حجيراتيله (لَا مُتَصَرِّفَ اِلَّا هُوَ) و او حجيراتڭ ذرّاتيله (لَا خَالِقَ اِلَّا هُوَ) و او ذرّاتڭ تارلاسى اولان أثيريله (لَا اِلٰهَ اِلَّا هُوَ) سويلهيهرك؛ بتون أنواعيله، أركانيله، أعضاسيله، أجزاسيله، حجيراتيله، ذرّاتيله، أثيريله (أللى بش لسان ايله) وجوبِ وجود و وحدتنه شهادت و دلالت ايدر. شو لسانلرڭ تفصيلى گلهجكدر. شيمدى إجمال ايله ذكر ايدهجگم. شويله كه:
كائنات تركيبلرندهكى إنتظام، جريانِ أحوالدهكى نظام، صورتلردهكى غرابت، نقشلرندهكى زينت، يوكسك حكمتلر، أشيادهكى مخالفت و مماثلت، جامداتدهكى معاونت، بربرندن اوزاق اولان شيلردهكى تساند، حكمتِ عامّه، عنايتِ تامّه، رحمتِ واسعه، رزقِ عام، حياتلر، تصرّف، تحويل، تغيير، تنظيم، إمكان، حدوث، إحتياج، ضعف، موت، جهل، عبادت، تسبيحات، دعوات و هكذا پك چوق صفتلر لسانلريله خالقِ قديمِ قديرڭ وجوب و وجودينه و أوصافِ كماليهسنه شهادت ايتدكلرى گبى؛ أسماءِ حسنىيى تلاوت ايدهرك، جنابِ حقّه تسبيح و قرآنِ حكيمى تفسير و رسولِ أكرمڭ (عصم) إخباراتنى تصديق ايدييورلر.
گچن لسانلرڭ تفصيلنه گچييورز. شويله كه:
كائناتده گورونن تنظيمات، نظامات، موازنات قبضۀ تصرّفنده بر ميزان و نظام بولونان خالقڭ وجوبِ وجودينه دلالت ايتمكله (اَللّٰهُ لَا اِلٰهَ اِلَّا هُوَ) جملهسنى اوقور.
و كذا كائناتده إنتظام و إطّراد حكمفرمادر. بو ايكى صفت، متصرّفڭ وحدتنه و بر اولديغنه شهادت ايتمكله (اَللّٰهُ لَا اِلٰهَ اِلَّا هُوَ) حقيقتنى إعلان ايدييور.