(مِنْ قَبْلِكَ) : قرآنده هيچ بر كلمه بولونمييور كه، موقعيله مناسبتدار اولماسين. وياخود موقعنڭ باشقه بر كلمهيه مناسبتى داها چوق اولسون. أوت قرآنڭ هر هانگى بر يرنده بولونان بر كلمه، او موقعڭ باشنده بر تاجِ زرّين گبى گورونور. و آرالرندهكى مناسبتلردن طولايى، آرالرنده گچمسزلك يرى يوقدر. أزجمله: (مِنْ قَبْلِكَ) كلمهسنه باق! بو آيتڭ هر طرفندن اوچوب بو كلمهنڭ باشنه قونان لطائفى گور. زيرا بو آيت، نبوّت حقّندهدر. نبوّت مسئلهسنده «بش مقصد» واردر. بو مقصدلر، بش نكته و لطائفدن إنعكاس ايتمشدر. بو بش لطائف، (مِنْ قَبْلِكَ) نڭ صدفندهدر. مقصدلر ايسه:
١ - حضرتِ محمّد عليه الصلاة والسلام، رسولدر.
٢ - أكمل الرسلدر.
٣ - خاتم الأنبيادر.
٤ - رسالتى، عامّهدر.
٥ - شريعتى، سائر شريعتلرڭ محاسننى جمع ايله اونلرڭ ناسخيدر.
برنجى مقصدڭ (مِنْ قَبْلِكَ) دن وجهِ إنعكاسى:
مسلكلرى و يوللرى بر اولان بر جماعت، (مِنْ قَبْلِكَ) كلمهسندن ايماءً فهم اولونور. بناءً عليه حضرتِ محمّدڭ (عصم) (مِنْ قَبْلِكَ) دهكى ضميره مرجع اولماسى، او جماعتدن معدود اولماسنى إقتضا ايدر. و اونلرڭ مسلكلرى اولان نبوّتلرينه و كتابلرينڭ صدقنه اولان بتون دليللر، حضرتِ محمّد عليه الصلاة والسلامڭ رسالتنه و قرآنڭ اللّٰهدن نازل اولديغنه بر حجّتِ قاطعه اولديغى گبى، اونلرڭ معجزهلرى ده حضرتِ محمّدڭ (عصم) دعواسنه بر معجزه حكمنه گچر.