شاكردلرينى تبريك ايدييورز. اونلرڭ آز خدمتلرينه چوق نظريله باقييورز. بن بورادن اونلرله مخابره و مشاوره ايدهمديگمدن؛ سزلر بنم بدلمه، او قارداشلريمزه هم سلاممزى، هم معنوى قزانجلريمزه خاصلر دائرهسنده، عاطفڭ صادق رفقاسى عنوانى آلتنده داخلدرلر. هر صباح يانمزده معنًا بولونويورلر.
* * *
عزيز، صدّيق، متيقّظ، صميمى، متّحد، مبارك قارداشلرم!
بن ده سزى تبريك ايدييورم كه، شيطانِ جنّى و إنسينڭ دسيسهلرينى عقيم بيراقدڭز. جنابِ حق سزى بو خدمتِ نوريهده دائما موفّق أيلهسين، آمين. و سزدن أبدًا راضى اولسون، آمين.
أسكيده بر زمان بارلاده، بتون طريقتلرڭ شجرۀِ كلّيهسنى تنظيم و إستنساخ ايتمك ايچون حافظ على ايله خسرو او وقت او ايشده بولونديلر، چاليشديلر. تا او وقتده بو ايكى ذات، ايلريده رسالۀِ النوره أهمّيتلى خدمتده بولونهجقلرينى و باشده ايكى گوز گبى، ايكى باقار بر گورور، دييه قوّتلى بر تمنّى ايله اُميد ايتمشدم. جنابِ حقّه حدسز شكر اولسون كه؛ او اميدم، او زماندن بَرى تحقّق ايتدى و ايدييور و شيمدى تام اولدى.
قارداشلرم! سزده وقوع بولان كوچوجك قصورلرى چوق إعظام ايتمهيڭز. يالڭز بن دگل، بلكه ظن ايدييورم كه حقيقته مطّلع اولان هركس تصديق ايدر كه؛ إسپارطه و حواليسندهكى رسالۀِ النور شاكردلرنده فوق العاده بر صداقت و ثبات و اخوّت و إخلاص و قهرمانلق وار كه؛ بو عجيب زمانده بيڭلر أسبابِ فساد و إفساد ايچنده وحدتلرينى و إتّفاقلرينى و خدمتده جدّيتلرينى محافظه ايدييورلر.