إعلم أيّها العزيز! گيجهيه بڭزهين گنجلگم زماننده گوزلرم اويومش ايدى، آنجق إختيارلق صباحيله اوياندم، مئالنده اولان:
﴿وَعَيْنٖى قَدْ نَامَتْ بِلَيْلِ شَبٖيبَتٖى § وَلَمْ تَنْتَبِهْ اِلَّا بِصُبْحِ مَشٖيبِ﴾
شعرڭ شمولنه داخلم. چونكه گنجلگمده أڭ يوكسك بر إنتباه شاهقهسنه چيقديغمى صانييوردم. شيمدى آڭلايورم كه، او إنتباه إنتباه دگلمش. آنجق اويقونڭ أڭ درين قويوسنده بولونمقدن عبارت ايمش. بناءً عليه مدنيلرڭ إفتخار ايله دم ووردقلرى تنوّرِ إنتباهلرى، بنم گنجلك زمانمدهكى إنتباه قبيلهسندن اولسه گركدر.
اونلرڭ مثالى، رؤياسنده گويا اويانوب، رؤياسنى خلقه حكايه ايدن نائم مَثليدر. حالبوكه رؤياسنده اونڭ او إنتباهى، اويقونڭ خفيف پردهسندن درين و قالين بر پردهيه إنتقال ايتديگنه إشارتدر. بويله بر نائم ئولو گبيدر. يارى بچق اويقوده بولونان إنسانلرى ناصل ايقاظ ايدهبيلير؟
أى اويقوده ايكن كنديلرينى آييق ظن ايدنلر! امورِ دينيهده مسامحه ويا تشبّهله مدنيلره ياناشمايڭ. چونكه آرامزدهكى دره پك دريندر. طولديروب خطِّ مواصلهيى تأمين ايدهمزسڭز. يا سز ده اونلره إلتحاق ايدرسڭز ويا ضلالته دوشر بوغولورسڭز.
إعلم أيّها العزيز! معصيتڭ ماهيتنده، بِالخاصّه دوام ايدرسه، كفر تخمى واردر. چونكه او معصيته دوام ايدن، الفت پيدا ايدر. صوڭره اوڭا عاشق و مبتلا اولور. تركنه إمكان بولاميهجق درجهيه گلير. صوڭره او معصيتنڭ عقابه موجب اولماديغنى تمنّىيه باشلار. بو حال بويلهجه دوام ايتدكجه، كفر تخمى يشيللنمگه باشلار. النهاية، گرك عقابى، گرك دار العقابى إنكاره سبب اولور.