إعلم أيّها العزيز! ظاهر ايله باطن آراسنده مشابهت وارسه ده، حقيقته باقيليرسه آرالرنده بيوك اوزاقلق واردر.
مثلا: عاميانه اولان توحيدِ ظاهرى، هيچ بر شيئى اللّٰهڭ غيريسنه إسناد ايتمهمكدن عبارتدر. بويله بر نفى، سهل و بسيطدر. أهلِ حقيقتڭ حقيقى توحيدلرى ايسه، هر شيئى جنابِ حقّه إسناد ايتمكله برابر هر شيئڭ اوستنده بولونان مُهرينى، سكّهسنى گوروب اوقومقدن عبارتدر. بو، حضورى إثبات، غفلتى نفى ايدر.
إعلم أيّها العزيز! حياتِ دنيويهيه قصدًا و بِالذّات توجّه ايدوب باغلانان كافرڭ، إمهالِ عقابنده و بِالعكس ترقّياتِ مادّيهده موفّقيتندهكى حكمت نهدر؟
أوت او كافر، كندى تركيبيله، صفتيله جنابِ حقجه نوعِ بشره تقدير ايديلن نعمتلرڭ تظاهرينه (شعورى اولمقسزين) خدمت ايدييور. و گوزل مصنوعاتِ إلٰهيهنڭ محاسننى بِلا شعور تنظيم ايدييور. و قوّهدن فعله چيقارتمقله غرابتِ صنعتِ إلٰهيهيه نظرلرى جلب ايدييور. نه فائده كه فرقنده دگلدر. ديمك او كافر، ساعت گبى كندى ياپديغى عملدن خبرى يوق. امّا وقتلرى بيلديرمك گبى نوعِ بشره پك بيوك بر خدمتى واردر. بو سرّه بناءً دنياده مكافاتنى گورور.
إعلم أيّها العزيز! توفيقِ إلٰهى رفيقى اولان آدم، طريقت برزخنه گيرمهدن ظاهردن حقيقته گچهبيلير. أوت قرآندن، حقيقتِ طريقتى (طريقتسز) فيض صورتيله گوردم و بر پارچه آلدم. و كذا مقصودِ بِالذّات اولان علملره علومِ آليهيى اوقومقسزين ايصال ايديجى بر يول بولدم.
سريع السير اولان بو زمانڭ أولادينه، قيصه و سلامت بر طريقى إحسان ايتمك، رحمتِ حاكمهنڭ شانندندر.