سينكلرڭ، قيشڭ شدائدى ايچنده حياتلرى نه قدر زحمت و ئولوملرى نه قدر رحمت اولديغى آڭلاشيلير.
دردنجيسى: نوم ناصلكه بر راحت، بر رحمت، بر إستراحتدر؛ خصوصًا مصيبتزدهلر، يارهليلر، خستهلر ايچون.. اويله ده: نومڭ بيوك قارداشى اولان موت دخى، مصيبتزدهلره و إنتحاره سَوق ايدن بلالرله مبتلا اولانلر ايچون عينِ نعمت و رحمتدر. امّا أهلِ ضلالت ايچون متعدّد سوزلرده قطعى إثبات ايديلديگى گبى؛ موت دخى حيات گبى نقمت ايچنده نقمت، عذاب ايچنده عذابدر. او، بحثدن خارجدر.
اوچنجى سؤال:
جهنّم نرهدهدر؟
الجواب:
﴿قُلْ اِنَّمَا الْعِلْمُ عِنْدَ اللّٰهِ ۞ لَا يَعْلَمُ الْغَيْبَ اِلَّا اللّٰهُ﴾
جهنّمڭ يرى، بعض رواياتله «تحت الأرض» دينيلمشدر. باشقه يرلرده بيان ايتديگمز گبى؛ كُرۀِ أرض، حركتِ سنويهسيله ايلريده مجمعِ حشر اولاجق بر ميدانڭ أطرافنده بر دائره چيزييور. جهنّم ايسه، أرضڭ او مدارِ سنويسى آلتندهدر ديمكدر. گورونمهمهلرى و حسّ ايديلمهمهلرى، پردهلى و نورسز آتش اولديغى ايچوندر. كُرۀِ أرضڭ سياحت ايتديگى مسافۀِ عظيمهده پك چوق مخلوقات وار كه، نورسز اولدقلرى ايچون گورونمزلر. قمر، نورى چكيلدكجه وجودينى غائب ايتديگى گبى، نورسز چوق كرهلر، مخلوقلر گوزيمزڭ اوڭنده اولوب گورهمييورز.
جهنّم ايكيدر: برى صُغرا، برى كبرادر. ايلريده صُغرا، كبرايه إنقلاب ايدهجگى و چكردگى حكمنده اولديغى گبى، ايلريده اوندن بر منزل اولور. جهنّمِ صُغرا يرڭ آلتنده، يعنى مركزندهدر. كرهنڭ آلتى، مركزيدر. علمِ طبقاتُ الأرضجه معلومدر كه: أكثريا هر اوتوز اوچ متره حفرياتده، بر درجۀِ حرارت تزايد ايدر.