٤ - شو حرفلرڭ تقطيعى؛ حرف و لفظلرڭ حاوى اولدقلرى قيمت، يالڭز إفاده ايتدكلرى معنالره گوره اولمايوب، علمِ أسرار الحروفده بيان ايديلديگى گبى، عدد و صاييلر مِثللو، حرفلرڭ آراسنده فطرى مناسبتلرڭ بولونديغنه إشارتدر (حاشيه).
٥ - (الٓمٓ) تقطيعيله، بتون حرفلرڭ أساس مخرجلرى اولان «حلق، وَسَط، شفه» مخرجلرينه إشارتدر. و ذهنلرڭ نظرِ دقّتنى شو مخرجلره چويرييور كه؛ ذهنلر، گرك بو اوچ مخرجده، گرك بونلره باغلى كوچك كوچك مخرجلرده لفظلرڭ و حرفلرڭ ناصل وجوده گلدكلرينى حيرت و عبرتله مطالعه ايتسينلر.
أى ذهننى بلاغتڭ بوياسيله بويايان آرقداش! بو لطائفى صيقاجق اولورسهڭ، (هٰذَا كَلَامُ اللّٰهِ) ايچندن چيقاجقدر.
دردنجى مبحث:
(الٓمٓ) أمثاليله برابر، تركيب شكلندن تقطيع صورتنده ذكرلرى، بو شكلڭ مستقل اولوب هيچ بر إمامه تابع اولماديغنه و هيچ كيمسهيى تقليد ايتمش اولماديغنه و اسلوبلرى عجيب، چشيدلرى غريب يڭى ساحۀِ وجوده گلن بر بديعه اولديغنه إشارتدر. بو مبحثده ده بر قاچ لطائف واردر.
١ - خطيب و بليغلرڭ عادتندندر كه مسلكلرنده دائما بر مثاله تابع اولويورلر و بر ئورنك اوزرينه نقش طوقويورلر و ايشلنمش بر يولده يورويورلر. حالبوكه بو حرفلردن آڭلاشيلديغنه نظرًا، قرآن هيچ بر مثاله تابع اولمامشدر و هيچ بر نقشِ بلاغت ئورنگى اوزرينه نقش ياپمامشدر و ايشلنمهمش بر يولده يورومشدر.
٢ - قرآن باشدن آشاغىيه قدر، نازل اولديغى هيئت اوزرينه باقيدر. بو قدر قرآنى تقليد ايتمگه مشتاق اولان دوستلر و متهاجم دشمنلره رغمًا، شيمدىيه قدر
___
(حاشيه) : قرق سنه صوڭره رسالۀِ النور بو لمعۀِ إعجازى كورلره دخى گوسترمشدر.