برنجيسى: بتون كمالاتڭ استادى و اوچ يوز يتمش ميليون نفسلرى بر تك نفس حكمنه گتيرهبيلن و حقيقى بر مدنيتله و مثبت و طوغرى فنلرله تجهيز ايديلمش اولان و هيچ بر قوّت اونى قيرهميهجق بر ماهيتده بولونان حقيقتِ إسلاميتدر.
ايكنجى قوّت: مدنيت و صنعتڭ حقيقى استادى و وسيلهلرڭ و مباديلرڭ تكمّليله جهازلانمش اولان شديد بر إحتياج و بليمزى قيران تام بر فقر، اويله بر قوّتدر كه، صوصماز و قيريلماز.
اوچنجى قوّت: يوكسك شيلره مسابقه صورتنده بشره يوكسك مقصدلرى درس ويرن و او يولده چاليشديران و إستبداداتى پارچه پارچه ايدن و علوى حسلرى هيجانه گتيرن و غبطه و حسد و قيصقانجلق و رقابتله و تام اويانمقله و مسابقه شوقيله و تجدّد ميليله و تمدّن ميلانيله تجهيز ايديلن اوچنجى قوّت، يالڭز حرّيتِ شرعيهدر. يعنى إنسانيته لايق أڭ يوكسك كمالاته اولان مَيل و آرزو ايله جهازلانمش اولمق.
دردنجى قوّت: شفقتله جهازلانمش شهامتِ ايمانيهدر. يعنى تذلّل ايتمهمك؛ حقسزلره، ظالملره ذلّت گوسترمهمك، مظلوملرى ده ذليل ايتمهمك. يعنى حرّيتِ شرعيهنڭ أساسلرى اولان؛ مستبدلره دالقاووقلق ايتمهمك و بيچارهلره تحكّم و تكبّر ايتمهمكدر.
بشنجى قوّت: عزّتِ إسلاميهدر كه، إعلاىِ كلمة اللّٰهى إعلان ايدييور. و بو زمانده إعلاىِ كلمة الله، مادّةً ترقّىيه متوقّف و مدنيتِ حقيقيهيه گيرمكله إعلاىِ كلمة الله ايديلهبيلير. عزّتِ إسلاميهنڭ ايمان ايله قطعى ويرديگى أمرى، ألبته عالمِ إسلامڭ شخصِ معنويسى او قطعى أمرى، إستقبالده تام يرينه گتيرهجگنه شبهه ايديلمز.
أوت ناصلكه أسكى زمانده إسلاميتڭ ترقّيسى، دشمنڭ تعصّبنى پارچهلامق و عنادينى قيرمق و تجاوزاتنى دفع ايتمك، سلاح ايله قلنج ايله اولمش. إستقبالده سلاح، قلنج يرينه حقيقى مدنيت و مادّى ترقّى و حق و حقّانيتڭ معنوى قلنجلرى دشمنلرى مغلوب ايدوب طاغيدهجق.
بيليڭز كه:
بزم مراديمز مدنيتڭ محاسنى و بشره منفعتى بولونان اييلكلريدر. يوقسه مدنيتڭ گناهلرى، سيّئاتلرى دگل كه؛ أحمقلر او سيّئاتلرى، او سفاهتلرى محاسن ظن ايدوب، تقليد ايدوب مالمزى خراب ايتديلر. و دينى رشوت ويروب، دنيايى ده قزانهمديلر. مدنيتڭ گناهلرى اييلكلرينه غلبه ايدوب سيّئاتى حسناتنه راجح گلمكله، بشر ايكى حربِ عمومى ايله ايكى دهشتلى طوقات ييوب، او گناهكار مدنيتى زير و زبر ايدوب اويله بر قوصدى كه، ير يوزينى قانله بولاشديردى. إن شاء الله إستقبالدهكى إسلاميتڭ قوّتى ايله مدنيتڭ محاسنى غلبه ايدهجك، زمين يوزينى پيسلكلردن تميزليهجك، صلحِ عمومىيى ده تأمين ايدهجك.
أوت آوروپانڭ مدنيتى فضيلت و هدا اوستنه تأسيس ايديلمديگندن، بلكه هوس و هوا، رقابت و تحكّم اوزرينه بنا ايديلديگندن، شيمدىيه قدر مدنيتڭ سيّئاتى حسناتنه غلبه ايدوب، إختلالجى قوميتهلرله قورتلاشمش بر آغاج حكمنه گيرديگى جهتله؛ آسيا مدنيتنڭ غلبهسنه قوّتلى بر مدار، بر دليل حكمندهدر. و آز وقتده غلبه ايدهجكدر.
عجبا إستقباله قارشى أهلِ ايمان و إسلام ايچون بويله مادّى و معنوى ترقّياته وسيله و قوّتلى، صارصيلماز أسباب واركن و دمير يولى گبى إستقبال سعادتنه يول آچيلديغى حالده، ناصل مأيوس اولوب يأسه دوشويورسڭز و عالمِ إسلامڭ قوّۀِ معنويهسنى قيرييورسڭز؟ و يأس و اميدسزلكله ظن ايديورسڭز كه، دنيا هركسه و أجنبيلره ترقّى دنياسيدر، فقط يالڭز بيچاره أهلِ إسلام ايچون تدنّى دنياسى اولدى دييه پك ياڭليش بر خطايه دوشويورسڭز.
مادام مَيل الإستكمال (تكامل مَيلى) كائناتده فطرتِ بشريهده فطرةً درج ايديلمش. ألبته بشرڭ ظلم و خطاسيله باشنه چابوق بر قيامت قوپمازسه؛ إستقبالده حق و حقيقت، عالمِ إسلامده نوعِ بشرڭ أسكى خطيئاتنه كفّارت اولاجق بر سعادتِ دنيويهيى ده گوسترهجك إن شاء الله...
أوت باقڭز، زمان خطِّ مستقيم اوزرينه حركت ايتمييور كه، مبدأ و منتهاسى بربرندن اوزاقلاشسين. بلكه كُرۀِ أرضڭ حركتى گبى بر دائره ايچنده دونويور. بعضًا ترقّى ايچنده ياز و بهار موسمى گوسترر. بعضًا تدنّى ايچنده قيش و فورطنه موسمنى گوسترر.
هر قيشدن صوڭره بر بهار، هر گيجهدن صوڭره بر صباح اولديغى گبى، نوعِ بشرڭ دخى بر صباحى، بر بهارى اولاجق إن شاء الله. حقيقتِ إسلاميهنڭ گونشى ايله، صلحِ عمومى دائرهسنده حقيقى مدنيتى گورمگى، رحمتِ إلٰهيهدن بكليهبيليرسڭز.
ديرسڭ باشنده، بر بچق برهانى دعوامزه شاهد گوسترهجگز ديمشدك. شيمدى بر برهان مجملاً بيتدى. او دعوانڭ يارى برهانى ده شودر كه:
فنلرڭ جاسوس گبى تدقيقاتيله و حدسز تجربهلرله ثابت اولمش كه: كائناتڭ نظامنده غالبِ مطلق و مقصودِ بِالذّات و صانعِ ذو الجلالڭ حقيقى مقصدلرى، خير و حُسن و گوزللك و مكمّليتدر. چونكه كائناته عائد فنلردن هر بر فن، كلّى قاعدهلريله بحث ايتديگى نوع و طائفهده اويله بر إنتظام و مكمّليت گوسترييور كه، اوندن داها مكمّل عقل بولامييور. مثلا: طبّه عائد تشريحِ بدنِ إنسانى فنّى و قوزموغرافيايه تابع منظومۀِ شمسيه فنّى؛ نباتات و حيواناته عائد فنلر گبى بتون فنلرڭ هر بريسى، كلّى قاعدهلريله او بحث ايتديگى قسمده صانعِ ذو الجلالڭ او نوعدهكى نظامنده معجزاتِ قدرتنى و حكمتنى و (اَحْسَنَ كُلَّ شَىْءٍ خَلَقَهُ) حقيقتنى گوسترييور.
هم إستقراءِ تامّه و تجربۀِ عمومى گوسترييور، نتيجه ويرييور كه:
شر، قبح، چركينلك، باطل، فنالق خلقتِ كائناتده جزئيدر. مقصود دگل، تَبَعيدر و دولاييسيلهدر. يعنى مثلا چركينلك، چركينلك ايچون كائناته گيرمهمش؛ بلكه گوزللگڭ بر حقيقتى چوق حقيقتلره إنقلاب ايتمك ايچون چركينلك بر واحدِ قياسى اولارق خلقته گيرمش. شر، حتّى شيطان دخى بشرڭ حدسز ترقّياتنه مسابقه ايله وسيله اولمق ايچون بشره مسلّط ايديلمش. بونلر گبى جزئى شرلر، چركينلكلر، كلّى گوزللكلره، خيرلره وسيله اولمق ايچون كائناتده خلق ايديلمش.
ايشته كائناتده حقيقى مقصد و نتيجۀِ خلقت إستقراءِ تامّه ايله إثبات ايدييور كه؛ خير و حُسن و تكمّل أساسدر و حقيقى مقصود اونلردر. ألبته بشر بو قدر ظلمى كفرياتلريله زمين يوزينى ملوّث و پريشان ايتدكلرى حالده، جزاسنى گورمهدن و كائناتدهكى مقصودِ حقيقىيه مظهر اولمادن، دنيايى بيراقوب عدمه قاچاميهجق. بلكه جهنّم حپسنه گيرهجك.
هم إستقراءِ تامّه ايله و فنلرڭ تحقيقاتيله ثابت اولمش كه؛ مخلوقات ايچنده أڭ مكرّم، أڭ أهمّيتلى بشردر. چونكه بشر، خلقتِ كائناتدهكى ظاهرى أسباب و نتيجهلرينڭ مابيْنندهكى باصامقلرى و تسلسل ايدن علّتلرڭ و سببلرڭ مناسبتلرينى عقليله كشف ايدوب صنعتِ إلٰهيهيى و منتظم حكمتلى ايجاداتِ ربّانيهنڭ تقليدينى صنعتجغيله ياپمق و أفعالِ إلٰهيهيى آڭلامق ايچون و صنعتِ إلٰهيهيى بيلمك و جزئى علميله و صنعتلريله آڭلامق ايچون بر ميزان، بر مقياس، كندى جزئى إختياريله ايشلديگى مادّهلرله، خالقِ ذو الجلالڭ كلّى، محيط أفعال و صفتلرينى بيلهرك كائناتڭ أڭ أشرف، أڭ أكرم مخلوقى بشر اولديغنى إثبات ايدييور.
هم إسلاميتڭ كائناته و بشره عائد حقيقتلرينڭ شهادتيله مكرّم بشر ايچنده أڭ أشرف و أڭ أعلاسى أهلِ حق و حقيقت اولان أهلِ إسلاميت؛ هم إستقراءِ تامّه ايله، تاريخلرڭ شهادتيله، أڭ مكرّم بشر ايچندهكى أڭ مشرّف اولان أهلِ حقّڭ ايچنده دخى بيڭ معجزاتى و چوق يوكسك أخلاقنڭ و إسلاميت و قرآن حقيقتلرينڭ شهادتيله أڭ أفضل، أڭ يوكسك اولان محمّد عليه الصلاة والسلامدر.
مادام بو يارى برهانڭ اوچ حقيقتى بويله خبر ويرييور. عجبا هيچ ممكن ميدر كه، نوعِ بشر شقاوتيله بو قدر فنلرڭ شهادتنى جرح ايدوب، بو إستقراءِ تامّهيى قيروب، مشيئتِ إلٰهيهيه و كائناتى ايچنه آلان حكمتِ أزليهيه قارشى تمرّد ايدوب، شيمدىيه قدر أكثريتله ياپديغى گبى او ظالمانه وحشتنده و متمرّدانه كفرنده و دهشتلى تخريباتنده دوام ايدهبيلسين؟ و إسلاميت عليهنده بو حالڭ دوام ايتمهسى هيچ ممكن ميدر؟
بن بتون قوّتمله، حدسز لسانم اولسه، او حدسز لسانلرله قَسَم ايدرم كه، عالمى بو نظامِ أكمل ايله، بو كائناتى ذرّهدن سيّاراته قدر، سينك قنادندن سماوات قنديللرينه قدر نهايت بر حكمتِ إنتظام ايله خلق ايدن حكيمِ ذو الجلاله و صانعِ ذو الجماله او حدسز لسانلرله قَسَم ايدييورز كه؛ بشر هيچ بر جهتله بتون أنواعِ كائناته مخالف اولارق و كوچك قارداشلرى اولان سائر طائفهلره ضد اولارق كائناتدهكى نظامه، كلّى شرلريله مخالفت ايدوب نوعِ بشرده شرّڭ خيره غلبهسنه بيڭلر سنهده سبب اولان او زقّوملرى ييوب هضم ايتمسى ممكن دگل...
بونڭ إمكانى آنجق و آنجق بو فرضِ محال ايله اولابيلير كه؛ بشر بو عالمه أمانتِ كبرا مرتبهسنده و خليفۀِ روىِ زمين مقامنده سائر أنواعِ كائناته بيوك و مكرّم بر قارداش اولديغى حالده أڭ أدنا، أڭ برباد، أڭ پريشان، أڭ مضر و أهمّيتسز، خيرسزجهسنه و طولاييسيله بو كائنات ايچنه گيرمش، قاريشديرمش. بو فرضِ محال، هيچ بر جهتله قبول اولوناماز.
بو حقيقت ايچون، ألبته بو ياريم برهانمز نتيجه ويرييور كه، آخرتده جنّت و جهنّمڭ ضرورى وجودلرى گبى، خير و حق دين إستقبالده مطلق غلبه ايدهجكدر. تا كه، نوعِ بشرده دخى سائر نوعلر گبى خير و فضيلت غالبِ مطلق اولاجق. تا بشر ده سائر كائناتدهكى قارداشلرينه مساوى اولابيلسين و سرِّ حكمتِ أزليه نوعِ بشرده دخى تقرّر ايتدى دينيلهبيلسين.
الحاصل: مادام مذكور قطعى حقيقتلرله بو كائناتده أڭ منتخب نتيجه و خالقڭ نظرنده أڭ أهمّيتلى مخلوق بشردر. ألبته و ألبته و حياتِ باقيهده جنّت و جهنّمى، بِالبداهه بشردهكى شيمدىيه قدر ظالمانه وضعيتلر جهنّمڭ وجودينى و فطرتندهكى كلّى إستعداداتِ كماليهسى و كائناتى علاقهدار ايدن حقائقِ ايمانيهسى، جنّتى بداهتله إستلزام ايتديگى گبى؛ هر حالده ايكى حربِ عمومى ايله و كائناتى آغلاتديران جنايتلرى و يوتديغى زقّوم شرلرينى هضم ايتمهديگى ايچون قوصديغى و زمينڭ بتون يوزينى پيسلنديرديگى وضعيتيله، بشريتى أڭ برباد بر درجهيه دوشوروب بيڭ سنهلك ترقّياتنى زير و زبر ايتمك جنايتنى بشر هضم ايتميهجك.
هر حالده چابوق باشنده بر قيامت قوپمازسه، حقائقِ إسلاميه، بشرى أسفلِ سافلين درجۀِ سقوطندن قورتارمغه و روىِ زمينى تميزلهمگه و صلحِ عمومىيى تأمين ايتمگه وسيله اولماسنى رحمٰنِ رحيمڭ رحمتندن نياز ايدييورز و اُميد ايدييورز و بكلهيورز.
ايكنجى كلمه كه؛ مدّتِ حياتمده تجربهلرمله فكرمده تولّد ايدن شودر:
يأس أڭ دهشتلى بر خستهلقدر كه، عالمِ إسلامڭ قلبنه گيرمش. ايشته او يأسدر كه بزى ئولديرمش گبى، غربده بر ايكى ميليونلق كوچك بر دولت، شرقده يگرمى ميليون مسلمانلرى كندينه خدمتكار و وطنلرينى مستملكه حكمنه گتيرمش. هم او يأسدر كه، يوكسك أخلاقمزى ئولديرمش، منفعتِ عموميهيى بيراقوب منفعتِ شخصيهيه نظريمزى حصر ايتديرمش. هم او يأسدر كه، قوّۀِ معنويهمزى قيرمش. آز بر قوّتله، ايماندن گلن قوّۀِ معنويه ايله شرقدن غربه قدر إستيلا ايتديگى حالده؛ او قوّۀِ معنويۀِ خارقه، مأيوسيتله قيريلديغى ايچون، ظالم أجنبيلر درت يوز سنهدن بَرى اوچ يوز ميليون مسلمانى كنديلرينه أسير ايتمش. حتّى بو يأس ايله باشقهسنڭ لاقيدلغنى و فتورينى كندى تنبللگنه عذر ظن ايدوب «نهمه لازم» دير، «هركس بنم گبى برباددر» دييه شهامتِ ايمانيهيى ترك ايدوب خدمتِ إسلاميهيى ياپمييور. مادام بو درجه بو خستهلق بزه بو ظلمى ايتمش، بزى ئولديرييور؛ بز ده او قاتلمزدن قصاصمزى آلوب ئولديرهجگز.
﴿لَا تَقْنَطُوا مِنْ رَحْمَةِ اللّٰهِ﴾
قلنجى ايله او يأسڭ باشنى پارچهلايهجغز.
﴿مَا لَا يُدْرَكُ كُلُّهُ لَا يُتْرَكُ كُلُّهُ﴾
حديثنڭ حقيقتيله بلنى قيرهجغز إن شاء الله.
يأس؛ امّتلرڭ، ملّتلرڭ «سرطان» دينيلن أڭ دهشتلى بر خستهلغيدر. و كمالاته مانع و
﴿اَنَا عِنْدَ حُسْنِ ظَنِّ عَبْدٖى بٖى﴾
حقيقتنه مخالفدر؛ قورقاق، آشاغى و عاجزلرڭ شأنيدر، بهانهلريدر. شهامتِ إسلاميهنڭ شأنى دگلدر. خصوصًا عرب گبى نوعِ بشرده مدارِ إفتخار يوكسك سجيهلرله ممتاز بر قَومڭ شأنى اولاماز. عالمِ إسلام ملّتلرى عربڭ متانتندن درس آلمشلر. إن شاء الله ينه عربلر يأسى بيراقوب إسلاميتڭ قهرمان اوردوسى اولان توركلرله حقيقى بر تساند و إتّفاق ايله أل أله ويروب قرآنڭ بايراغنى دنيانڭ هر طرفنده إعلان ايدهجكلردر.
اوچنجى كلمه كه؛ بتون حياتمدهكى تحقيقاتمله و حياتِ إجتماعيهنڭ چالقاماسيله خلاصه و زبدهسى بڭا قطعى بيلديرمش كه: صدق، إسلاميتڭ اُسّ الأساسيدر و علوى سجيهلرينڭ رابطهسيدر و حسّياتِ علويهسنڭ مزاجيدر. اويله ايسه، حياتِ إجتماعيهمزڭ أساسى اولان صدقى، طوغريلغى ايچمزده إحيا ايدوب اونڭله معنوى خستهلقلريمزى تداوى ايتملىيز.
أوت صدق و طوغريلق، إسلاميتڭ حياتِ إجتماعيهسنده عقدۀِ حياتيهسيدر. رياكارلق، فعلى بر نوع يالانجيلقدر. دالقاووقلق و تصنّع، آلچاقجه بر يالانجيلقدر. نفاق و منافقلق، مضر بر يالانجيلقدر. يالانجيلق ايسه، صانعِ ذو الجلالڭ قدرتنه إفترا ايتمكدر.
كفر، بتون أنواعيله كذبدر، يالانجيلقدر. ايمان صدقدر، طوغريلقدر. بو سرّه بناءً كذب و صدقڭ اورتهسنده حدسز بر مسافه وار؛ شرق و غرب قدر بربرندن اوزاق اولمق لازم گلييور. نار و نور گبى بربرينه گيرمهمك لازم. حالبوكه غدّار سياست و ظالم پروپاغنده بربرينى قاريشديرمش، بشرڭ كمالاتنى ده قاريشديرمش. (حاشيه)
___
(حاشيه): أى قارداشلرم! قرق بش سنه أوّل سعيدڭ بو درسندن آڭلاشيلييور كه؛ او سعيد سياستله، إجتماعياتِ إسلاميه ايله زياده علاقهداردر. فقط صاقين ظن ايتمهيڭز كه؛ او، دينى سياسته آلَت ويا وسيله ياپمق مسلگنده گيتمش. حاشا بلكه او بتون قوّتيله سياستى دينه آلَت ايدييورمش. و ديردى كه: «دينڭ بر حقيقتنى بيڭ سياسته ترجيح ايدرم.» أوت او زمانده قرق أللى سنه أوّل حسّ ايتمش كه، بعض منافق زنديقلرڭ سياستى دينسزلگه آلَت ايتمگه تشبّث نيّتلرينه و فكرلرينه مقابل، او ده بتون قوّتيله سياستى إسلاميتڭ حقائقنه بر خدمتكار، بر آلَت ياپمغه چاليشمش.
فقط او زماندن يگرمى سنه صوڭره گوردى كه: او گيزلى منافق زنديقلرڭ غربليلشمق بهانهسيله، سياستى دينسزلگه آلَت ياپمالرينه مقابل، بر قسم ديندار أهلِ سياست دينى سياستِ إسلاميهيه آلَت ايتمگه چاليشمشلردى. إسلاميت گونشى يردهكى ايشيقلره آلَت و تابع اولاماز. و آلَت ياپمق إسلاميتڭ قيمتنى تنزيل ايتمكدر، بيوك بر جنايتدر. حتّى أسكى سعيد او چشيد سياست طرفگيرلگندن گوردى كه:
بر صالح عالم كندى فكرِ سياسيسنه موافق بر منافقى حرارتله ثنا ايتدى. سياستنه مخالف بر صالح خواجهيى تنقيد و تفسيق ايتدى.
أسكى سعيد اوڭا ديدى: «بر شيطان سنڭ فكريڭه يارديم ايتسه، رحمت اوقوتهجقسڭ. سنڭ فكرِ سياسيهڭه مخالف بر مَلك اولسه، لعنت ايدهجكسڭ.» بونڭ ايچون أسكى سعيد: (اَعُوذُ بِاللّٰه مِنَ الشَّيْطَانِ وَ السِّيَاسَةِ) ديدى، اوتوز بش سنهدن بَرى (شيمدى قرق بش سنه اولدى) سياستى ترك ايتدى. (حاشيه ١)
(حاشيه ١): استاديمزڭ يوز اوتوز پارچه كتابى و مكتوبلرى، اوچ محكمه و حكومت مأمورلرى طرفندن تام تدقيق ايديلديگى و عليهنده چاليشان ظالم مرتد و منافقلره قارشى مجبور ده اولديغى حالده، حتّى إعدامى ايچون گيزلى أمر ويريلديگى حالده، دينى سياسته آلَت ايتديگنه دائر أڭ اوفاق بر أماره بولاماملرى، دينى سياسته آلَت ايتمديگنى قطعى إثبات ايدييور. و حياتنى ياقيندن طانييان بز نور شاكردلرى ايسه، بو فوق العاده حاله قارشى حيرانلق طويمقده و رسالۀِ نورڭ دائرهسندهكى حقيقى إخلاصه بر دليل صايمقدهيز.
نور شاكردلرى
___
بو صدق و كذب، كفر و ايمان قدر بربرندن اوزاق. عصرِ سعادتده صدق واسطهسيله محمّد عليه الصلاة والسلامڭ أعلاىِ علّيّينه چيقماسى و او صدق آناختاريله حقائقِ ايمانيه و حقائقِ كائنات خزينهسى آچيلمهسى سرّيله، إجتماعياتِ بشريه چارشوسنده صدق أڭ رواجلى بر مال و صاتون آلينهجق أڭ قيمتلى بر متاع حكمنه گچمش.
و كذب واسطهسيله مسيلمۀِ كذّابڭ أمثالى، أسفلِ سافلينه سقوط ايتمش. و كذب او زمانده كفريات و خرافاتڭ آناختارى اولديغنى او إنقلابِ عظيم گوسترديگندن، كائنات چارشوسنده أڭ فنا، أڭ پيس بر مال اولوب، او مالى صاتون آلمق دگل؛ هركس نفرت ايتمهسى حكمنه گچن كذب و يالانه، ألبته او إنقلابِ عظيمڭ صفِّ أوّلى اولان و فطرتلرنده أڭ رواجلى و مدارِ إفتخار شيلرى آلمق و أڭ قيمتلى و رواجلى ماللره مشترى اولمق فطرتنده بولونان صحابهلر؛ ألبته شبههسز بيلهرك أللرينى يالانه اوزاتمازلر. كذب ايله كنديلرينى ملوّث ايتمزلر. مسيلمۀِ كذّابه كنديلرينى بڭزهتهمزلر. بلكه بتون قوّتلريله و مَيلِ فطريلريله أڭ رواجلى مال و أڭ قيمتدار متاع و حقيقتلرڭ آناختارى محمّد عليه الصلاة والسلامڭ أعلاىِ علّيّينه چيقمهسنڭ باصامغى اولان صدق و طوغريلغه مشترى اولوب، ممكن اولديغى قدر صدقدن آيريلمامغه چاليشدقلرندن، علمِ حديثجه و علماءِ شريعت ايچنده بر قاعدۀِ مقرّره اولان «صحابهلر، دائما طوغرى سويلرلر. اونلردهكى روايت تزكيهيه محتاج دگل. پيغمبردن (عليه الصلاة والسلام) روايت ايتدكلرى حديثلر، بتون صحيحدر» دييه أهلِ شريعت و أهلِ حديثڭ إتّفاقنه قطعى حجّت، بو مذكور حقيقتدر.
ايشته عصرِ سعادتدهكى إنقلابِ عظيم، صدق ايله كذب، ايمان ايله كفر قدر بربرندن اوزاق ايكن زمان گچدكجه گله گله بربرينه ياقينلاشدى. و سياست پروپاغندهسى بعضًا يالانه زياده رواج ويردى. فنالق و يالانجيلق بر درجه ميدان آلدى. ايشته بو حقيقت ايچوندر كه، صحابهلره كيمسه يتيشهمز. يگرمى يدنجى سوزڭ ذيلى اولان صحابهلر حقّندهكى رسالهيه حواله ايدوب قيصه كسييورز.
أى بو جامعِ أمويدهكى قارداشلرم! و قرق أللى سنه صوڭره عالمِ إسلام مسجدِ كبيرندهكى درت يوز ميليون أهلِ ايمان اولان إخوانمز! نجات يالڭز صدقله، طوغريلقله اولور. «عروة الوثقى» صدقدر. يعنى، أڭ محكم و اونڭله باغلاناجق زنجير طوغريلقدر.
امّا مصلحت ايچون كذب ايسه، زمان اونى نسخ ايتمش. مصلحت و ضرورت ايچون بعض عالم «موقّت» فتواسى ويرمشلر. بو زمانده او فتوا ويريلمز. چونكه او قدر سوءِ إستعمال ايديلمش كه، يوز ضررى ايچنده بر منفعتى اولابيلير. اونڭ ايچون حكم مصلحته بنا ايديلمز.
مثلا: سفرده نمازى قصر ايتمهنڭ سببى، مشقّتدر. فقط علّت اولاماز. چونكه معيّن بر حدّى يوق. سوءِ إستعماله دوشهبيلير. بلكه علّت، يالڭز سفر اولابيلير. عينًا اويله ده، مصلحت دخى يالان سويلهمگه علّت اولاماز. چونكه معيّن بر حدّى يوق، سوءِ إستعماله مساعد بر باتاقلقدر. حُكمِ فتوا اوڭا بنا ايديلمز. اويله ايسه (اِمَّا الصِّدْقُ وَاِمَّا السُّكُوتُ) يعنى يول ايكيدر، اوچ دگلدر. يا طوغرى، يا يالان، يا سكوت دگلدر.
ايشته شيمدى بشرڭ اورتهدهكى دهشتلى يالانجيلغيله و تزويراتلريله أمنيتِ عموميهنڭ و روىِ زمين آسايشلرينڭ زير و زبر اولماسى كذبله و مصلحتڭ سوءِ إستعمالى ايله اولماسندن، ألبته او اوچنجى يولى قپاتمغه بشرى مجبور ايدييور و قطعى أمر ويرييور. يوقسه بو ياريم عصرده گوردكلرى عمومى حربلر و دهشتلى إنقلابلر و سقوطلر و تخريباتلر، باشلرينه بر قيامتى قوپارهجق.
أوت هر سويلهديگڭ طوغرى اولمالى، فقط هر طوغرىيى سويلهمك طوغرى دگل. بعضًا ضرر ويرسه سكوت ايتمك.. يوقسه يالانه هيچ فتوا يوق. هر سويلهديگڭ حق اولمالى، فقط هر حقّى سويلهمگه سنڭ حقّڭ يوق. چونكه خالص اولمازسه سوءِ تأثير ايدر؛ حق، حقسزلقده صرف اولور.