ثانيًا: سزڭ بو دفعه نورلى هديهلريڭزڭ هر حرفنه مقابل، جنابِ أرحم الراحمين دفترِ أعمالڭزه بيڭ حسنه يازسين و عاصمڭ روحنه بيڭ رحمت ويرسين، آمين.
ثالثًا: قرآنِ معجز البيانڭ و رسالۀِ النورڭ خزينهلرينڭ كرامتلى و يالديزلى بر آناختارى اولان قلمِ خسروى، الحقّ معجزاتِ أحمديهنڭ (عصم) گيزلى گوزللگنى هر گوزه غايت پارلاق و گوزل گوسترييور. جنابِ حق بو قلمى، بو خدمتده موفّق و دائم أيلهسين، آمين.
مبارك هيئتنڭ بيوك بر قهرمانى بيوك علينڭ سيستمنده كوچك علينڭ معجزاتِ قرآنيهسى، معجزاتِ أحمديهنڭ تام مطابق بر باقى پيرلانته طرزنده موقع آلدى. أرحم الراحمين هر حرفنه مقابل يازانه اون ثواب إحسان أيلهسين، آمين.
محمد طاهرى، كوچك لطفينڭ خير الخَلَفى و آتابكڭ قهرمانى، بو حوالىيه نورلى و گوزل هديهلرى چوق قيمتداردر. رحمٰن الرحيم خزينۀِ رحمتندن اوڭا و پدرينه هر حرفنه و هر كلمهيه مقابل رحمت ايتسين، آمين.
آيدينلى حسن علوينڭ قوّتلى قلمى، إن شاء اللّٰه مرحوم عاصمڭ نقصان بيراقديغى وظيفۀِ نوريهيى تكميل ايدهجك و او گوزل قلمله عاصمڭ و لطفينڭ روحلرينى شاد ايدهجك. اونڭ كوچك هديهسى، ايلريدهكى قيمتدار خدمتلرينى إحساس ايدهرك بيوك بر موقع آلدى. اللّٰه اوندن راضى اولسون، آمين.
رسالۀِ النورڭ أركانِ مهمّهسندن و رسائل ايچنده سؤاللريله أهمّيتلى بر موقع طوتان و اونڭله برابر معنًا يشايان قارداشمز رأفت بگڭ مكتوبيله و گل فابريقهسنڭ گُلِ محمّدى (عصم) باغچهسنى يتيشديرن خسروڭ مكتوبنه آيرى برر مكتوبله جواب يازمق ايستردم؛ فقط شيمديلك وقت مساعده ايتمدى.
* * *