ملائكهيه ويريلن او إجمالى جوابڭ تحقيقى حقّنده (اِنَّ اللّٰهَ عَلٖيمٌ حَكٖيمٌ) آيتندن شويله بر ايضاحات آلينهبيلير كه: جنابِ حقّڭ أفعالى حكمتلردن، مصلحتلردن خالى دگلدر. اويله ايسه موجودات، خلقڭ معلوماتنده منحصر دگلدر. اويله ايسه ملائكهنڭ عدمِ علملرى، بشرڭ عدمِ وجودينه دليل اولاماز. و كذا جنابِ حق خيرِ محض اولارق ملائكهيى ياراتمشدر، شرِّ محض اولارق ده شيطانى ياراتمشدر، خير و شردن محروم اولارق بهائم و حيواناتى خلق ايتمشدر. حكمتڭ إقتضاسنه گوره، خير و شرّه قادر و جامع اولارق دردنجى قسمى تشكيل ايدن بشرڭ ياراديلماسى ده لازمدر كه؛ بشرڭ شهويه و غضبيه قوّتلرى قوّۀِ عقليهسنه منقاد و مغلوب اولورسه، بشر مجاهدهسندن طولايى ملائكهيه تفوّق ايدر. عكسى حالده حيواناتدن داها آشاغى اولور، چونكه عذرى يوقدر.
* * *