حقيقى قارداشلق واسطهلريدر. اولسه اولسه بر استادلق اورتهيه گيرر. مسلگمز «خليليه » اولديغى ايچون، مشربمز «خلّت»در. خلّت ايسه، أڭ ياقين دوست و أڭ فداكار آرقداش و أڭ گوزل تقدير ايديجى يولداش و أڭ جوانمرد قارداش اولمق إقتضا ايدر. بو خلّتڭ اُسّ الأساسى، صميمى إخلاصدر. صميمى إخلاصى قيران آدم، بو خلّتڭ غايت يوكسك قُلهسنڭ باشندن سقوط ايدر. غايت درين بر چوقوره دوشمك إحتمالى وار. اورتهده طوتونهجق ير بولاماز.
أوت يول ايكى گورونويور. جادّۀِ كبراىِ قرآنيه اولان شو مسلگمزدن شيمدى آيريلانلر، بزه دشمن اولان دينسزلك قوّتنه بيلميهرك يارديم ايتمك إحتمالى وار. إن شاء اللّٰه رسالۀِ نور يوليله قرآنِ معجز البيانڭ دائرۀِ قدسيهسنه گيرنلر؛ دائما نوره، إخلاصه، ايمانه قوّت ويرهجكلر و اويله چوقورلره سقوط ايتميهجكلردر.