إعلم أيّها العزيز! دعالر، توحيد و عبادتڭ أسرارينه نمونهدر. توحيد و عبادتده لازم اولديغى گبى، دعا ايدن كيمسه ده، «قلبنده طولاشان آرزو و ايستكلرينى جنابِ حق ايشيتير» دييوب، قادر اولديغنه إعتقاد ايتمليدر. بو إعتقاد، اللّٰهڭ هر شيئى بيلير و هر شيئه قادر اولديغنى إستلزام ايدر.
إعلم أيّها العزيز! شو عالمى ضيالانديران شمسڭ، بر سينگڭ گوزينه تجلّى ايله گيروب ايشيقلانديرمسى ممكندر. و آتشدن بر قيغلجيمڭ گوزينه گيروب تنوير ايتمهسى إمكان خارجيدر. چونكه گوزى پاطلاتير.
كذالك بر ذرّه، شمسِ أزلينڭ تجلّيسنه مظهر اولور. فقط مؤثّرِ حقيقىيه ظرف اولاماز.
إعلم أى مغرور، متكبّر، متمرّد نفس! سن اويله بر ضعفيت، عجز، فقيرلك، مسكينلك گبى حاللره محلسڭ كه، جگريڭه ياپيشان و چوق دفعه بيولتدكدن صوڭره آنجق گورولهبيلن بر ميقروبه مقاومت ايدهمزسڭ؛ سنى يره سرهر، ئولديرر.
إعلم أيّها العزيز! خردله ايله تعبير ايديلن، بر دارى حبّهسى حكمنده اولان قوّۀِ حافظهنڭ إحاطه ايتديگى ميدانده گزينتيلر ياپيليركن او قدر بيوك بر صحرايه إنقلاب ايدر كه، گزمكله بيتمز بر شكل آلير. عجبا او خردلهنڭ ايچندهكى ميدانى بيتيرهمهين، او خردلهنڭ دائرهسنى نه صورتله بيتيرهجكدر؟ عقلڭ نظرنده خردلهنڭ وضعيتى بويله ايسه، عقلڭ گزديگى دائره ناصلدر؟ عقل ده دنيايى يوتار. فسبحان اللّٰه! جنابِ حق خردلهيى، عقل ايچون دنيا و دنيايى ده عقل ايچون بر خردله گبى ياپمشدر.