﴿وَاِذَا قٖيلَ لَهُمْ لَاتُفْسِدُوا فِى الْاَرْضِ قَالُٓوا اِنَّمَا نَحْنُ مُصْلِحُونَ ۞ اَلَٓا اِنَّهُمْ هُمُ الْمُفْسِدُونَ وَلٰكِنْ لَايَشْعُرُونَ﴾
بو آيتڭ أوّلكى آيتله وجهِ إرتباطى:
أوت وقتا كه، منافقلرڭ نفاقندن نشئت ايدن جنايتلرڭ برنجيسنى تشكيل ايدن نفسلرينه ظلم ايتمكله حقوق اللّٰهه تجاوزلرى اولان جنايت ذكر ايديلدكدن صوڭره، مذكور جنايتلرڭ ايكنجيسنى تشكيل ايدن حقوقِ عباده تجاوز ايله آرالرينه فسادى إلقا ايتمك اولان جنايت دخى موقعِ مناسبنده ذكر ايديلمشدر.
صوڭره (وَاِذَا قٖيلَ) جملهسى منافقلرڭ قصّهسنه و حكايهسنه داخل اولديغى جهتله (وَمِنَ النَّاسِ مَنْ يَقُولُ) دهكى (يَقُولُ) يه باغليدر، معنا و مئالجه (يُخَادِعُونَ) يه ناظردر. حدِّ ذاتنده دخى (يَكْذِبُونَ) يه مربوطدر. اُسلوبڭ تغييرى ايسه، يعنى قضيۀِ حمليه يرينه، قضيۀِ شرطيهنڭ ايرادى (يَكْذِبُونَ) ايله (وَاِذَا قٖيلَ) آراسنده بر قاچ جملهنڭ مقدّر اولديغنه بر أمارهدر. تقديرِ كلام شويله اولسه گركدر: يالان سويلهدكلرى زمان، فتنهيى ايقاع ايدييورلر. فتنهيى ايقاع ايتدكلرى زمان، إفساد ايدييورلر. نصيحت ايديلدكلرى وقت، قبول ايتمييورلر. فسادى ياپمايڭ دينيلديگى زمان، «بز آنجق إصلاحه چاليشييورز.» دييورلر.