خطبۀِ شاميهنڭ ذيلنڭ ذيلى
(قرق ايكى (*) سنه أوّل دينى جريدهلرده نشر ايديلن سعيدڭ مقالهسيدر.)
ياشاسين شريعتِ غرّا
دينى جريده: ٣٧
٩٢ شباط ٤٢٣
مارت ١٩٠٩
أى مبعوثان!
___
(*): بو تاريخ ١٩٥١ سنهسنه عائددر
___
اوزونلغى ايله برابر غايت موجز بر تك جمله سويلهيهجگم. دقّت ايديڭز، زيرا إطنابنده ايجاز وار. شويله كه:
مشروطيت و قانونِ أساسى دينيلن عدالت و مشورت و قانونده جمعِ قوّت، بو عنوان ايله برابر أصل مالكِ حقيقى و صاحبِ عنوانِ محتشم (١) و مؤثّر و عدالتِ محضهيى متضمّن (٢) و نقطۀِ إستناديمزى تأمين ايدن (٣) و مشروطيتى بر أساسِ متينه إستناد ايتديرن (٤) و أوهام و شكوك صاحبنى ورطۀِ حيرتدن قورتاران (٥) و إستقبال و آخرتمزى تكفّل ايدن (٦) و منافعِ عموميه اولان حقوق اللّٰهى إذنسز تصرّفدن سزى تخليص ايدن (٧) و حياتِ ملّيهمزى محافظه ايدن (٨) و عموم أذهانى مانيهتيزمهلنديران (٩) و أجانبه قارشى متانتمزى و كمالمزى و موجوديتمزى گوسترن (١٠) و سزى مؤآخذۀِ دنيويه و اُخرويهدن قورتاران (١١) و مقصد و نتيجهده إتّحادِ عموميهيى تأسيس ايدن (١٢) و او إتّحادڭ روحى اولان أفكارِ عامّهيى توليد ايدن (١٣) و چوروك مساوئِ مدنيتى حدودِ حرّيت و مدنيتمزه گيرمكدن ياساق ايدن (١٤) و بزى آوروپا ديلنجيلگندن قورتاران (١٥) و گرى قالديغمز اوزون مسافۀِ ترقّيده (سرِّ إعجازه بناءً) بر زمانِ قصيرهده طىّ ايتديرن (١٦) و عرب و توران و ايران و ساميلرى توحيد ايدهرك آز زمانله بزه بر بيوك قيمت ويرن (١٧) و شخصِ معنوئِ حكومتى مسلمان گوسترن (١٨) و قانونِ أساسينڭ روحنى و اون برنجى مادّهيى محافظه ايله و سزى حنثِ يميندن قورتاران (١٩) و آوروپانڭ أسكى ظنِّ فاسدلرينى تكذيب ايدن (٢٠) محمّد عليه الصلاة والسلام خاتمِ أنبيا و شريعتڭ أبدى اولديغنى تصديق ايتديرن (٢١) و مخربِ مدنيت اولان دينسزلگه قارشى سد چكن (٢٢) و ظلمتِ تباينِ أفكار و تشتّتِ آرايى صفحۀِ نورانيسى ايله اورتهدن قالديران (٢٣) و عموم علما و واعظلرى إتّحاد و سعادتِ ملّته و إجراآتِ حكومتى مشروطۀِ مشروعهيه خادم ايدن (٢٤) و عدالتِ محضهسى مرحمتلى اولديغندن عناصرِ غيرِ مسلمهيى داها زياده تأليف و ربط ايدن (٢٥) و أڭ جبين و عامى آدمى أڭ جسور و أڭ خاص آدم گبى حسِّ حقيقئِ ترقّى و فداكارلق و حبِّ وطنله متحسّس ايدن (٢٦) و هادمِ مدنيت (*) اولان سفاهت و إسرافات و حوائجِ غيرِ ضروريهدن بزى خلاص ايدن (٢٧) و محافظۀِ آخرتله برابر إعمارِ دنيا ايتمكله سعيه نشاط ويرن (٢٨) و حياتِ مدنيت اولان أخلاقِ حسنه و حسّياتِ علويهنڭ دستورلرينى اوگرتن (٢٩) و هر بريڭزى أى مبعوثلر أللى بيڭ كيشينڭ تقاضاسنى يعنى حقلرينى سزدن دعوا ايتمهلرينى حقّڭزده تبرئه ايدن (٣٠) و سزى إجماعِ أمّته كوچك بر مثالِ مشروع گوسترن (٣١) و حسنِ نيّته بناءً أعمالڭزى عبادت گبى ايتديرن (٣٢) و اوچ يوز ميليون مسلمانڭ حياتِ معنويهسنه سوءِ قصد و جنايتدن سزى تخليص ايدن (٣٣) اول شريعتِ غرّا عنوانيله گوسترسهڭز و حكملريڭزه مأخذ ايدينسهڭز و دستورلرينى تطبيق ايتسهڭز، عجبا بو قدر فوائدى ايله برابر نه گبى شى غائب ايدهجكسڭز؟ والسلام.
___
(*): هادمِ مدنيت: مدنيتى ييقيجى.
___
ياشاسين شريعتِ غرّا!..
سعيد النورسى
❊ ❊ ❊
ياشاسين شريعتِ أحمدى (عصم)
دينى جريده نو: ٧٧
٥/مارت/١٩٠٩
١٨/مارت/١٩٠٩
شريعتِ غرّا، كلامِ أزليدن گلديگندن أبده گيدهجكدر. نفسِ أمّارهنڭ إستبدادِ رذيلهسندن سلامتمز، إسلاميته إستناد ايلهدر. او حبل المتينه تمسّك ايلهدر. و حقلى حرّيتدن حقّيله إستفاده ايتمك، ايماندن إستمداد ايلهدر. زيرا صانعِ عالمه حقّيله عبد و خدمتكار اولانڭ، خلقه عبوديته تنزّل ايتمهمسى گركدر. هركس كندى عالمنده بر قوماندان اولديغندن عالمِ أصغرنده جهادِ أكبر ايله مكلّفدر. و أخلاقِ أحمديه (عليه الصلاة والسلام) ايله تخلّق و سنّتِ نبويهيى إحيا ايله موظّفدر.
أى أولياءِ امور! توفيق ايسترسهڭز، قوانينِ عادت اللّٰهه توفيقِ حركت ايديڭز. يوقسه توفيقسزلك ايله جوابِ ردّ آلاجقسڭز. زيرا معروف عموم أنبيانڭ ممالكِ إسلاميه و عثمانيهدن ظهورى، قدرِ إلٰهينڭ بر إشارت و رمزيدر كه؛ بو مملكت إنسانلرينڭ ماكينۀِ تكمّلاتنڭ بخارى ديانتدر. و بو آسيا و آفريقا تارلاسنڭ و روم ايلى بوستانينڭ چيچكلرى، ضياىِ إسلاميت ايله نشو و نما بولاجقدر.
دنيا ايچون دين فدا اولونماز. گبرمش إستبدادى محافظه ايچون، وقتيله مسائلِ شريعت رشوت ويريليردى. دينڭ مسئلهلرى ترك و فدا ايديلمهسندن، ضرردن باشقه نه فائدهسى گورولدى؟ ملّتڭ قلب خستهلغى ضعفِ ديانتدر. بونى تقويه ايله صحّت بولابيلير.
بزم جماعتمزڭ مشربى: محبّته محبّت و خصومته خصومتدر. يعنى بَيْن الإسلام محبّته إمداد و خصومت عسكرينى بوزمقدر.
مسلگمز ايسه، أخلاقِ أحمديه (عليه الصلاة والسلام) ايله تخلّق و سنّتِ پيغمبرىيى إحيا ايتمكدر. و رهبريمز شريعتِ غرّا و قلنجمز ده براهينِ قاطعه و مقصديمز إعلاىِ كلمة اللّٰهدر. جماعتمزه هر بر مؤمن معنًا منتسبدر. صورةً إنتساب ايسه، سنّتِ نبويهيى كندى عالمنده إحيايه عزمِ قطعى ايلهدر. أڭ أوّل مرشدِ عمومى اولان علما و مشايخ و طلبهيى، شريعت نامنه إتّحاده دعوت ايدرز.
سعيد النورسى
❊ ❊ ❊
إخطارِ مخصوص
غزتهجى دينيلن خطباءِ عمومى، ايكى قياسِ فاسدله ملّتى باتاقلغه دوشورتمشدر.
برنجيسى: ولاياتى، إستانبوله قياس ايدهرك... حالبوكه ألفبايى اوقوميان چوجقلره فلسفه درسى ويريلسه سطحى اولور.
ايكنجيسى: إستانبولى آوروپايه قياس ايتمشلر. حالبوكه بر أركك، قادينڭ قامتندن إستحسان ايتديگى لباسى گيينسه مسخره و رذيل اولور.
سعيد النورسى
❊ ❊ ❊
حقيقت
دينى جريده: ٠٧
٢٦/شباط/١٣٢٤
مارت/١٩٠٩
بز قالوا بلادن جمعيتِ محمّديده (عليه الصلاة والسلام) داخلز. جهت الوحدتِ إتّحادمز توحيددر. پيمان و يمينمز ايماندر. مادام كه موحّديز، متّحديز. هر بر مؤمن إعلاىِ كلمة الله ايله مكلّفدر. بو زمانده أڭ بيوك سببى، مادّةً ترقّى ايتمكدر. زيرا أجنبيلر فنون و صنايع سلاحيله بزى إستبدادِ معنويلرى آلتنده أزييورلر. بز ده، فن و صنعت سلاحيله إعلاىِ كلمة اللّٰهڭ أڭ مدهش دشمنى اولان جهل و فقر و إختلافِ أفكاره جهاد ايدهجگز.
امّا جهادِ خارجىيى شريعتِ غرّانڭ براهينِ قاطعهسنڭ ألماس قلنجلرينه حواله ايدهجگز. زيرا مدنيلره غلبه چالمق إقناع ايلهدر، سوز آڭلاميان وحشيلر گبى إجبار ايله دگلدر. بز محبّت فدائيلرىيز، خصومته وقتمز يوقدر. جمهوريت كه، (حاشيه) عدالت و مشورت و قانونده إنحصارِ قوّتدن عبارتدر. اون اوچ عصر أوّل شريعتِ غرّا تأسّس ايتديگندن، أحكامده آوروپايه ديلنجيلك ايتمك، دينِ إسلامه بيوك بر جنايتدر و شماله متوجّهًا نماز قيلمق گبيدر. قوّت قانونده اولمالى. يوقسه إستبداد توزيع اولونمش اولور. (اِنَّ اللّٰهَ هُوَ الْقَوِىُّ الْمَتٖينُ) حاكم و آمرِ وجدانى اولمالى. او ده معرفتِ تام و مدنيتِ عام وياخود دينِ إسلام ناميله اولمالى. يوقسه إستبداد دائما حكمفرما اولاجقدر.
___
(حاشيه): او زمان «مشروطيت»، شيمدى او كلمه يرينه «جمهوريت» قونولمش.
___
إتّفاق هدادهدر، هوا و هوسده دگل.
إنسانلر حرّ اولديلر امّا ينه عبد اللهدرلر. هر شى حرّ اولدى، شريعت ده حرّدر، مشروطيت ده. مسائلِ شريعتى رشوت ويرميهجگز. باشقهسنڭ قصورى، إنسانڭ قصورينه سند و عذر اولاماز.
يأس، مانعِ هركمالدر. «نهمه لازم، باشقهسى دوشونسون» إستبدادڭ يادگاريدر. بو جملهلرڭ مابيْنڭى ربط ايدهجك اولان مقدّماتى، توركجه بيلمديگم ايچون مطالعينڭ فكرلرينه حواله ايدييورم.
سعيد النورسى
❊ ❊ ❊
صداىِ حقيقت
٢٧ مارت ١٩٠٩
طريقِ محمّدى (عليه الصلاة والسلام) شبهه و حيلهدن منزّه اولديغندن، شبهه و حيلهيى ايما ايدن گيزلهمكدن ده مستغنيدر. هم او درجه عظيم و گنيش و محيط بر حقيقت، باخصوص بو زمان أهلنه قارشى هيچ بر جهتله صاقلانماز. بحرِ عمّان ناصل بر دستيده صاقلانهجق؟
تكرارًا سويلهيورم كه: إتّحادِ إسلام حقيقتنده اولان إتّحادِ محمّدينڭ (عليه الصلاة والسلام) جهتِ وحدتى توحيدِ إلٰهيدر. پيمان و يمينى ده ايماندر. أنجمن و جمعيتلرى، مساجد و مدارس و زوايادر. منتسبينى عموم مؤمنلردر. نظامنامهسى سننِ أحمديهدر (عليه الصلاة والسلام). قانونى، أوامر و نواهئِ شرعيهدر. بو إتّحاد، عادتدن دگل، عبادتدر.
إخفا و خوف ريادندر. فرضده ريا يوقدر. بو زمانڭ أڭ بيوك فرض وظيفهسى، إتّحادِ إسلامدر. إتّحادڭ هدف و مقصدى؛ او قدر اوزون، منشعب و محيط و مراكز و معابدِ إسلاميهيى بربرينه ربط اتديرن بر سلسلۀِ نورانىيى إهتزازه گتيرمكله، اونڭله مربوط اولانلرى ايقاظ و طريقِ ترقّىيه بر خٰواهش و أمرِ وجدانى ايله سَوق ايتمكدر.
بو إتّحادڭ مشربى، محبّتدر. خصومتى ايسه، جهالت و ضرورت و نفاقهدر. غيرِ مسلملر أمين اولسونلر كه بو إتّحادمز، بو اوچ صفته هجومدر. غيرِ مسلمه قارشى حركتمز إقناعدر. زيرا اونلرى مدنى بيليرز. و إسلاميتى محبوب و علوى گوسترمكدر. زيرا اونلرى مُنْصِف ظن ايدييورز. لااباليلر ايى بيلسينلر كه، دينسزلكله كنديلرينى هيچ بر أجنبيه سَوْديرهمزلر. زيرا مسلكسزلكلرينى گوسترمش اولورلر. مسلكسزلك، آنارشيلك سَويلمز. و بو إتّحاده تحقيق ايله داخل اولانلر، اونلرى تقليد ايدوب چيقمازلر. إتّحادِ محمّدى (عليه الصلاة والسلام) اولان إتّحادِ إسلامڭ أفكار و مسلك و حقيقتنى أفكارِ عموميهيه عرض ايدرز. كيمڭ بر إعتراضى وارسه ايتسين، جوابه حاضرز.
﴿جُمْلَه شٖيرَانِ جِهَانْ بَسْتَۀِ اِينْ سِلْسِلَه اَنْد
رُوبَه اَزْ حِيلَه چٖه سَانْ بِگُسَلَدْ اِينْ سِلْسِلَه رَا﴾
سعيد النورسى
❊ ❊ ❊
نشر ايتديگم فهرستۀِ مقاصددن
ترك ايتديگم بر فقرهدر. شويله كه:
ظاهرًا خارجدن جريان ايدن معارفِ جديدهنڭ بر مجراسى ده، بر قسم أهلِ مدرسه اولمالى. تا غلّ و غشدن تصفّى ايتسين.
زيرا بولانيقلغيله باشقه مجرادن تعفّن ايله گلمش و عطالت باتاقلغندن نشئت و إستبداد سمومى ايله تنفّس ايدن، ظلم تضييقى ايله أزيلن أفكاره بو متعفّن صو، بعض عكس العمل ياپديغڭدن، مصفاتِ شريعت ايله سوزديرمك ضروريدر. بو ده أهلِ مدرسهنڭ دوشِ همّتنه محوَّلدر.
﴿وَالسَّلَامُ عَلٰى مَنِ اتَّبَعَ الْهُدٰى﴾
سعيد النورسى
❊ ❊ ❊
ردّ الأوهام
٣١ مارت ١٩٠٩
إتّحادِ محمّدى (عليه الصلاة والسلام) جماعتنه إسناد ايتدكلرى طوقوز أوهامِ فاسدهيى ردّ ايدهجگم.
برنجى وهم: بويله نازك بر زمانده دين مسئلهسنى اورتهيه آتمق مناسب گورولمييور.
الجواب: بز دينى سَورز. دنيايى ده ينه دين ايچون سَورز.
﴿لَا خَيْرَ فِى الدُّنْيَا بِلَا دٖينٍ﴾
ثانيًا: مادام كه مشروطيتده حاكميت ملّتدهدر. موجوديتِ ملّتى گوسترمك لازمدر. ملّتمز ده يالڭز إسلاميتدر. زيرا عرب، تورك، كرد، آرناود، چركز و لازلرڭ أڭ قوّتلى و حقيقتلى روابط و ملّيتلرى، إسلاميتدن باشقه بر شى دگلدر. ناصلكه آز إهمال ايله طوائفِ ملوك تمللرى آتيلمقده و اون اوچ عصر أوّل ئولمش اولان عصبيتِ جاهليهيى إحيا ايله فتنه ايقاظ اولونمقدهدر. و اولدى گوردك...
ايكنجى وهم: بو عنوان تخصيصيله، منتسب اولميانلرى وهم و تلاشه دوشورييور؟
الجواب: أوّل ده سويلهمشدم. يا مطالعه اولونمامش ويا سوءِ تفهّمه اوغرامش اولديغندن تكرارينه مجبور اولدم. شويله كه:
إتّحادِ إسلام اولان إتّحادِ محمّدى (عليه الصلاة والسلام) ديديگمز وقت، عموم مؤمنلرڭ مابيْننده بِالقوّه ويا بِالفعل ثابت اولان إتّحاد مراددر. يوقسه إستانبول و آناطوليدهكى جماعت مراد دگلدر. امّا بر قطره صو ده، صدور. بو عنواندن تخصيص چيقماز. تعريفِ حقيقيسى شويلهدر:
أساس تملى، شرقدن غربه جنوبدن شماله ممتد و مركزى حرمينِ شريفَيْن و جهتِ وحدتى توحيدِ إلٰهى.. پيمان و يمينى ايمان.. نظامنامهسى، سنّتِ أحمديه (عليه الصلاة والسلام).. قانوننامهسى، أوامر و نواهئِ شرعيه.. قلوب و أنجمنلرى، عموم مدارس، مساجد و زوايا.. او جماعتڭ إلَى الأبد و مخلّد ناشرِ أفكارى، عموم كتبِ إسلاميه و هر وقت ناشرِ أفكارى باشده قرآن و تفسيرلرى (و بو زمانده بر تفسيرى، رسالۀِ نور) و إعلاىِ كلمة اللّٰهى هدف و مقصد ايدن عموم دينى و مستقيم جرائددر. منتسبينى، عموم مؤمنلردر. رئيسى ده فخرِ عالمدر (عليه الصلاة والسلام).
شيمدى ايستديگمز نقطه، مؤمنلرڭ توجّهلرى و تيقّظلريدر. توجّهِ عمومينڭ تأثيرى إنكار ايديلمز. إتّحادڭ هدفى و مقصدى إعلاىِ كلمة الله و مسلگى ده كندى نفسيله جهادِ أكبر و باشقهلرينى إرشاددر. بو مبارك هيئتڭ يوزده طقسان طوقوز همّتى سياست دگلدر. سياستڭ غيرى اولان حسنِ أخلاق و إستقامت و سائره گبى مقاصدِ مشروعهيه مصروفدر. زيرا بو وظيفهيه متوجّه اولان جمعيتلر پك آز، قيمت و أهمّيتى ايسه پك چوقدر. آنجق يوزده برى، سياسيّونى إرشاد طريقيله سياسته تعلّق ايدهجكدر. قلنجلرى، براهينِ قطعيهدر. مشربلرى ده محبّت اولديغى گبى، بَيْن المؤمنين اخوّت چكردگنده مندمج اولان محبّته شجرۀِ طوبٰى گبى نشو و نما ويرمكدر.
بشنجى وهم: أجنبيلرڭ بوندن توحّش ايتمك إحتمالى وار؟
الجواب: بو إحتماله إحتمال ويرنلر متوحّشدر. زيرا مركزِ تعصّبلرنده إسلاميتڭ علويتنه دائر قونفرانسلرله (حاشيه) تقديس ايتمهلرى بو إحتمالى ردّ ايدر. هم ده دشمنلريمز اونلر دگل؛ أصل بزى بو قدر دوشوروب إعلاىِ كلمة اللّٰهه مانع اولان و جهالت نتيجهسى اولان مخالفتِ شريعتدر. و ضرورت و اونڭ ثمرهسى اولان سوءِ أخلاق و حركتدر و إختلاف و اونڭ محصولى اولان أغراض و نفاقدر كه، إتّحادمز بو اوچ إنصافسز دشمنه هجومدر.
___
(حاشيه): بيسمارق و مستر قارلايل گبيلرڭ معلوم بياناتلرينه إشارت ايدر.
___
امّا أجنبيلرڭ وحشى اولدقلرى قرونِ وسطاده؛ إسلاميت، وحشته قارشى خصومت و تعصّبه مجبور اولديغى حالده، عدالت و إعتدالنى محافظه ايتمش. هيچ بر وقت أنگيزيسيون گبى ايتمهمش. و زمانِ مدنيتده أجنبيلر مدنى و قوّتلى اولدقلرندن، ضررلى اولان خصومت و تعصّب زائل اولمشدر. زيرا دين نقطۀِ نظرندن مدنيلره غلبه چالمق إقناع ايلهدر، إجبار ايله دگلدر. و إسلاميتى، محبوب و علوى اولديغنى، أوامرينه إمتثالاً أفعال و أخلاق ايله گوسترمك ايلهدر. إجبار و خصومت، وحشيلرڭ وحشتنه قارشيدر.
آلتنجى وهم: بعضلرى، «سنّتِ نبويهيى هدفِ مقصد ايدن إتّحادِ إسلام، حرّيتى تحديد ايدر و لوازمِ مدنيهيه منافيدر» دييورلر.
الجواب: أصل مؤمن، حقّيله حرّدر. صانعِ عالمه عبد و خدمتكار اولان، خلقه تذلّله تنزّل ايتمهمك گركدر. ديمك نه قدر ايمانه قوّت ويريلسه، حرّيت ده او قدر قوّت بولور.
امّا حرّيتِ مطلق ايسه، وحشتِ مطلقهدر، بلكه حيوانلقدر. تحديدِ حرّيت دخى، إنسانيت نقطۀِ نظرندن ضروريدر.
ثالثًا: بعض سفيه و لااباليلر حرّ ياشامق ايستهمدكلرندن، نفسِ أمّارهنڭ أسارتِ رذيلهسى آلتنه گيرمك ايستهيورلر.
الحاصل: شريعت دائرهسندن خارج اولان حرّيت، يا إستبداد ويا أسارتِ نفس ويا جاناوارجهسنه حيوانلق ويا وحشتدر. بويله لااباليلر و زنديقلر ايى بيلسينلر كه، دينسزلكله و سفاهتله صاحبِ وجدان هيچ بر أجنبيه كنديلرينى سَوْديرهمزلر و بڭزهتهمزلر. زيرا مسلكسز و سفيه سَويلمز. و بر قادينه ياقيشير (إستحسان ايتديگى) لباسى أركك گيسه مسخره اولور.
يدنجى وهم: إتّحادِ إسلام جماعتى، سائر جمعيتِ دينيه ايله شقّ العصادر. رقابت و منافراتى إنتاج ايدر.
الجواب: أوّلا امورِ اُخرويهده حسد و مزاحمت و مناقشه اولماديغندن بو جمعيتلردن هانگيسى مناقشهيه، رقابته قالقشسه عبادتده ريا و نفاق ايتمش گبيدر.
ثانيًا: محبّتِ دين سائقهسيله تشكّل ايدن جماعتلرڭ ايكى شرط ايله عمومنى تبريك و اونلرله إتّحاد ايدرز.
برنجى شرط: حرّيتِ شرعيهيى و آسايشى محافظه ايتمكدر.
ايكنجى شرط: محبّت اوزرنده حركت ايتمك، باشقه جمعيته لكه سورمكله كنديسنه قيمت ويرمگه چاليشمامق. برنده خطا بولونسه، مفتئِ اُمّت جمعيتِ علمايه حواله ايتمكدر.
ثالثًا: إعلاىِ كلمة اللّٰهى هدفِ مقصد ايدن جماعت، هيچ بر غرضه واسطه اولاماز. ايسترسه ده موفّق اولاماز. زيرا نفاقدر. حقّڭ خاطرى عاليدر، هيچ بر شيئه فدا اولونماز. ناصل ثريّا ييلديزلرى سوپورگه اولور ويا اوزوم صالقيمى گبى يهنيلير؟ شمسِ حقيقته «پوف، اوف» ايدن، ديوانهلگڭى إعلان ايدر.
أى دينى جريدهلر! مقصديمز: دينى جماعتلر مقصدده إتّحاد ايتمليدرلر. مسالكده و مشربلرده إتّحاد ممكن اولماديغى گبى، جائز ده دگلدر. زيرا تقليد يولنى آچار و «نهمه لازم، باشقهسى دوشونسون» سوزينى ده سويلتديرر.
سكزنجى وهم: أهلِ إتّحادِ إسلام اولان بورادهكى جماعته، معنًا گبى صورةً ده إنتساب ايدنلرڭ أكثريسى عوام، بر قسمى ده مجهول الحال اولديغندن، فتنه و إختلافى ايما ايدييور.
الجواب: بلكه أغراضه عدمِ مساعدهسنه بناءًدر. هم ده مادام مقصدى، إتّحاد و إعلاىِ كلمة اللّٰهدر. تشبّثات و حركاتى ده عبادتدر. عبادت جامعنده شاه و گدا بردر. مساوات حقيقى دستوردر. إمتياز يوقدر. زيرا أڭ أكرم، أڭ متّقيدر. و أڭ متّقى، أڭ متواضعدر. بناءً عليه معنًا أصل حقيقتِ إتّحاده إنتساب ايله برابر صورةً اونڭ نمونهسى اولان بو اُخروى و صِرف دينى جماعته إنتساب ايله تشرّف ايدهجك، يوقسه شرف ويرميهجكدر. بر قطره، بحرِ عُمّانى تزييد ايدهمز. هم ده بر گناهِ كبيره ايله ايماندن چيقمديغى گبى، شمس غربدن طلوع ايتمديگندن توبهنڭ قپوسى ده آچيقدر. بر دستى متنجّس صو، بر دڭزى تنجيس ايتمديگى گبى، كندى ده تميزلنديگندن شيمدى بو نمونۀِ إتّحاده إنتساب ايدن آدمه شرطمز اولان سنّتِ نبويهيى (عليه الصلاة والسلام) إحيا و أوامرينه إمتثال و نواهيدن إجتناب و آسايشه ايليشمهمك (ألندن گلسه) عزمِ قطعى ايله داخل اولان بعض مجهول الحال اولانلر بو حقيقتِ عاليهيى لكهدار ايتمز. زيرا كندى لكهدار اولسه ده، ايمانى مقدّسدر. رابطه ده ايماندر. بو عنوانِ مقدّسه بويله بهانه ايله لكه سورمك؛ إسلاميتڭ قيمت و علويتنى بيلمهمكله برابر، كندينى أحمق الناس إعلان ايتمكدر. نمونۀِ إتّحاد اولان جماعتمزه (سائر جمعياتِ دنيويهيه قياسًا) لكه سورمهيى، تعريض ايتمهيى جميع قوّتمزله ردّ ايدرز. إستفسار طريقيله بر إعتراضلرى اولورسه جوابه حاضرز. ايشته ميدان...
بنم داخل اولديغم جماعت، بوراده تفصيل ايتديگم إتّحادِ إسلامدر. يوقسه معترضلرڭ باطل توهّم ايتدكلرى جمعيتِ متخيّله دگلدر. بو دينى هيئت أفرادى، شرقده اولسه، غربده اولسه، جنوبده اولسه، شمالده اولسه برابرز.
سؤال: سن إمضاڭى بعضًا بديع الزمان يازييورسڭ. لقب مدحى ايما ايدر؟
جواب: مدح ايچون دگلدر. قصورلريمى، سندِ عذريمى، معذرتمى بو عنوان ايله إبراز ايدييورم. زيرا بديع، غريب ديمكدر. بنم أخلاقم صورتم گبى، اُسلوبِ بيانم ألبسهم گبى غريبدر، مخالفدر. گورهنكله رواجده اولان محاكمات و أساليبى، بنم اُسلوب و محاكماتمله مقياس و محنك إعتبار ياپمامايى بو عنوانڭ لسانِ حاليله رجا ايدييورم. هم ده مراديم بديع، عجيب ديمكدر.
﴿اِلَىَّ لَعَمْرٖى قَصْدُ كُلِّ عَجٖيبَةٍ
كَاَنّٖى عَجٖيبٌ فٖى عُيُونِ الْعَجَائِبِ﴾
ماصدق اولدم. بر مثالى بودر: بر سنهدر إستانبوله گلدم، يوز سنهنڭ إنقلاباتنى گوردم.
﴿وَالسَّلَامُ عَلٰى مَنِ اتَّبَعَ الْهُدٰى﴾
جميع مؤمنلرڭ لسانيله إنسانلرڭ عددى قدر ديرز: ياشاسين شريعتِ أحمدى!.. (عليه الصلاة والسلام).
بديع الزمان
سعيد النورسى
❊ ❊ ❊
برادرم باش محرّر بگه!
أديبلر أدبلى اولماليدرلر. هم ده أدبِ إسلاميه ايله متأدّب اولماليدرلر. مطبوعات نظامنامهسنى وجدانلرندهكى حسِّ ديانت تنظيم ايتسين. زيرا بو إنقلابِ شرعيه گوستردى كه، وجدانلرده حكمفرما، نور النور اولان حميتِ إسلاميهدر. هم ده آڭلاشيلدى كه، إتّحادِ إسلام عموم عسكره و عموم أهلِ ايمانه شاملدر. خارج كيمسه يوقدر.
سعيد النورسى
❊ ❊ ❊
خطبۀِ شاميهنڭ برنجى ذيلنڭ ذيلندن صوڭ پارچهدر
(٣١ مارت حادثهسنده عصيان ايدن سكز طابورى إطاعته گتيرن و مصيبتى يوزدن بره اينديرن ايكى درسدر كه، دينى جريدهلرده ١٣٢٥ ده نشر ايديلمشدر. ميلادى: ١٩٠٩)
قهرمان عسكرلريمزه
أى شانلى عساكرِ موحّدين! و أى بو ملّتِ مظلومهيى و مقدّس إسلاميتى ايكى دفعه بيوك ورطهدن تخليص ايدن محتشم قهرمانلر!..
جمال و كمالڭز، إنتظام و إنضباطدر. بونى ده حقّيله أڭ مشوّش بر زمانده گوسترديڭز. و حياتڭز و قوّتڭز إطاعتدر. بو مزيتِ مقدّسهيى أڭ اوفاق آمريڭزه قارشى بيله إرائه ايديڭز. اوتوز ميليون عثمانلى و اوچ يوز ميليون إسلامڭ ناموسى آرتيق سزڭ إطاعتڭزه باغليدر. سنجاق و توحيدِ إلٰهى سزڭ يدِ شجاعتڭزدهدر. سزڭ او مبارك أليڭزڭ قوّتى ده إطاعتدر. سزڭ ضابطلريڭز، مشفق پدرلريڭزدر. قرآن و حديث و حكمت و تجربه ايله ثابتدر كه: حقلى آمره إطاعت فرضدر.
معلومڭزدر كه، اوتوز اوچ ميليون نفوس يوز سنه ظرفنده بويله ايكى إنقلابى ياپامدى. سزڭ او إطاعتدن نشئت ايدن حقيقى قوّتڭز، عموم ملّتِ إسلاميهيى مديونِ شكران ايتدى. بو شرفى حقّيله تأييد ايتمك، ضابطلريڭزه إطاعتلهدر. إسلاميتڭ ناموسى ده او إطاعتدهدر. بيلييورم كه، مشفق پدرلريڭز اولان ضابطلريڭزى مسئول ايتمهمك ايچون ايشه قاريشديرمديڭز. شيمدى ايسه ايش بيتدى. ضابطلريڭزڭ آغوشِ شفقتلرينه آتيلڭز. شريعتِ غرّا بويله أمر ايدييور. زيرا ضابطلر اولو الأمردرلر. وطن و ملّت منفعتنده، خصوصًا نظامِ عسكريده اولو الأمره إطاعت فرضدر. شريعتِ محمّدينڭ (عليه الصلاة والسلام) محافظهسى ده إطاعت ايلهدر.
سعيد النورسى
❊ ❊ ❊
عساكره خطاب
دينى جريده نومرو: ١١٠
٣٠ نيسان ١٩٠٩
أى عساكرِ موحّدين! فخرِ عالمڭ (عليه الصلاة والسلام) فرماننى سزه تبليغ ايدييورم كه، شريعت دائرهسنده اولو الأمره إطاعت فرضدر. اولو الأمريڭز و استادلرڭز ضابطلريڭزدر. عسكرلك اوجاغى جسيم و منتظم بر فابريقهيه بڭزر. چرخلرڭ برى إنتظام و إطاعتده سركشلك ايتمكله، بتون فابريقه هرج و مرج اولور.
سزڭ او منتظم و قوّتلى فابريقۀِ عسكريهڭز، اوتوز ميليون عثمانلى و اوچ يوز ميليون نفوسِ إسلاميهنڭ نقطۀِ إستنادى و معدنِ إستمداديدر.
سزڭ ايكى مدهش إستبدادى قانسز و دفعةً ئولديرمڭز خارق العاده اولديغندن و شريعتِ غرّانڭ ايكى معجزۀِ غرّاسنى إظهار ايتديگڭزدن، ضعيف العقيده اولانلره حميتِ إسلاميهنڭ قوّتنى و شريعتڭ قدسيتنى ايكى برهان ايله إظهار أيلهديڭز. بو ايكى إنقلابڭ بهاسنه بيڭلر شهيد ويرسه ايدك، اوجوز صاياجقدق. لٰكن إطاعتڭزدن بيڭده بر جزئى فدا اولونسه، بزه پك چوق بهالى دوشر. زيرا إطاعتڭزڭ تناقصى، عقدۀِ حياتيه ويا حرارتِ غريزيهنڭ تناقصى گبى موتى إنتاج ايدر.
تاريخِ عالم سراپا شهادت ايدييور كه، عسكر نفراتنڭ سياسته مداخلهلرى، دولتجه و ملّتجه مدهش ضررلرى إنتاج ايتمشدر. ألبته حميتِ إسلاميهڭز، بويله سزى عهدهڭزده اولان حياتِ إسلاميهيه ضرر ويرهجك نقطهلردن منع ايدهجكدر. سياستى دوشوننلر، سزڭ قوّۀِ مفكّرهڭز حكمنده اولان ضابطلريڭز و اولو الأمرلريڭزدر.
بعضًا ضرر ظن ايتديگڭز شى، سياستًا بيوك ضررى دفع ايتديگى ايچون عينِ مصلحت اولديغندن، ضابطلريڭز تجربهلرى حسبيله گورويور و سزه أمر ويرييور. سزده ده تردّد جائز دگلدر. أفعالِ خصوصيۀِ نامشروعه، صنعتدهكى مهارت و حذاقته منافى دگلدر و صنعتى منفور ايتمز. ناصلكه بر طبيبِ حاذق و بر مهندسِ ماهرڭ نامشروع حركاتى ايچون، اونلرڭ طب و هندسهلرندن مانعِ إستفاده اولاماز. كذالك فنِّ حربده تجربهلى و او صنعتده ماهر و حميتِ إسلاميه ايله منوّر الفكر ضابطلريڭزڭ بعضيلرينڭ جزئى نامشروع حركاتى ايچون، إطاعتڭزه خلل ويرمهيڭز. زيرا فنِّ حرب، مهمّ بر صنعتدر. هم ده سزڭ قيامڭز؛ شريعتِ غرّا، (يدِ بيضاءِ موسى گبى) سائر سببِ تفرقه و تشتّتِ أفكار اولان جمعيتلرى بلع ايتدى. ساحرلرى ده سجدهيه مجبور أيلدى. حركاتڭز بو إنقلابده علاج گبى ايدى كه، فضله اولسه زهره منقلب اولور. و حياتِ إسلاميهيى فنا بر خستهلغه هدف ايدر. هم ده همّتڭزله بزدهكى إستبداد شيمديلك محو اولدى. لٰكن ترقّيلر ايچون آوروپانڭ إستبدادِ معنويسى آلتندهيز. نهايت درجهده إحتياط و إعتدال لازمدر.
ياشاسين شريعتِ غرّا!.. ياشاسين عسكرلر!..
سعيد النورسى
❊ ❊ ❊
جمعيتلره إخطارِ مهمّ
شيمدى جمعيتمز بر حكومتِ مشروطۀِ مشروعهدر. حكومت ايچنده حكومتڭ ضررى گورولدى. سويۀِ عرفان بر اولماديغندن فرقهلرده خصومت، تعصّب و طرفدارلق إنتاج ايدر. طبيعى او قوّتى إستعمال ايله سياسته قاريشهجق و عمومى إدارهده هركسجه لذّتلى اولان تحكّماتى ياپاجق صاحبِ أغراضه مساعد بر زمين اولور. بناءً عليه بزدهكى فرقهلرڭ شيمديكى حال ايله دوامى غايت مضردر. لٰكن بر شركتده ويا منوّر الفكر و بىطرف مابيْننده تنقيداتِ سياستدن ويا أهلِ علم مابيْننده نصيحت و إرشاددن منفعت اولابيلير. شيمدى حكومتِ مشروعهمز أصل بيوك جمعيتدر.
بديع الزمان
سعيد النورسى
❊ ❊ ❊
صداىِ وجدان
إتّحادِ محمّدى (عصم) إستيلا ايتدى. عمومڭ حقّيدر. تخصيص قبول ايتمز. بو إسم شاقهيى قبول ايتمز. او جوهرِ عظيمڭ جزئى بر تجلّيسيله سيّالۀِ برقيه گبى بتون إسلامى إهتزازه و عالمى زلزلهيه گتيردى. طبيعتِ إستعدادِ عالم، شيمدى تمامًا تجلّيسنه تحمّل ايدهمز. تدريج لازمدر. شيمدى جوهرِ عالىيى مقدّس بر يره حفظ ايتملىيز. بونڭ بر مقدّمهسى اولارق، مخصوص فرقهلر خادمِ شريعت عنواننى طاشييهبيليرلر.
إتّحادِ إسلام جمعيتى أعضاسندن
سعيد النورسى
❊ ❊ ❊
(بديع الزمان سعيد النورسىنڭ إعلانِ حرّيتڭ اوچنجى گوننده إرتجالاً سويلهديگى و صوڭره سلانيكده ميدانِ حرّيتده تكرار ايتديگى و او زمانڭ جريدهلرنده نشر ايتدكلرى نطقنڭ صورتيدر.)
طاغ ميوهسى آجى ده اولسه دوادر
امّا هضمى ثقيلدر
إعتذار: برنجى تجربه، برنجى إنشا، برنجى نطق اولديغندن نقصان و إغلاقى طبيعيدر. معذور طوتارسهڭز تشكّر ايدرم، طوتماز ايسهڭز معذورسڭز. زيرا حرّيت وار. قاپلان پوستنه بڭزهين ألبسهم گبى، اُسلوبِ بيانم ده زمانڭ موداسنه مخالفدر. زيرا آلاتورقه ترزيلك بيلمييورم، تا بو معانىيه لباس كسهيم و دوگمه ياپهيم. رجا ايدييورم، نطقمى خيالخانهڭزه گيرمكدن ياساق ايتمهيڭز. هم بنم گبى خيالدن قپو آچڭ، تا كه قلبه گيرسين. زيرا حميت و ديانت و غيرتڭزله ايشلر وار. مذاكره ايدهجكلر، قلبڭ قراڭلق كوشهلرندن ايشيق ياقهجقلر.
❊ ❊ ❊
حرّيته خطاب
أى حرّيتِ شرعى! اويله مدهش و فقط گوزل و مژدهلى بر صدا ايله چاغيرييورسڭ، بنم گبى بر كردى طبقاتِ غفلت آلتنده ياتمشكن اويانديرييورسڭ. سن اولماسهيدڭ، بن و عموم ملّت، زندانِ أسارتده قالاجقدق. سنى عمرِ أبدى ايله تبشير ايدييورم. أگر عين الحياتِ شريعتى منبعِ حيات ياپسهڭ و او جنّتده نشو و نما بولسهڭ، بو ملّتِ مظلومهنڭ ده أسكى زمانه نسبةً بيڭ درجه ترقّى ايدهجگنى مژده ويرييورم. أگر حقّيله سنى رهبر ايتسه، أغراضِ شخصى و فكرِ إنتقام ايله سزى لكهدار ايتمزسه...
العظمة لله و المِنَّتُ له كه بزى قبرِ وحشت و إستبداددن إخراج و جنّتِ إتّحاد و محبّتِ ملّيهيه دعوت ايتدى.
يا ربّ! نه سعادتلى بر قيامت و نه گوزل بر حشر كه، والبعث بَعْدَ الْموت حقيقتنڭ كوچك بر مثالنى بو زمان بزه تصوير ايدييور. شويله كه:
آسيانڭ و روم ايلينڭ كوشهلرنده مدفون اولان مدنيتِ قديمه حياته باشلامش و منفعتنى مضرّتِ عموميهده آرايان و إستبدادى آرزو ايدنلر (يَا لَيْتَنٖى كُنْتُ تُرَابًا) ديمگه باشلاديلر. يڭى حكومتِ مشروطهمز معجزه گبى طوغديغى ايچون إن شاء الله بر سنهيه قدر، (تَكَلَّمَ فِى الْمَهْدِ صَبِيًّا) سرّينه مظهر اولاجغز. متوكّلانه، صبورانه طوتديغمز اوتوز سنه رمضانِ سكوتڭ ثوابيدر كه، عذابسز جنّتِ ترقّى و مدنيت قپولرينى بزه آچمشدر. حاكميتِ ملّيهنڭ براعتِ إستحلالى اولان قانونِ شرعى، خازنِ جنّت گبى بزى دخوله دعوت ايدييور. أى مظلوم إخوانِ وطن! گيدهلم داخل اولالم! برنجى قپوسى، شريعت دائرهسنده إتّحادِ قلوب؛ ايكنجيسى، محبّتِ ملّيه؛ اوچنجيسى، معارف؛ دردنجيسى، سعىِ إنسانى؛ بشنجيسى، تركِ سفاهتدر. اوتهكيلرينى سزڭ ذهنڭزه حواله ايدييورم. زيرا دعوته إجابت واجبدر.
بو إنقلابِ عظيمڭ فاتحهسى معجزه گبى باشلاديغى ايچون بر فالِ خيردر كه، خاتمهسى ده پك گوزل اولاجقدر. شويله كه:
بو إنقلاب، فكرِ بشرڭ آغير زنجيرلرينى پارچه پارچه و إستعدادِ ترقّىيه قارشى سدلرى زير و زبر ايدهرك، حكومتى ورطهىِ موتدن تخليص و بو ملّتِ مظلومهده جواهرِ إنسانيتى إظهار و آزاده اولارق كعبۀِ كمالاته طوغرى گوندرديگى گبى، خاتمهسى ده يعنى اوتوز سنه قدر رنگارنك سفاهت و إسرافات و هوسات و لذائذِ نامشروعه گبى سيّئاتِ مدنيت، دولتِ مدنيتى، حكومتِ مستبده گبى إنقراضه سَوق ايدن امورلر مادّةً ضررينى إحساس ايدهجگندن او مظلم و كثيف اولان سحاب، آرزوىِ عمومى ايله منكشف اولديغندن، شمسِ شريعت و معكسى اولان قمرِ مدنيت برّاق و صف و أساساتده آسيايى و روملينى تنوير و متضمّن اولديغى إستعدادِ كمالڭ تخملرى حرّيتڭ ياغمورى ايله نشو و نما بولارق رنگارنك ألوان ايله تزيين ايدهجگنى بو فالِ خير بزه مژده ويرييور.
بر معجزۀِ پيغمبريدر (عصم) و بو ملّتِ مظلومهيه بر عنايتِ إلٰهيدر و جمعيتِ ملّيهنڭ نيّتِ خالصانهسنڭ بر كرامتيدر كه، بو معدنِ سعادت و حرّيت اولان شريعت دائرهسندهكى إتّحادِ قلوب و محبّتِ ملّى ألمزه مجّانًا گيردى. مللِ سائره ميليونلرله جواهرِ نفوس فدا ايتمكله قزانديلر. ئولمش اولان حسّيات و آمال و ميولاتِ عاليۀِ ملّيهمزى و أخلاقِ حسنۀِ إسلاميهمزى بو كُرۀِ أرض دينيلن (جذبه طوتمش مولوى گبى) مجذوب جوّالڭ صماخنده طنينأنداز و عموم ملّتى سُرور ايله بر غريب إهتزازه گتيرن صداىِ حرّيت و عدالت، نفخِ صورِ إسرافيل گبى حياتلانديرييور.
صاقين أى إخوانِ وطن! سفاهتلرله و دينده لااباليلكلرله تكرار ئولديرمهيڭز. و بتون أفكارِ فاسدهيه و أخلاقِ رذيلهيه و دسائسِ شيطانيهيه و تبصبصاته قارشى؛ شريعتِ غرّا اوزرينه مؤسّس اولان قانونِ أساسى عزرائيل حكمنه گچدى، اونلرى ئولديردى.
أى حميتلى إخوانِ وطن! إسرافات و خلافِ شريعت و لذائذِ نامشروعه ايله تكرار إحيا ايتمهيڭز! ديمك شيمدىيه قدر مزارده ايدك، چورويوردق. شيمدى بو إتّحادِ ملّت و مشروطيت ايله رحمِ مادره گچدك، نشو و نما بولاجغز. يوز بو قدر سنه گرى قالديغمز مسافۀِ ترقّيدن إن شاء الله معجزۀِ پيغمبرى (عصم) ايله، شمندوفرِ قانونِ شرعيۀِ أساسيهيه عملاً و براقِ مشورتِ شرعيهيه فكرًا بينهجگز. بو وحشتأنگيز صحراىِ كبيرى زمانِ قاصرهده تكمّلِ مبادى جهتيله طىّ ايتمكله برابر، مللِ متمدّنه ايله اوموز اوموزه مسابقه ايدهجگز. زيرا اونلر كاه اوكوز آرابهسنه بينمشلر، يوله گيتمشلر. بز بردن بره شمندوفر و بالون گبى مبادىيه بينهجگز، گچهجگز. بلكه جامعِ أخلاقِ حسنه اولان حقيقتِ إسلاميهنڭ و إستعدادِ فطرينڭ، فيضِ ايمانڭ و شدّتِ جوعڭ هضمه ويرديگى تسهيل يارديميله فرسخ فرسخ گچهجگز. ناصل كه وقتيله گچمشدك.
طلبهلگڭ بڭا ويرديگى وظيفه ايله و حرّيتڭ فرمانِ مأذونيتيله إخطار ايدييورم كه:
أى أبناىِ وطن! حرّيتى سوءِ تفسير ايتمهيڭز، تا ألمزدن قاچماسين. و متعفّن اولان أسكى أسارتى باشقه قابده بزه ايچيرمكله بزى بوغماسين. (حاشيه) زيرا حرّيت، مراعاتِ أحكام و آدابِ شريعت و أخلاقِ حسنه ايله تحقّق و نشو و نما بولور. صدرِ أوّلڭ يعنى صحابۀِ كرامڭ او زمانده عالمده وحشت و جبرِ إستبداد حكمفرما اولديغى حالده، حرّيت و عدالت و مساواتلرى بو مدّعايه بر برهانِ باهردر. يوقسه حرّيتى سفاهت و لذائذِ نامشروعه و إسرافات و تجاوزات و هواءِ نفسه إتّباعده سربستيت ايله تفسير و عمل ايتمك؛ بر پادشاهڭ أسارتندن چيقمقله و آلچاقلرڭ إستبدادى و أسارتِ رذيلهسنڭ آلتنه گيرمكله برابر ملّتڭ چوجقلق إستعدادينى و سفيه اولديغنى گوسترديگندن، پارالانمش اولان أسكى أسارته لايق و حرّيته عدمِ لياقتنى گوسترر. زيرا سفيه محجوردر. گنيش و مشعشع اولان يڭى حرّيتِ شرعيهيه عدمِ لياقت، (زيرا چوجغه گنيش اولماز) شانلى اولان إتّحادِ ملّىيى، بوزولمش و متعفّن اولان حالات ايله فنا بر خستهلغه هدف ايدهجكدر. زيرا أهلِ تقوا و وجدانڭ تفسيرى بويله دگل. مذهبى ده مخالف اولاجقدر. بز ملّتِ عثمانيه أركگز. قامتِ مردانۀِ إستعدادِ ملّيهمزه قادينلرڭ لباسى گبى سوسلى سفاهت و هوسات و إسرافات ياقيشمييور. بناءً عليه آلدانميهلم. {خُذْ مَا صَفَا دَعْ مَا كَدَرَ} قاعدهسنى دستور العمل ياپالم. شويله كه:
___
(حاشيه): أوت داها دهشتلى بر إستبداد ايله، پك آجى و زهرلى بر أسارتى بزه ايچيرديلر.
___
أجنبيهده ترقّياتِ مدنيهيه يارديم ايدهجك نقطهلرى (فنون و صنايع گبى) مع الممنونيه آلاجغز.
امّا مدنيتڭ ذنوب و مساويسى اولارق بعض عادات و أخلاقِ سيّئه كه، أجنبيلرده محاسنِ مدنيۀِ كثيرهسيله محاط اولديغى ايچون چركينلگنى او قدر گوسترمييور. بز ايسه آلديغمز وقت سوءِ طالع جهتيله و سوءِ إنتخاب طريقيله مشكل التحصيل محاسنِ مدنيتى ترك ايدوب، چوجق گبى هوا و هوسه موافق ذنوبِ مدنيتى كسب ايتديگمزدن، مخنث گبى (يعنى قادينلاشمش أركك گبى) ويا مترجّله گبى (يعنى أرككلشمش قادين گبى) اولورز. قادين أركك گبى گيينسه مسخره اولور. أركك قادين گبى سوسلنسه مخنثلكدر، ياقيشماز. مرد و عالىهمّت، زيب و زيورله مزخرف جلوهلى خانم گبى اولماملى.
الحاصل: ذنوب و مساوئِ مدنيتى، حدودِ حرّيت و مدنيتمزه گيرمكدن سيفِ شريعتله ياساق ايدهجگز. تا كه، مدنيتمزڭ گنجلگى و شبابتى، زلالِ عين الحياتِ شريعتله محافظه اولسون. كسبِ مدنيتده ژاپونلره إقتدا بزه لازمدر كه؛ اونلر آوروپادن محاسنِ مدنيتى آلمقله برابر، هر قَومڭ مايۀِ بقاسى اولان عاداتِ ملّيهلرينى محافظه ايتديلر. بزم عاداتِ ملّيهمز إسلاميتده نشو و نما بولديغى ايچون ايكى جهتله صاريلمق ضروريدر.
أى حميتلى أبناىِ وطن! جمعيتِ ملّى روحلرينى فدا ايتمكله سعادتمزه يول آچديلر. بز ده، بعض لذائذيمزى ترك ايله اونلره يارديم ايدهجگز. زيرا او سفرهىِ نعمته برابر اوطورويورز. أفكارِ فاسده صاحبى يعنى حرّيت آلتنده إستبدادى و مظالمى آرزو ايدنلر، موتِ أبدىيه مظهر اولان و زمانِ ماضينڭ چوقورنده مدفون اولان إستبداداتى وياخود سَيْلِ خروشانِ زمان ايچنده يووارلانمش اولان مظالمى، بر داها تماشا ايتمهمك ايچون، تاريخِ حياتِ حرّيتڭ بيانيله، ماضى و حال مياننده دلينمز بر سدِّ آهنين چكمك ايستهيورم.
شويله كه: بو إنقلاب، طوغورديغى حرّيتى مشورتِ شرعيهنڭ تربيهسنه ويرسه، بو ملّتڭ أسكى سطوت و قوّتنى إحيا ايدهجكدر. أگر وباىِ أغراضِ شخصيهيه مصادف اولسه؛ إستبدادِ مطلقه دونهجك، او چوجق ئولهجك. حرّيت تام زماننده طوغدى. أحوال و إلجاآتِ زمان تام تربيهسنه خدمت ايستر. صنعى و إختيارى دگل، تا كه چوق كلفته محتاج اولسون. أسكى زمان گبى بو قدر تضييقاتڭ تأثيريله مأيوسيت و محو اولمق شانندن اولميان حميتِ إسلاميه او قدر غليانه گلمش كه، گويا حرّيت رحمِ مادرده تكميل ياشا قدر گلمش. قدمنهادۀِ ساحۀِ وجود اولديغى آنده حكمفرمالغنى إعلان و هيچ بر مصادماته قارشى تزلزله و دلمگه اوغراماياجق بر سدِّ آهنين گبى وياخود تحتِ بلقيسى گبى بش حقائقِ ثابته اوزرينه تأسّس ايدهجك.
برنجى حقيقت: مجموعده بر قوّت بولونور، هيچ بر فرد او قوّته مالك اولاماز. بر قالين شريد ايله أجزاسندن قالين بر تلڭ قوّتى گبى.. وياخود أفكارِ عموميهيى متضمّن يڭى حكومتمز و أسكى حكومتمز گبى. أى ملّت! بز شيمدى قالين شريدز. هر كيم مخالفت ايله وياخود خودسرانه ايله بونى ضعيف ايتسه، عمومڭ حقّنه عفو اولوناماز بر جنايتدر.
ايكنجى حقيقت: زمانِ سالفده، يعنى غلبۀِ وحشت وقتنده عالمده حكمفرما، وحشتڭ محصولى و تدنّى و إنقراضڭ محكومى اولان قوّت و جبرڭ سلطنتى ايدى. هر هانگى دولتڭ دورانِ دمّى يرينه گيرمش ايسه، اويله دولتلرڭ صحائفِ تاريخيهلرى بايقوشلرڭ آشيانهلرى گبى سطرلرى إنقراضلرينى چاغيرييورلر، باغيرييورلر. تسلّطِ مدنيتڭ زماننده عالمڭ حكمرانى، علم و معرفتدر. مولدى مدنيت و شانى تزايد و عمرى أبدى اولديغندن هر هانگى دولتڭ حيات و مدبّرى اولمش ايسه، او حكومتى كندى گبى قيدِ عمرِ طبيعيدن و أجلِ إنقراضدن تخليص و كُرۀِ أرض قدر ياشاماسنه إستعداد ويرمش. كتابِ آوروپا صحائفى بونى علنًا گوسترييور.
أگر دينيلسه: شيمدىيه قدر بو حكومتِ ضعيفهيى عادى آدملر إداره ايدهبيليرلردى. فقط بو قدر متين و دهشتلى، قويًا أمل ايتديگمز يڭى حكومتى اوموزنده طاشييهجق خارقه و داهى آدملر لازمكن، آسيا و روم ايلى تارلاسى عجبا اويله محصولات ويرهجك مى؟
بوڭا جواب: أگر باشقه إنقلابلر باشه گلمزسه، أوت. و اوچنجى حقيقته دقّت ايت. شويله كه:
بو زمانِ ماضيده إنسان إستعدادِ غيرِ متناهىيه مالك ايكن او قدر طار و محدود دائره ايچنده حركت ايدييوردى كه: گويا إنسان ايكن حيوان گبى ياشاديغندن، أفكار و أخلاقى او دائره نسبتنده تدنّى ايتمش و محصور قالمشدى. شيمدى بو شرعى حرّيتِ عادلانه أگر ياشاسه و بوزولمازسه، فكرِ بشرڭ آغير زنجيرلرينى پارالامقله و إستعدادِ ترقّىيه قارشى سدلرى هرج و مرج ايدهرك او كوچك دائرهيى دنيا قدر توسيع ايدهبيلير. حتّى بنم گبى بر كويلى عادى آدم، ثريّا قدر علوى اولان إدارۀِ عمومىيى نظره آلاجق. آمال و ميولاتڭ فيليزلرينى اوراده باغلايهجق. و هر بر فعل و طورينڭ اوراده بر إهتزاز ايله ذىمدخل بولونهجغندن، همّتى ثريّا قدر تعالى و أخلاقى او درجه تكمّل و أفكارى ممالكِ عثمانيه قدر توسّع ايدهجگندن؛ أفلاطونلرى، ابن سينالرى و بيسمارقلرى، دقارتلرى و تفتازانيلرى إن شاء الله گرى بيراقهجق. بو قوّتلى آسيا و روم ايلى تارلاسى چوق شبّانِ وطن محصولى ويرهجگندن قويًا اميدوارز.
لاسيّما شو ممالكِ عثمانيه عموم أنبيانڭ محلِّ ظهورى و دولتِ متمدّنۀِ سالفهنڭ مهدِ تشكّلى و شمسِ إسلاميتڭ مشرقِ طلوعى اولديغندن، إنسانلرڭ فطرتلرنده أكدكلرى بو اوچ إستعداداتِ كمال بو حرّيتڭ ياغمورى ايله نشو و نما بولسه، هركسڭ إستعدادى و فكرِ منوّرينڭ دال و بوداقلرى شجرۀِ طوبٰى گبى هر طرفه آچاجقدر. و شرقڭ غربه نسبتنى، سحرڭ غروبه نسبتى گبى ايدهجكدر. أگر سوسِ عطالتله و سموم أغراض ايله قوروتولمازسه.
دردنجى حقيقت: شريعتِ غرّا كلامِ أزليدن گلديگندن أبده گيدهجكدر. زيرا شجرۀِ مَيل الإستكمالِ عالمڭ دالى اولان إنساندهكى مَيل الترقّينڭ محصول و ثمرهسى اولان إستعدادڭ تلاحقِ أفكارله حاصل اولان نتائجنڭ تشرّب و تغدّى ايله بيومسى نسبتنده، شريعتِ غرّا عينًا مادّى ذىحيات گبى توسّع و إنطباق ايدهجگندن أزلدن گلوب أبده گيدهجگنه برهانِ باهردر. عصرِ سعادت اولان صدرِ أوّلڭ حرّيت و عدالت و مساواتى باخصوص او زمانده دليلِ قطعيدر كه، شريعتِ غرّا مساواتى و عدالتى و حقيقى حرّيتى جميع روابط و لوازماتيله جامعدر. إمامِ عُمَر (رض)، إمامِ على (رض) و صلاح الدينِ أيوبى كردى آثارى بو مدّعايه دليلِ علنيدر. بوڭا بناءً قطعيًا حكم ايدييورم: شيمدىيه قدر نقصانيتمز و تدنّياتمز، سوءِ أحوالمز درت سببدن گلمش:
١ - شريعتِ غرّانڭ عدمِ مراعاتِ أحكامندن
٢ - بعض مداهنلرڭ كيف مايشاء سوءِ تفسيرندن
٣ - ظاهرپرست عالمِ جاهلڭ وياخود جاهلِ عالمڭ تعصّباتِ نابمحللندن
٤ - سوءِ طالع جهتيله و سوءِ إنتخاب طريقيله مشكل التحصيل اولان آوروپا محاسننى ترك ايدهرك چوجق گبى هوا و هوسه موافق ذنوب و مساوئِ مدنيتى طوطى گبى تقليددندر كه، بو نتيجۀِ سيّئه ظهور ايدييور. مأمورين حقّيله وظيفهسنى ايفا ايتسه، مأمور اولميان إلجاآتِ زمانه موافق سعى ايتسه، سفاهته وقت بولاميهجقدر. بو ايكى قسمڭ هر هانگيسنده بر فرد، سفاهته إنهماك گوستردى ايسه، بو هيئتِ إجتماعيه ايچنده مضر بر ميقروب صورتنه گيرييور.
بشنجى حقيقت: زمانِ سابقده روابطِ إجتماع و لوازمِ تعيّش و فوائدِ مدنيت او قدر تكثّر و تشعّب ايتمديگندن، بعض قليل آدملرڭ فكرى، دولتڭ إدارهسنه يارى كافى گبى ايدى. امّا بو زمانده روابطِ إجتماع او قدر تكثّر ايتمش و لوازمِ تعيّش او درجه تعدّد ايتمش و ثمراتِ مدنيت او قدر تفنّن ايتمش كه، آنجق يالڭز قلبِ ملّت حكمنده اولان مجلسِ مبعوثان و فكرِ اُمّت مقامنده اولان مشورتِ شرعى و سيف و قوّتِ مدنيت منزلنده بولونان حرّيتِ أفكار او دولتى طاشييهبيلير. و إداره و تربيه ايدهبيلير. بو حقيقته مثال؛ أسكى حكومتِ مستبده، يڭى حكومتِ مشروطهدر.
اوچنجى حقيقتڭ بڭا ويرديگى وظيفه ايله و حرّيتڭ فرمانِ مأذونيتيله (اوچ شى) إخطار ايدييورم.
برنجيسى: بر جسم بردن ذرّاتدن تخلّل و يڭى ذرّاتدن تشكّل أيلهمسى محال اولاجغندن، جسمِ دولتڭ بردن مأمورينى رفع و يڭيلرينى إقامه أيلهمسى محال اولماسه ده، متعذّردر. بناءً عليه إستعدادِ خبيث و قابلِ إصلاح اولميان آدملرى ذاتًا جسمِ دولت دفعِ طبيعى ايله إفراز ايدهجكدر. امّا قابلِ إصلاح اولانلر ذاتًا گونش غربدن طلوع ايتمديگندن توبهنڭ قپوسى آچيقدر. بونلرڭ تجربهلرندن إستفاده ايتملى. بونلرڭ يرينى طولديرهجق قرق سنه لازم. يوقسه عمومى عليهنده إطالۀِ لسان و ترذيل ايتمك، بو شانلى اولان إتّحادِ ملّتى (بوزولمش بعض أفكار و أخلاقلرينه بناءً) بر خستهلغه هدف ايدهجكدر.
ايكنجيسى: بن كردستان طاغلرنده بيومش ايدم. مركزِ خلافتى گوزل تخيّل ايدييوردم. وقتا كه، بوندن يدى سكز آى مقدَّم درسعادته گلدم. گوردم كه: إستانبول توحّش و تنافرِ قلوب سببيله مدنى لباسى گيمش وحشى بر آدمه بڭزردى. شيمدى إتّحادِ ملّى سببيله مدنى آدم، فقط يارى مدنى، يارى وحشى لباسنده بزه عرضِ ديدار ايدييور. أوّل كردستانده فنالغڭ سببى، كردستان عضوى خستهلانمش ظن ايدييوردم. وقتا كه، خسته اولان إستانبولى گوردم. نبضنى طوتدم. تشريح ايتدم. آڭلادم كه، قلبندهكى خستهلقدر، هر طرفه سرايت ايدر. تداويسنه چاليشدم، بر ديوانهلكله تلطيف ايديلدم.
هم ده گوردم كه؛ مدنيتِ حقيقيهيى تشكيل أيلهين إسلاميت، مادّى جهتنده مدنيتِ حاضرهدن گرى قالمش. گويا إسلاميت سوءِ أخلاقمزدن داريلمش ماضى طرفنه دونوب گيدييور، زمانِ سعادته بزى شكايت ايدهجكدر. بونڭ أڭ بيوك سببى؛ إستبداددن صوڭره، مرشدِ عمومى اوچ بيوك شعبهنڭ (كه «جملهنڭ مقصودى بر امّا روايت مختلف» وياخود
(عِبَارَاتُنَا شَتّٰى وَحُسْنُكَ وَاحِدٌ وَكُلٌّ اِلٰى ذَاكَ الْجَمَالِ يُشٖير)
بيتنڭ ماصدقى اولان أهلِ مدرسه و أهلِ مكتب و أهلِ تكيهنڭ) تباينِ أفكار و تخالفِ مشاربيدر.
بو تباينِ أفكار أخلاقِ إسلاميهنڭ أساسنى صارصمش، إتّحادِ ملّتى چتاللاشديرمش، ترقّياتِ مدنيهدن گرى بيراقمشدر. زيرا برى إفراط ايله ديگرينى تكفير و تضليل ايدييور. اوتهكى تفريط ايله اونى تجهيل و غيرِ معتمد عدّ ايدييور. بونڭ چارهسى، توحيد ايله و أفكارلرينڭ مابيْننده تأييد ايله مناسبت ايله مصالحهدر. تا إعتدال نقطهسنده مصافحه ايله برلشملى كه، آهنگِ ترقّىيى إخلال ايتمهسينلر.
اوچنجيسى: بن واعظلرى ديڭلهدم. نصيحتلرى بڭا تأثير ايتمدى. دوشوندم. قساوتِ قلبمدن باشقه اوچ سبب بولدم:
برنجيسى: زمانِ حاضرهيى زمانِ سالفهيه قياس ايدهرك يالڭز تصويرِ مدّعايى پارلاق و مبالغهلى گوسترييورلر. تأثير ايتديرمك ايچون إثباتِ مدّعا و متحرّئِ حقيقتى إقناع لازم ايكن إهمال ايدييورلر.
ايكنجيسى: بر شيئى ترغيب ويا ترهيب ايتمكله اوندن داها مهمّ شيئى تنزيل ايدهجكلرندن، موازنۀِ شريعتى محافظه ايتمييورلر.
اوچنجيسى: بلاغتڭ مقتضاسى اولان حاله مطابق، يعنى إلجاآتِ زمانه موافق، يعنى تشخيصِ علّته مناسب سوز سويلهمزلر. گويا إنسانلرى أسكى زمان كوشهلرينه چكييورلر، صوڭره قونوشويورلر.
حاصلِ كلام: بيوك واعظلريمز هم عالمِ محقّق اولمالى، تا إثبات و إقناع ايتسين. هم حكيمِ مدقّق اولمالى، تا موازنۀِ شريعتى بوزماسين. هم بليغِ مقنع اولمالى، تا مقتضاىِ حال و إلجاآتِ زمانه موافق سوز سويلهسين و ميزانِ شريعتله طارتسين و بويله اولمالرى ده شرطدر.
ياشاسين شريعتِ غرّا!.. ياشاسين عدالتِ إلٰهى!.. ياشاسين إتّحادِ ملّى!.. ئولسون إختلاف!.. ياشاسين محبّتِ ملّى!.. گبرسين أغراضِ شخصيه و فكرِ إنتقام!.. ياشاسين شجاعتِ مجسّم عسكرلر!.. ياشاسين سطوتِ مشخّص اوردولر!..ياشاسين عقل و تدبيرِ مجسّم ديندار جمعيتِ أحرار و نور طلبهلرى!
سعيد النورسى
❊ ❊ ❊
(حاشيه): مدارِ عبرت و حيرتدر كه، قرق اوچ سنه أوّل حرّيتڭ اوچنجى گوننده إستانبولده هم صوڭره سلانيكده ميدانِ حرّيتده بيڭلر سياسيلره قارشى دعوا ايتديگى و بتون قوّتيله شريعتى ايستديگى و حرّيتى و مشروطيتى شريعته خدمتكار ياپديغى و صوڭره ٣١ مارتده حركت اوردوسى غايت دهشت و شدّتله شريعت ايستهينلرى مسئول ايتدكلرى زمانده ديوانِ حربِ عُرفيده سعيدڭ بو منتشر نطقلرندن تام برائت ويريلديگى حالده؛ شيمدى ايسه سياستى اوتوز سنهدن بَرى بيراقديغى و او نطقلرينه نسبةً سياسته پك آز تماسى ايچون ٧٢ سنه دينسزلك حسابنه إشكنجهلر و غدّارانه عذاب و جزالر ويرنلر، ألبته دين نامنه ظلم ايتدكلرينى و أنگيزيسيونلردن داها ظالم اولدقلرينى إثبات ايدر.
سعيد النورسى
❊ ❊ ❊