هم عبد الرحمان، هم لطفى، هم حافظ على معناسنى طاشييان بيوك روحلى كوچك على، رسالۀِ النور خدمتنى دنياده هر شيئه ترجيحًا حياتنڭ أڭ بيوك مقصدى ياپمسى و سببِ إختلافه قارشى قوّتلى مقاومتى بولونديغنى بو درت مكتوبڭز بڭا بيلديردى. عين سيستمده، مسئلهده علاقهدار قهرمان طاهرى و قهرمان رشدينڭ دخى عين حقيقتده و عين أخلاقده بولوندقلرينى هيچ شبهه ايتمييورز. بو آلتى ركنڭ، بو موقّت صارصينتيدن، حقيقى بر تساندله بربرينه أل أله، اوموز اوموزه، باش باشه ويرمهسى، آلتى يوز بلكه آلتى بيڭ قيمتِ معنويهيى آلييور.. دييه، جنابِ حقّه رسالۀِ النور حسابنه حدسز شكر ايدييورز و سزى ده تبريك ايدييورز. إسپارطه ايچندهكى خاص و خالص قارداشلريمزدن، بو آخر مكتوبلرده؛ محمد زهدى، إسپارطه حافظ عليسندن خبر آلاماديغمدن مراق ايتدم. راحتسز دگللر مى؟
صاندقلى طرفنده، كمالِ شوق ايله و جدّيتله فعاليتده بولونان حسن عاطف قارداشمزڭ بر مكتوبندن آڭلادم كه؛ اوراده پرده آلتنده فعاليتنى طورديرمق ايچون، بعض خواجهلر، بر قسم طريقته منسوب آدملرى واسطه ايدوب فتور ويرييورلر. حالبوكه مسلگمز، مثبت حركت ايتمكدر. دگل مبارزه، بلكه باشقهلرى دوشونمگه ده مسلگمز مساعده ايتمييور. هم مشتريلرى ده آرامغه مجبور دگلز، مشتريلر يالوارملى.
او قارداشمز، حقيقةً خالص و تام صادق. قلمى گبى، قلبى، روحى ده گوزل. فقط بردن هر شيئى مكمّل ايستر، اونڭ ايچون برآز صيقنتى چكر. ممكن اولديغى قدر هم إحتياط ايتسين، هم ده مبتدع خواجهلره مبارزه قپوسنى آچماسين. إن شاء اللّٰه جنابِ حق اونى موفّق ايدر. او منطقهده كندى گبى خالص ركنلرى بولور، بلكه ده بولمش. بز باشده اونى و اونڭ أطرافندهكى رسالۀِ النور