ايتدى كه: «يتمش سنهدر يووارلانوب، بو دقيقهده جهنّمڭ ديبنه دوشن بر طاشڭ گورولتيسيدر.» بر قاچ دقيقه صوڭره بريسى گلدى، ديدى: «يتمش ياشندهكى مشهور منافق ئولدى.» رسولِ أكرم عليه الصلاة والسلامڭ غايت بليغ تمثيلينڭ حقيقتنى إعلان ايتدى.
سنڭ سؤالڭ جوابنه شيمديلك «اوچ وجه» سويلهنهجك.
برنجيسى:
حَمَلۀِ عرش و سماوات دينيلن ملائكهنڭ برينڭ إسمى «نَسِرْ» و ديگرينڭ إسمى «ثَوْر» اولارق درت ملائكهيى، جنابِ حق عرش و سماواته سلطنتِ ربوبيتنه نظارت ايتمك ايچون تعيين ايتديگى گبى، سماواتڭ بر كوچك قارداشى و سيّارهلرڭ بر آرقداشى اولان كُرۀِ أرضه دخى ايكى مَلك، ناظر و حَمَله اولارق تعيين ايتمشدر. او مَلكلرڭ برينڭ إسمى «ثَوْر» و ديگرينڭ إسمى «حوت»در. و او نامى ويرمهسنڭ سرّى شودر كه: أرض ايكى قسمدر: برى، صو؛ برى طوپراق. صو قسمنى شنلنديرن باليقدر. طوپراق قسمنى شنلنديرن، إنسانلرڭ مدارِ حياتى اولان زراعت، اوكوز ايلهدر و اوكوزڭ اوموزندهدر. كُرۀِ أرضه مؤكّل ايكى مَلك، هم قوماندان، هم ناظر اولدقلرندن، ألبته باليق طائفهسنه و اوكوز نوعنه بر جهتِ مناسبتلرى بولونمق لازمدر. بلكه، (وَالْعِلْمُ عِنْدَ اللهِ) او ايكى مَلگڭ عالمِ ملكوت و عالمِ مثالده ثَوْر و حوت صورتنده تمثّللرى وار. (حاشيه) ايشته بو مناسبته و او نظارته إشارةً و كُرۀِ أرضڭ او ايكى مهمّ نوع
___
(حاشيه): أوت كُرۀِ أرض، بحرِ محيطِ هوائيده بر سفينۀِ ربّانيه و نصِّ حديثله آخرتڭ بر مزرعهسى، يعنى فدانلق تارلاسى اولديغندن، او جامد و شعورسز بيوك گمىيى او دڭزده أمرِ إلٰهى ايله، إنتظام ايله، حكمت ايله يوزديرن، قپودانلق ايدن ملائكهيه «حوت» نامى و او تارلايه إذنِ إلٰهى ايله نظارت ايدن ملائكهيه «ثَوْر» إسمى نه قدر ياقيشديغى ظاهردر.