كذالك، ايمانڭ ضدّى اولان نفاقڭ ده اوچ خاصّهسى واردر:
١ - ذلّتدر.
٢ - إفساداته مَيل ايتمكدر.
٣ - باشقهلرى تحقير ايتمكله غرورلانوب ذوق آلمقدر.
بناءً عليه ايمان عزّتِ نفسى إنتاج ايتديگى گبى، نفاق ده اونڭ عكسنه ذلّتى إنتاج ايدر. ذلّتى اولان، هركسه قارشى كنديسنى ذليل گوسترر. بو ايسه ريادر. ريا ايسه مداهنهدر. مداهنه دخى كذبدر. قرآنِ كريم شو سلسلهلى كذبه (وَاِذَا لَقُوا الَّذٖينَ اٰمَنُوا قَالُٓوا اٰمَنَّا) ايله إشارت ايتمشدر. يعنى مؤمنلره راست گلدكلرى زمان، «بز ده ايمانه گلدك.» دييورلر.
صوڭره نفاق، ايمانڭ خلافنه قلبلرى إفساد ايدر. قلبڭ فسادى ايسه يتيملگى إنتاج ايدر. يعنى بوزوق اولان بر قلب كنديسنى صاحبسز، مالكسز، يتيم بيلير. بوندن قورقو نشئت ايدر. قورقو ده اونى قاچوب، گيزلنمگه إجبار ايدر. قرآن شو حاللرينه (وَاِذَا خَلَوْا) ايله إشارت ايتمشدر. يعنى، «قاچوب خلوتلره گيتدكلرى زمان.»
صوڭره نفاق، ايمانڭ عكسنه أقربا و سائرهلر آراسندهكى صلۀِ رحمى قطع ايدر، كسر. بو ايسه شفقتى إزاله ايدر. شفقتڭ زوالى ايسه إفساداته سبب اولور. إفساددن فتنه چيقار. فتنهدن خيانت طوغار. خيانت دخى، ضعفيتى موجبدر. ضعفيت ده حمايه ايدهجك بر ظهيره، بر آرقهيه إلتجا ايتمگه إجبار ايدر. قرآنِ كريم بوڭا (اِلٰى شَيَاطٖينِهِمْ) ايله إشارت ايتمشدر. يعنى، شيطانلرينه قاچوب حمايهلرينه گيرييورلر.