موسمنده ياپيلان تخريبات، گلهجك بهار موسملرنده گلن يڭى مسافرلر ايچون ير تدارك ايتمك و بر نوع ترخيص و إذنلردر.
و كذا بو عالمده تصرّف ايدن صانعڭ اويله بر كتابِ مبينى واردر كه، نه كوچك و نه بيوك، او كتابده يازيلوب حفظ ايديلمهمش هيچ بر شى يوقدر. او كتابڭ مادّهلرندن عالمده گورونن يالڭز نظام و ميزان مادّهلرينه باق! أوت گورويورز كه، هر هانگى موظّف بولونان بر شى، وظيفهسندن ترخيص ايديلمكله دائرۀِ وجوددن چيقارسه، فاطرِ حكيم اونڭ چوق صورتلرينى «لوحِ محفوظ»لرده تثبيت ايدر. و تاريخِ حياتنى، تخمنده و نتيجهسنده نقش ايدر و پك چوق غيبى آيينهلرده إبقا ايدر. مثلا: بر شجره، ميوهسيله حامله اولديغى گبى، تخمى ده ميوه ايله حاملهدر. ديمك، آغاجڭ بُنْيهسنده ثمرهسى موجود اولديغى گبى، تخمنده ده ثمره موجوددر. و كذا وجوددن چيقمش پك چوق شيلر، إنسانڭ قوّۀ حافظهسنده موجود قالير.
ايشته بو مثاللردن، حفظ و حفيظيت قانونى نه درجه إحاطهلى اولديغى آڭلاشيلدى. أوت بو موجوداتڭ صاحبى پك بيوك بر إهتمام ايله ملكنده جريان ايدن هر شيئى تحتِ حفظ و محافظهسنه آلمشدر. و حاكميتنڭ محافظهسى ايچون صوڭسز بر دقّتى واردر. و ربوبيتنده تام بر إنتظام و سلطنت واردر كه، أدنا بر حادثهيى، عادى بر خدمتى يازار و يازديرر. ايشته بو درجه إحاطهلى، إهتماملى بر حفظ قانونى، ألبته عالمِ آخرتده ياپيلاجق بر ديوانِ محاسباته باقار. شو محافظه قانونى، بتون أشياده جارى اولديغى گبى، مخلوقاتڭ أڭ أشرفى اولان إنسانه ده شاملدر. چونكه إنسان جنابِ حقّڭ ربوبيتنه عائد شئونات و أحوالنه شاهددر. و مخلوقاتڭ جماعتلرى ايچنده اللّٰهڭ برلگنه دلاّلدر. و موجوداتڭ تسبيحاتنه