(چوق أهمّيتليدر)
عزيز، صدّيق قارداشلرم!
بوگونلرده غايت صادق و دقّتلى بر قارداشمزڭ إحتياطسزلغندن كوچك بر توقات يمهسى مناسبتيله، هم بو درت آى مدّتجه، بيڭلر آدم قدر علاقهدار اولديغم حالده؛ أحوالِ عالمدن، سياست و حربدن قطعيًا بر خبر آلمايوب و ايستهمهيوب و مراق ايتمز بر طرزده بولونمامدن، فيضى و أمين گبى خاص قارداشلريمڭ حيرتلرى و إستفسارلرى سببيله بر حقيقتدن، چوق دفعه بيان ايتديگم گبى ينه بر پارچه اوندن بحث ايتمك لزوم اولدى. شويله كه:
حقائقِ ايمانيه، هر شيدن أوّل بو زمانده أڭ برنجى مقصد اولمق و سائر شيلر ايكنجى، اوچنجى، دردنجى درجهده قالمق و رسالۀِ النورله اونلره خدمت ايتمك أڭ برنجى وظيفه و مدارِ مراق و مقصودِ بِالذّات اولمق لازم ايكن؛ شيمديكى حالِ عالم حياتِ دنيويهيى خصوصًا حياتِ إجتماعيهيى و بِالخاصّه حياتِ سياسيهيى و بِالخاصّه مدنيتڭ سفاهت و ضلالتنه جزا اولارق گلن غضبِ إلٰهينڭ بر جلوهسى اولان حربِ عمومينڭ طرفگيرانه، طمارلرى و أعصابلرى تهييج ايدوب باطنِ قلبه قدر، حتّى حقائقِ ايمانيهنڭ ألماسلرى درجهسنه او ضررلى، فانى آرزولرى يرلشديرهجك درجهسنده بو مشئوم عصر اويله شرينغه ايتمش و ايدييور و اويله آشيلامش و آشيلييور كه؛ رسالۀِ النور دائرهسى خارجنده بولونان علمالر، بلكه ده وليلر؛ او سياسى و إجتماعى حياتڭ رابطهلرى سببيله، حقائقِ ايمانيهنڭ حكمنى ايكنجى، اوچنجى درجهده بيراقوب، او جريانلرڭ حكمنه تابع اولارق همفكرى اولان منافقلرى سَور، كندينه مخالف اولان أهلِ حقيقتى بلكه أهلِ ولايتى تنقيد و عداوت ايدر، حتّى حسّياتِ دينيهيى او جريانلره تابع ياپارلر.