(رسالۀِ النور شاكردلرندن حافظ توفيق، محمد فيضى، أمين، حلمى، كاملڭ بر فقرهسيدر)
غوثِ أعظمڭ استاديمز حقّنده (فَاِنَّكَ مَحْرُوسٌ بِعَيْنِ الْعِنَايَةِ) فقرهسيله، عنايت و تسهيله مظهر اولديغنه؛ و توافق، رسالۀِ النورڭ كرامتنڭ بر معدنى بولونديغنه پك چوق أمارهلردن، بو بر ايكى گون ظرفنده، كوچك و لطيف، فقط قطعى قناعت ويرن جزئى حادثهلرڭ توافقنده گوزيمزله گورديگمز عنايتِ ربّانيهنڭ نمونهلرندن بش آلتيسنى بيان ايدييورز كه، اونلر بو ايكى گون ظرفنده برابر وقوع بولمش:
برنجيسى: دون استاديمزه، رسالۀِ النوره عائد اوچ خدمت لازم گلدى. كيمسه ده يوق. بز ده اوزاقدهيز. نردباندن اينوب، بر چوجغى بولوب، بزلره گوندرمك نيتيله قپويى آچدى. رسالۀِ النورڭ او خدمتنى گورهجك فوق العاده بر طرزده، دقيقهسيله اوچ شاكردى قپويه گلديلر.
ايكنجيسى: ايكى سنهدن زياده رسالۀِ النورڭ مهم پارچهلرى، رسالۀِ النورڭ بركاتيله خانهسى يانغيندن قورتولان حافظ أحمد كندينه يازديروب، باشقه بر قضا و ناحيهده بولونان بر ايكى ذات اونلرى إستنساخ ايچون آلديلر. ايكى سنهدن بَرى أللرندن قاچيروب، محجوبيتلرندن خبر ويرمدكلرى ايچون هم بز، هم حافظ أحمد مراق، هم حدّت ايدييوردق. او كتابلر بوگون گلديگى عين وقت، دون عين ساعتده؛ استاديمزه، بش سنهدن بَرى هر بر قاچ گون ظرفنده قولايلق ايچون بر پارچه يمك پيشيرمك ايله خاطرينى صورييوردى. ايكى سنهدن بَرى او عادتى ترك ايتمشدى. هم قومشولقدن ده باشقه يره نقل ايتمهسيله، ايكى سنهدر او عادت