كذالك سعادتِ داريْن ايچون تأسيس ايتديگى أساسلرده إصابت ايتمش اولديغى و إظهار ايتديگى قواعدڭ حقيقتله متّصل و حقّانيتله ياپيشيق اولديغى، بتون عالمجه مظهرِ قبول و تصديق اولمش و اولمقدهدر.
إخطار: او ذاتڭ (عصم) أحوال و حركاتى برر برر، يعنى تك تك اونڭ صدق و حقّانيتنى گوسترر ايسه؛ هيئتِ مجموعهسى، اونڭ صدقِ نبوّتنه اويله بر دليل اولور كه، شيطانلرى بيله تصديقه مجبور ايدر.
اوچنجى مسئله:
او ذاتڭ (عصم) صدقِ نبوّتنى يازوب تصديق ايدن بر قاچ صحيفه واردر. شيمدى او صحيفهلرى اوقوياجغز:
برنجى صحيفه: او حضرتڭ ذاتيدر. فقط بو صحيفهيى مطالعهدن أوّل، درت نكتهيه دقّت لازمدر:
برنجى نكته: (لَيْسَ الْكَحْلُ كَالتَّكَحُّلِ) يعنى: فطرى قره گوزليلك، صنعى (ياپمه) قره گوزليلك گبى دگلدر. يعنى ياپمه و صنعى اولان بر شى نه قدر گوزل و نه قدر كامل اولورسه اولسون، فطرى و طبيعى اولان شيلرڭ مرتبهسنه يتيشهمز و اونڭ يرينه قائم اولاماز. هر حالده صنعيلگڭ ياڭليشلقلرى، اونڭ أحوالندن، أطوارندن بللى اولاجقدر.
ايكنجى نكته: أخلاقِ عاليهيى و يوكسك خويلرى حقيقته ياپيشديران و او أخلاقى دائما ياشاتديران، جدّيت ايله صدقدر. أگر صدق قالقوب آرايه كذب گيررسه، روزگارلره اويونجق اولان ياپراقلر گبى، او آدم ده إنسانلره اويونجق اولور.
اوچنجى نكته: متناسب اولان أشيا آراسنده مَيل و جذبه واردر. يعنى، بربرينه تمايل ايدرلر و يكديگرينى جلب ايدرلر. آرالرنده إتّحاد اولور. فقط بربرينه ضد اولان أشيانڭ آرالرنده نفرت واردر، چكهمهمزلك اولور.