دردنجى نكته: جماعتده اولان قوّت، فردده يوقدر. مثلا چوق ايپلرڭ هيئتِ مجموعهسنڭ تشكيل ايتديگى اورغاندهكى قوّت، ايپلر بربرندن آيرى اولديغى زمان بولونماز.
بو نكتهلر گوز اوڭنه گتيرلمكله او حضرتڭ صحيفهسى اوقونمهليدر. أوت او ذاتڭ بتون آثارى، سيرتلرى، تاريخچۀِ حياتى وسائر أحوالى اونڭ پك بيوك، عظيم أخلاق صاحبى اولديغنه شهادت ايدييورلر. حتّى دشمنلرى بيله اونڭ أخلاقجه پك يوكسكلگندن طولايى كنديسنى محمّد الأمين ايله لقبلانديرمشلردر.
معلومدر كه، بر ذاتده إجتماع ايدن أخلاقِ عاليهنڭ إمتزاجندن عزّتِ نفس، حيثيت، شرف، وقار گبى؛ خسيس، آلچاق شيلره تنزّل ايتمگه مساعده ايتمهين يوكسك حاللر حصوله گلير. أوت ملائكه علوِّ شانلرندن، شيطانلرى ردّ ايدر، قبول ايتمزلر. كذالك بر ذاتده إجتماع ايدن أخلاقِ عاليه؛ كذب، حيله گبى آلچاق حاللرى ردّ ايدر. أوت يالڭز شجاعتله إشتهار ايدن بر ذات، قولاى قولاى يالانه تنزّل ايتمز. بتون أخلاقِ عاليهيى جمع ايدن بر ذات، ناصل يالانه و حيلهيه تنزّل ايدر؛ إمكانى وار ميدر؟
خلاصه: حضرتِ محمّد عليه الصلاة والسلام كندى كندينه گونش گبى بر برهاندر. و كذا او ذاتڭ (عصم) درت ياشندن قرق ياشنه قدر گچيرمش اولديغى گنجلك دورهسنده بر حيلهسى، بر خيانتى گورولمهمش و بر يالانى ايشيديلمهمشدر. أگر او ذاتڭ يراديليشنده، طبيعتنده بر فنالق، بر كوتولك حسّى و مَيلى اولمش اولسيدى؛ بهمهحال گنجلك سائقهسيله طيشارىيه ويرهجكدى. حالبوكه بتون ياشنى، عمرينى كمالِ إستقامتله، متانتله، عفّتله، بر إطّراد و إنتظام اوزرينه گچيرمش، دشمنلرى بيله حيلهيه إشارت ايدن بر حالنى گورمهمشلردر.