بو زمانده غايت قوّتلى و حقيقتلى ميليونلر فداكارلرى بولونان مشربلر، مسلكلر بو دهشتلى ضلالت هجومنه قارشى ظاهرًا مغلوبيته دوشدكلرى حالده؛ بنم گبى ياريم اُمّى و كيمسهسز، متماديًا ترصّد آلتنده، قرهقول قارشيسنده و مدهش، متعدّد جهتلرله عليهمده پروپاغندهلر و هركسى بندن تنفير ايتمك وضعيتنده بولونان بر آدم، ألبته ضلالته قارشى غالبانه مقاومت ايدن و ميليونلر أفرادى بولونان مسلكلردن داها ايلرى، داها قوّتلى طايانان رسالۀِ النوره صاحب دگلدر. او أثر اونڭ هنرى اولاماز و اونڭله إفتخار ايدهمز. بلكه طوغريدن طوغرىيه قرآنِ حكيمڭ بو زمانده بر معجزۀِ معنويهسى رحمتِ إلٰهيه طرفندن إحسان ايديلمشدر. او آدم، بيڭلر آرقداشيله برابر او هديۀِ قرآنيهيه أل آتمشلر. هر ناصلسه برنجى ترجمانلق وظيفهسى اوڭا دوشمش. اونڭ فكرى و علمى و ذكاسنڭ أثرى اولمديغنه دليل، رسالۀِ النورڭ اويله پارچهلرى وار كه؛ بعض آلتى ساعتده، بعض ايكى ساعتده، بعض بر ساعتده، بعض اون دقيقهده يازيلان رسالهلر وار. بن يمين ايله تأمين ايدييورم كه، أسكى سعيدڭ قوّۀِ حافظهسى برابر اولمق شرطيله او اون دقيقهلق ايشى اون ساعتده فكرمله ياپامييورم. او بر ساعتلك رسالهيى، ايكى گون إستعدادمله، ذهنمله ياپامييورم و او آلتى ساعتلك رساله اولان اوتوزنجى سوزى نه بن، نه ده أڭ مدقّق ديندار فيلسوفلر آلتى گونده او تحقيقاتى ياپاماز و هكذا...
ديمك بز مفلس اولديغمز حالده، غايت زنگين بر مجوهرات دكّاننڭ دلاّلى و برر خدمتجيسى اولمشز. جنابِ حق فضل و كرميله، بو خدمتِ قدسيهده خالصانه، مخلصانه بزى و عموم رسالۀِ النور شاكردلرينى دائم موفّق أيلهسين، آمين.
سعيد النورسى
* * *