه آڭلاشيلير كه: بو قدر جهازات، بو حيات ايچون اولمايوب، آنجق بر حياتِ باقيه ايچون كنديسنه ويريلمشدر.
و كذا إنسان سلطنتِ ربوبيتڭ محاسننه ناظر و أسماءِ قدسيهنڭ جلوهلرينه دلاّل و قلمِ قدرتله يازيلان مكتوباتِ إلٰهيهيى مطالعه ايله متفكّر اولديغى جهتله، أشرفِ مخلوقات و خليفۀ أرض اولمشدر.
* * *
﴿يَٓا اَيُّهَا النَّاسُ اَنْتُمُ الْفُقَرَٓاءُ اِلَى اللّٰهِ﴾
إعلم أيّها العزيز! إنساندهكى قصور صوڭسز اولديغى گبى، عجز و فقر إحتياجنه ده نهايت يوقدر. إنسانه توديع ايديلن آجلق ايله نعمتلرڭ لذّتلرى تبارز ايتديگى گبى؛ إنساندهكى قصور، كمالاتِ سبحانيه درجهلرينه بر مرصاددر.