قيمتدار و مهمّ رساله ختامه ايرر. بو قيمتدار رسالهنڭ مندرجاتندن شمس گبى نورلى قمر گبى پارلاق بر مثالى شودر: قرآنِ حكيم كائناتدهكى إنسانه راجع و منفعتلى اولان أشيايى إخطار ايچون ذكر ايدييور. يوقسه قرآنِ حكيمڭ او بياناتى يالڭز او فائدهسنه إنحصار ايتمييور. چونكه إنسان كنديسيله علاقهسى اولان و فائدهسى طوقونان بر ذرّهيه، كنديسى ايله علاقهسى اولميان بر شمسدن زياده أهمّيت ويرر. مثلا:
﴿وَالْقَمَرَ قَدَّرْنَاهُ مَنَازِلَ ۞ لِتَعْلَمُوا عَدَدَ السِّنٖينَ وَالْحِسَابَ﴾
يعنى، قمرڭ كُرۀِ أرض أطرافنده دورينڭ جنابِ حق طرفندن تقدير ايديلمهسنڭ پك چوق حكمتلرندن بر حكمتى ده بشرڭ گونلرينى، آيلرينى، سنهلرينى حساب ايتمهسى، بيلمهسيدر. يوقسه قمرڭ تقديرى، بزجه چوق لزومى بولونان بو فائدهسنه إنحصار ايتمز. خالقِ ذو الجلالڭ أسماسنه آيينهدارلق ايدن بيڭلر حكمتلرى داها وار.
بو قيمتدار رسالهنڭ آخرنده، آلتى قطرهده إعجازِ قرآنى خلاصه ايدن كوچك فقط او نسبتده شموللى بر رساله واردر.
معجزۀ كبرادن بر قاچ قطرهيى تضمّن ايدن اون دردنجى رشحه
پيغمبر عليه الصلاة والسلامڭ رسالتنڭ حقّانيتنه بر دليل ده قرآنِ معجز البياندر... قرآنِ حكيمڭ قرقه ياقين وجهِ إعجازى، لمعات و إشارات الإعجاز تفسيرنده بيان ايديلديگندن اونلره حواله ايدهرك برنجى قطره نهايت بولور.
ايكنجى قطرهده: يگرمى بشنجى سوزده ذكر ايديلن «قرآن نهدر؟» دييه اولان تعريفڭ قيصه بر عربجهسى واردر.
اوچنجى قطره: آلتى نقطهدر. اوچنجى نقطهسنده: ناصلكه إنسان مختلف حاجاتِ جسمانيهيه مختلف وقتلرده محتاجدر... مثلا: هوايه هر آن، حرارته،