سرعتِ سنويهسنه ياقين بر سرعت ايله و حشمتِ ربوبيتيله، بر إحتماله گوره شمس الشّموس طرفنه بر حركت ويرمش و دونانما ألكتريق لامبالرى گبى ييلديزلرى، سلطنتِ ربوبيتنه نورانى شاهدلر ياپمش؛ اونڭله سلطنتِ ربوبيتنى و عظمتِ قدرتنى گوسترمش بر ذاتِ ذو الجلالڭ كمالِ حكمتندن و عظمتِ قدرتندن و سلطنتِ ربوبيتندن اوزاق دگلدر كه، جهنّمِ كبرايى ألكتريق لامبالرينڭ فابريقهسنڭ قزغانى حكمنه گتيروب آخرته باقان سمانڭ ييلديزلرينى اونڭله إشعال ايتسين؛ حرارت و قوّت ويرسين. يعنى، عالمِ نور اولان جنّتدن ييلديزلره نور ويروب، جهنّمدن نار و حرارت گوندرسين. عين حالده او جهنّمڭ بر قسمنى أهلِ عذابه مسكن و محبس ياپسين. هم بر فاطرِ حكيم كه؛ طاغ گبى قوجه بر آغاجى، طيرناق گبى بر چكردكده صاقلار. ألبته او ذاتِ ذو الجلالڭ قدرت و حكمتندن اوزاق دگلدر كه؛ كُرۀِ أرضڭ قلبندهكى جهنّمِ صُغرا چكردگنده جهنّمِ كبرايى صاقلاسين.
الحاصل:
جنّت و جهنّم، شجرۀِ خلقتدن أبد طرفنه اوزانوب أگيلهرك گيدن بر دالڭ ايكى ميوهسيدر. ميوهنڭ يرى ايسه، دالڭ منتهاسندهدر. هم شو سلسلۀِ كائناتڭ ايكى نتيجهسيدر. نتيجهلرڭ محللرى، سلسلهنڭ ايكى طرفندهدر. سفليسى، ثقيلى آشاغى طرفنده؛ نورانيسى، علويسى يوقارى طرفندهدر. هم شو سَيْلِ شئوناتڭ و محصولاتِ معنويۀِ أرضيهنڭ ايكى مخزنيدر. مخزنڭ مكانى ايسه، محصولاتڭ نوعنه گوره، فناسى آلتنده، اييسى اوستندهدر. هم أبده قارشى جريان ايدن و طالغهلانان موجوداتِ سيّالهنڭ ايكى حوضيدر. حوضڭ يرى ايسه، سَيْلڭ طورديغى و تجمّع ايتديگى يردهدر. يعنى خبيثاتى و مزخرفاتى أسفلده، طيّباتى و صافياتى أعلادهدر. هم لطف و قهرڭ، رحمت و عظمتڭ ايكى تجلّيگاهيدر. تجلّيگاهڭ يرى ايسه، هر يرده اولابيلير. رحمٰنِ ذو الجمال و قهّارِ ذو الجلال نرهده ايسترسه تجلّيگاهنى آچار.