گيدييورلر؟» دييه أحواللرينى آڭلامق اوزره خلقت حكومتى، فنِّ حكمتى قارشيلرينه چيقاردى. و آرالرنده شويله بر محاوره باشلادى:
حكمت: نرهدن گلييورسڭز؟ نرهيه گيدييورسڭز؟ بو دنياده ايشيڭز نهدر؟ رئيسڭز كيمدر؟
بو سؤاله، بنى آدم نامنه، أمثالى اولان بيوك پيغمبرلر گبى، محمّدِ عربى عليه الصلاة والسلام، نوعِ بشره وكالةً قارشيسنه چيقهرق شويله جوابده بولوندى:
أى حكمت! بو گورديگڭ إنسانلر، سلطانِ أزلينڭ قدرتيله يوقلق قراڭلقلرندن ضيادار وارلق عالمنه چيقاريلان مخلوقلردر. سلطانِ أزلى، بتون موجوداتى ايچنده بز إنسانلرى سچمش و أمانتِ كبرايى بزه ويرمشدر. بز حشر يوليله سعادتِ أبديهيه متوجّهًا حركت ايتمكدهيز. دنيادهكى ايشيمز ده، او سعادتِ أبديه يوللرينى تأمين ايتمكله، رأس المالمز اولان إستعدادلريمزى نمالانديرمقدر. و شو عظيم إنسان كرواننه، بوندن صوڭره سلطانِ أزليدن رسالت وظيفهسيله گلوب رياست ايدن بنم. ايشته او سلطانِ أزلينڭ رسالت براتى اولارق بڭا ويرديگى قرآنِ عظيم الشان أليمدهدر. شبههڭ وارسه آل، اوقو!
محمّدِ عربى عليه الصلاة والسلامڭ ويرديگى شو جوابلر، قرآندن مقتبس و قرآن لسانيله سويلهنيلديگندن؛ قرآنڭ عناصرِ أساسيهسنڭ شو درت مقصدده تمركز ايتديگى آڭلاشيلييور.
سؤال: شو مقاصدِ أربعه، قرآنڭ هانگى آيتلرنده بولونويور؟
جواب: او عناصرِ أربعه، قرآنڭ هيئتِ مجموعهسنده بولونديغى گبى؛ قرآنڭ سورهلرنده، آيتلرنده، كلاملرنده، حتّى كلمهلرنده بيله صراحةً ويا إشارةً ويا رمزًا بولونمقدهدر. چونكه قرآنڭ كلّى، جزءلرنده گورونديگى گبى؛ جزءلرى ده، قرآنڭ