آخرتڭ بر شقّنه، يعنى جهنّمه إشارت ياپيلمشدر. بو آيتده، ايكنجى شقّى اولان جنّتدن خبر ويرلمشدر. بو إعتبارله آخرتڭ هر ايكى شقّى ده ذكر ايديلمش بولونويور.
آرقداش! جنّت و جهنّم، شجرۀِ خلقتدن أبده طوغرى اوزانوب گيدن ايكى دالدن تظاهر ايدن ايكى ثمرهدر و كائناتڭ تسلسلاً گلمكده اولان سلسلهلرينڭ ايكى نتيجهسيدر و أبده طوغرى آقوب گيدن كائنات سَيْلنڭ ايكى مخزنى و ايكى حوضيدر. أوت جنابِ حق غيرِ متناهى حكمتلر ايچون بو عالمى، إمتحانه صحنه ياپدى؛ ينه صوڭسز حكمتلر ايچون تغيّراته، تحوّلاته، إنقلابلره محل اولماسنى إراده ايتدى؛ و ينه صوڭسز غايهلر ايچون خير ايله شرّى، نفع ايله ضررى، حُسن ايله قبحى، خلاصه اييلكله كوتولگى قاريشق بر شكلده جنّت و جهنّمه تخم اولمق اوزره كائناتڭ شو مزرعهسنه سرپدى. أوت مادام كه بو عالم، نوعِ بشرڭ إمتحان ميدانيدر و مسابقه يريدر؛ اييلكله كوتولگڭ بربرندن تفريق ايديلهميهجك درجهده مختلط و قاريشق اولمالرى لازمدر كه، إنسانلرڭ درجهلرى تظاهر ايتسين. إمتحان و تجربه زمانلرى بيتدكدن صوڭره، كوتو إنسانلر: (وَامْتَازُوا الْيَوْمَ اَيُّهَا الْمُجْرِمُونَ) «أى مجرملر! بر طرفه چكيلڭز» دييه اولان توى اورپرتيجى، صاعقهوارى، شدّتلى أمرِ إلٰهىيه معروض قالاجقلرى گبى؛ ايى إنسانلر ده (فَادْخُلُوهَا خَالِدٖينَ) «دائمى قالمق اوزره جنّته گيريڭز» دييه اولان جنابِ حقّڭ منعمانه، شفيقانه، لطفكارانه أمرلرينه مظهر اولاجقلردر. إنسانلر بو ايكى قسمه آيرلدقدن صوڭره، كائنات ده تصفيه عملياتنه اوغرايهجق. كوتولگى، شرّى، ضررى توليد ايدن مادّهلرڭ بر طرفه چكيلمهسيله جهنّمڭ؛ اييلگى، خيرى، نفعى طوغوران مادّهلرڭ ده ديگر طرفه چكيلمهسيله جنّتڭ تجهيزاتلرى إكمال ايديلهجكدر.