اوچنجى وجه: جملهلرڭ هيئت و نكتهلرى: (وَعَلَّمَ اٰدَمَ الْاَسْمَٓاءَ كُلَّهَا) يعنى: جنابِ حق آدمى (عس) بتون كمالاتڭ مباديسنى تضمّن ايدن عالى بر فطرتله تصوير ايتمشدر و بتون معالينڭ تخملرينه مزرعه اولارق يوكسك بر إستعداد ايله خلق ايتمشدر و موجوداتى إحاطه ايدن علوى بر وجدان و إحاطهلى اون طويغو ايله تجهيز ايتمشدر؛ و بو اوچ مزيت سايهسنده، بتون حقائقِ أشيايى اوگرتميه حاضرلامشدر، صوڭره بتون أسمايى كنديسنه اوگرتمشدر. ديمك بو جملهنڭ أوّلندهكى «واو»، شو مقدّر اولان اوچ جملهيه إشارتدر.
(عَلَّمَ) : بو كلمهنڭ إختيار ايديلمسى، علمڭ علوِّ قدرينه و قدرينڭ يوكسك درجهسنه و خلافته محور اولديغنه إشارتدر. و كذا أسمانڭ توقيفنه، يعنى شارع طرفندن بيلديريلمش اولديغنه رمزدر. ذاتًا أسما ايله مسمّيات آراسنده تعقيب ايديلن مناسباتِ وضعيه، بونى تأييد ايدييور. و كذا معجزهنڭ واسطهسز اللّٰهڭ فعلى اولديغنه ايمادر. فقط فلاسفهيه گوره خارقهلر، أرواحِ خارقهنڭ فعليدر.
(اٰدَمَ) : خلافتى إراده ايديلن و آدم إسميله تسميه ايديلن كُرۀِ أرضڭ صاحبى شخصِ معهوددر. إسمنڭ تصريحى، تشريف و تشهيرى ايچوندر.
(الْاَسْمَٓاءَ) : إسم و صفت و خاصيت گبى أشيايى بربرندن آييروب تمييز و تعيين ايدن علامت و نشانلردر؛ ياخود إنسانلر آراسنده منقسم اولان لغتلردر.
(عَرَضَهُمْ) : عرض ايديلن أشيا اولديغى حالده ضميرڭ أسمايه رجوعندن؛ إسمڭ عينِ مسمّا اولديغنه قائل اولان أهلِ سنّتڭ مذهبنه إشارتدر.