﴿وَاِذَا لَقُوا الَّذٖينَ اٰمَنُوا قَالُٓوا اٰمَنَّا وَاِذَا خَلَوْا اِلٰى شَيَاطٖينِهِمْ قَالُٓوا اِنَّا مَعَكُمْ اِنَّمَا نَحْنُ مُسْتَهْزِؤُنَ ۞ اَللّٰهُ يَسْتَهْزِئُ بِهِمْ وَيَمُدُّهُمْ فٖى طُغْيَانِهِمْ يَعْمَهُونَ﴾
إستهزا و إستخفاف گبى، منافقلرڭ دردنجى جنايتلرينى بيان ايدن شو آيتڭ فساد، إفساد، تسفيه گبى سبقت ايدن جنايتلرينه عطفنى إقتضا ايدن عينِ مناسبتله بو آيتڭ مئاليله ماقبلنڭ مئالى آراسنده إرتباط و إنتظام حاصل اولمشدر.
بو آيتڭ جملهلرى آراسندهكى وجهِ إرتباط ايسه:
أوت إنسانڭ مصيبت و ألملره قارشى نقطۀِ إستنادى و إحتياج و أمللرينى تسويه ايچون نقطۀِ إستمدادى اولان ايمانڭ اوچ خاصّهسى واردر:
١ - نقطۀِ إستنادندن نشئت ايدن عزّتِ نفسدر. عزّتِ نفسى اولان، باشقهلره كنديسنى ذليل گوسترمگه تنزّل ايتمز.
٢ - شفقتدر. شفقتى اولان، كيمسهيى تحقير و تذليل ايتمز.
٣ - حقيقتلره إحترام ايتمك و يوكسك شيلرڭ قيمتنى بيلمكله إستخفاف ايتمهمكدر.