عالمِ إسلامڭ إنتباه و توجّهِ عموميسى، او مبارك شهورڭ گيتمهسيله توقّف ايتمهسندن فرصت بولوب هوايى بوزان ضلالتلرڭ تأثيرلرى زماننده و بِالخاصّه قيش تضييقاتى آلتنده، بر درجه حياتِ دنيويه و هوساتِ نفسانيهنڭ تسلّطلرينڭ نقصانيتندن، أهلِ إسلام و أهلِ ايمانده، حياتِ اُخرويهيه چاليشمق إشتياقى، بهارڭ گلمسيله حياتِ دنيويهنڭ و هوساتِ نفسانيهنڭ إنكشافيله او إشتياقِ اُخرويهيى گيزلمهسى آننده ألبته بويله قدسى أورادلرده ذوق، شوق يرنده أسنهمك و فتور گلير. فقط مادام (خَيْرُ الْاُمُورِ اَحْمَزُهَا) سرّيله؛ مشقّتلى، كلفتلى، ذوقسز، صيقنتيلى أعمالِ صالحه و امورِ خيريه داها قيمتلى، داها ثوابليدر؛ او صيقينتيده، او مشقّتدهكى زياده ثوابى و مقبوليتى دوشونوب، صبر ايچنده مسرورانه شكر ايتمك گركدر.
بشنجيسى: رسالۀِ النورڭ بر طلبهسى، رسالۀِ النوره چاليشهمديغنڭ بر سببى، دردِ معيشتڭ زيادهلشمهسى اولديغنى سويلهدى. بز ده اوڭا ديدك: رسالۀِ النوره چاليشماديغڭ ايچون دردِ معيشت سڭا شدّتلندى. چونكه بو حواليده هر طلبه إعتراف ايدييور و بن ده ايدييورم كه: رسالۀِ النوره چاليشدقجه، ياشامقده قولايلق و قلبده فرحلق و معيشتده سهولت گورويورز.
آلتنجيسى: بو بيچاره سعيددر. هركسڭ آرزو ايتديگى و ايستديگى و فرحله قبول ايتديگى، شخصنه قارشى حرمت و محبّت و صحبت، (فقط رسالۀِ النوره تعلّق ايدن نقطهلر خارجنده) بڭا آغير گلييور، بنى صيقييور، متأثّر ايدييور. تخمين ايدييورم كه، رسالۀِ النورڭ يوكسك خاصيتلرى و شاكردلرينڭ شخصِ معنويسنڭ پك بيوك مزيتلرى، شخصم گبى مسلكِ عجزده فضله ايلرى گيدن بر عاجز و بيچارهنڭ ضعيف اوموزينه او طاغ گبى معنالر يوكلنسه آلتنده أزيلير، صيقيلير دييه آڭلادم.