و پدر و والدهلرينى بنم طرفمدن برر برر، هم بو خدمتلرينى هم بايراملرينى تبريك ايديڭز.
هم إسپارطه حقّنده بنم بيوك اميديمى فعلاً إثبات ايتدكلرى ايچون، بڭا بيوك بر تسلّى ويردكلرى ايچون، ئولونجهيه قدر منّتدارلغمى اونلره و مباركلر هيئتنه و مدرسۀِ نوريه و نور و گل فابريقهسى صاحبلرينه تبليغ ايديڭز.
نماز تسبيحاتنڭ سرّينه گوره: ناصلكه نمازدن صوڭره تسبيح و ذكر و تهليل ايله بر ختمۀِ معظّمۀِ محمّديه (عصم) و ذكر و تسبيح ايدن و روىِ زمين قدر گنيش بر حلقۀِ تحميداتِ أحمديه (عصم) دائرهسنه تصوّرًا و نيةً گيرمك مدارِ فيوضات اولديغى گبى؛ بن و بز ده، رسالۀِ النورڭ گنيش دائرۀِ درسنده و حلقۀِ أنوارنده درس آلان و دعا ايدن و چاليشان بيڭلر معصوم لسانلرڭ و مبارك إختيارلرڭ دعالرينه و أعمالِ صالحهلرينه حصّهدار اولمق و دعالرينه آمين ديمك حكمنده اولارق، اونلرله طىِ مكان ايدهرك، خيالاً اوموز اوموزه، ديز ديزه بولونمق خياليله و نيتيله و تصوّريله كنديمزى فوق الحدّ بختيار بيليورز. خصوصًا آخر عمرمده بويله قيمتدار، معصوم، معنوى أولادلرى و يوزر كوچك عبد الرحمانلرى بولمق، بنم ايچون دنياده بر جنّت حياتى حكمنه گچييور.
گچن رمضانِ شريفده، خستهلغم مناسبتيله، هر بر قارداشم بنم حسابمله برر ساعت چاليشمالرينڭ پك بيوك نتيجهسنى عين اليقين و حقّ اليقين گورديگمدن؛ بويله دعالرى ردّ ايديلمز معصوملرڭ و مبارك إختيارلرڭ و بختيار استادلرينڭ، بنم حسابمه آرا صيره لسانًا و قلبًا دعالرى و چاليشمالرى، قلملريله يارديملرى، بنم رسالۀِ النوره خدمتمڭ اُخروى بر نتيجۀِ باقيهسنى دنياده دخى بڭا گوستردى.
﴿اَلْحَمْدُ لِلّٰهِ هٰذَا مِنْ فَضْلِ رَبّٖى﴾
* * *