عزيز، صدّيق قارداشلرم!
سزڭ مكتوبلريڭزدن او قدر مسرور اولدم كه، تعريف ايدهمم. خصوصًا خسروڭ چوق قيمتدار ايكى مكتوبنده، حاجى حافظڭ كوينده رسالۀِ النورڭ پك فوق العاده بر صورتده توسّعى، او ايكى مكتوبى نسخه گبى و بر حجّتِ قاطعه گبى صاقلايوب، بو حواليدهكى طلبهلره بر تازيانۀِ تشويق اولارق گوستريلييور.
رسالۀِ النور، قرآنڭ بر معجزۀِ معنويسى اولديغى گبى؛ خسروڭ قلمى ده، رسالۀِ النورڭ پك قوّتلى بر كرامتى اولديغنى بوراجه هر گون تصديق ايدييورز. خسروڭ مكتوبنه قارشى اوزون مكتوب يازمق ايستهيوردق، آرزومزه موفّق اولامادق.
مباركلر قهرمانلرندن كوچك علينڭ مكتوبى ده بڭا بيوك بر اُميد ويردى. مرحوم عبد الرحمانڭ الحقّ تام بر خَلَفى اولان قيمتدار و مبارك بيوك قارداشى اولان مصطفى خلوصينڭ، حافظ أحمد إسمنده مبارك بر مخدومى، پدر و عموجهلرى سيستمنده رسالۀِ النوره خدمت ايتمهسى، يڭيدن عبد الرحمان دنيايه گلمسى قدر بنى مفرّح ايتدى.
آراس آتابكده، أسكيده لطفى، ذكائى گبى ايكى قيمتدار شاكردلرڭ يرلرينى بوش بيراقميان، آراس قهرمانلرى اولان طاهر و عبد اللّٰه چاوشڭ رسالۀِ النوره خدمتلرى، آراس حقّنده أنديشهلريمى تمامًا إزاله ايتدى.
إسماعيل اوغلى حسينڭ خستهلغى بنى متأثّر ايتدى. إن شاء اللّٰه تام بر لطفى اولاجق، چوق ده خدمت ايدهجك. سزلرڭ بورايه گلن مكتوبلريڭز، قسمًا تنسيقله لاحقهيه درج ايديلييور. سزه بو دفعه محرم سرِّ اِنَّا اَعْطَيْنَاده إستخراجِ غيبيدهكى مجمل حقيقته دائر بردن قلبه إخطار ايديلن بر فقره ايله تستّر رسالهسنه