بريسى: أنانيت ايله وجوددر. بو ايسه، عدمه گيدر و عدمه قلب اولور.
ايكنجيسى: أنانيتڭ تركيله عدمدر. بو ايسه واجب الوجوده باقار بر وجود قزانير. بناءً عليه وجود ايسترسهڭ، منعدم اول كه وجودى بولاسڭ!..
نكته
(مقدّمهده ذكر ايديلن درت كلمهدن، نيّت حقّندهدر.)
آرقداش! بو نيّت مسئلهسى، بنم قرق سنهلك عمريمڭ بر محصوليدر. أوت نيّت اويله بر خاصيته مالكدر كه، عادتلرى، حركتلرى عبادته چويرن پك عجيب بر إكسير و بر مايهدر.
و كذا نيّت، ئولو و ميّت اولان حالتلرى إحيا ايدن و جانلى، حياتلى عبادتلره چويرن بر روحدر.
و كذا نيّتده اويله بر خاصيت واردر كه؛ سيّئاتى حسناته و حسناتى سيّئاته تحويل ايدر. ديمك نيّت، بر روحدر. او روحڭ روحى ده إخلاصدر. اويله ايسه نجات، خلاص آنجق إخلاص ايلهدر. ايشته بو خاصيته بناءًدر كه؛ آز بر زمانده چوق عمللر حصوله گلير. بوڭا بناءًدر كه؛ آز بر عمرده، جنّت بتون لذائذ و محاسنيله قزانيلير. و نيّت ايله إنسان، دائمى بر شاكر اولور، شكر ثوابنى قزانير.
و كذا دنيادهكى لذّت و نعمتلره ايكى جهتله باقيلير:
بر جهتده، او نعمتلرڭ بر منعم طرفندن ويريلديگى دوشونولور. و نظر، او لذّتدن إنعام ايدنه دونر؛ اونى دوشونور. منعمى دوشونمك لذّتى، نعمتى دوشونمكدن داها لذيذدر.