إعلم أيّها العزيز! اوتوز سنهدن بَرى ايكى طاغوت ايله مجادلهم واردر. برى إنساندهدر، ديگرى عالمدهدر. برى «أنا»در، ديگرى «طبيعت»در. برنجى طاغوتى غيرِ قصدى، گولگهوارى بر آيينه گبى گوردم. فقط او طاغوتى قصدًا ويا بِالذّات نظرِ أهمّيته آلانلر، نمرود و فرعون اولورلر.
ايكنجى طاغوت ايسه، اونى إلٰهى بر صنعت، رحمانى بر صبغة، يعنى نقشلى بر بويا شكلنده گوردم. فقط غفلت نظريله باقيليرسه، طبيعت ظن ايديلير و مادّيونلرجه بر إلٰه اولور. مع هذا او طبيعت ظن ايديلن شى، إلٰهى بر صنعتدر. جنابِ حقّه حمد و شكرلر اولسون كه، قرآنڭ فيضيله، مذكور مجادلهم هر ايكى طاغوتڭ ئولوميله و هر ايكى صنمڭ قيريلمهسيله نتيجهلندى.
أوت نقطه، قطره، ذرّه، شَمَّه، حبّه، حباب رسالهلرمده إثبات و ايضاح ايديلديگى گبى؛ موهوم اولان طبيعت پردهسى پارچهلانهرق آلتنده شريعتِ فطريۀِ إلٰهيه و صنعتِ شعوريۀِ رحمانيه گونش گبى اورتهيه چيقمشدر. و كذا فرعونلغه دلالت ايدن «أنا»دن، صانعِ ذو الجلاله راجع اولان «هو» تبارز ايتدى.
إعلم أيّها العزيز! دنياده سڭا عائد چوق أمرلر واردر. امّا نه ماهيتلرندن و نه عاقبتلرندن خبرڭ اولمايور. برى، جسددر. أوت جسدڭ گنج ايكن لطيف، ظريف و گوزل گُل چيچگنه بڭزرسه ده، إختيارلغنده قورو و اويوشمش قيش چيچگنه بڭزر و تحوّل ايدر.
برى ده، حيات و حيوانيتدر. بونڭ ده صوڭى ئولوم و زوالدر.
برى ده إنسانيتدر. بو ايسه، زوال و بقا آراسنده متردّددر. دائمِ باقينڭ ذكرى ايله محافظهسى لازمدر.