قرآن شاكردلرينڭ
خدمت رهبرى
مؤلّفى
بديع الزمان
سعيد النورسى
قيصهلتمهلر
أم. أميرطاغ لاحقهسى ١ (٢٨٨ صح.لك)
أمى. أميرطاغ لاحقهسى ٢ (٢٤٧ صح.لك)
إش. إشارات الإعجاز (٢٣٠ صح.لك)
ق. قسطمونى لاحقهسى (٢٦٨ صح.لك)
ل. لمعهلر (٤٥٠ صح.لك)
م. مكتوبات (٥٢٤ صح.لك)
مث. مثنوئِ نوريه (٢٦٩ صح.لك)
من. مناظرات (١١٢ صح.لك)
س. سوزلر (٧٩٢ صح.لك)
ست. سكّۀِ تصديقِ غيبى (٢٧١ صح.لك)
سى. سياست - نشريات بروشورى (١٩٨ صح.لك)
ش. شعاعلر (٧٦١ صح.لك)
تر. تاريخچۀِ حيات (٧٤٠ صح.لك)
﴿بِاسْمِهٖ سُبْحَانَهُ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
مقدّمه
رسالۀِ نور شخصِ معنويسنڭ ممثّلِ محترمى، أبدى قرآن حقيقتلرينڭ دلاّلى، مبلّغى و ناشرى اولان و بتون شخصيتنى رسالۀِ نور واسطهسيله -بِإذْنِ اللّٰه- أبده قدر إستفاده و إستفاضهيه مدار بر شكلده دوام ايتديرن استاديمز بديع الزمان سعيد النورسى حضرتلرينڭ مسلك و مشربنه دائر قرآندن درس آلديغى چوق معظّم بعض حقيقتلرى، خدمتِ ايمانيهده بولونان نور شاكردلرى ايچون دائما تازهلهنن بر درسمز و هر وقت تمسّك ايدهجگمز دگيشمز دستوريمز، مادّى معنوى هر درلو أنگللر قارشيسنده موفّقيته، رضاىِ إلٰهىيه ايصال ايديجى أڭ أهمّيتلى رهبريمز معناسيله نشر ايدييورز.
چونكه رسالۀِ نورڭ دائرهسى چوق گنيشلهمش؛ چوق مختلف أفكار و مزاج صاحبلرى، بو خدمت صفنده ير آلمشلردر. ألبته بتون أفكار، قناعت، مسلك و مشربلر اوستنده مقامِ صدّيقيتده ير طوتمش و شخصِ معنوئِ آلِ بيتڭ ممثّلى اولارق خدمتِ قرآنيهنڭ باشنه گچمش استاد بديع الزمانڭ أعظمى إخلاص، أعظمى صداقت و أعظمى فداكارلق معناسنى إحتوا ايدن، گوسترن و إشارت ايدن مسلگنى نظره ويرمك لازم گلمكدهدر. تا كه خدمتِ نوريهده بولونهجق قرآن شاكردلرى قيامته قدر بو دستورلر مواجههسنده حركت ايتسينلر. موفّقيتڭ و رضاىِ إلٰهىيه نائليتڭ آنجق بو صورتله ممكن اولاجغنه قطعى قناعت گتيرسينلر.
شيمدى جامعۀِ إسلاميه عموميتله رسالۀِ نورده تجلّى ايدن حقيقتِ قرآنيهيه صاريلمش بولونمقدهدر. هم نوعِ بشرڭ دخى جاذبهدار سياست حادثهلرينڭ توقّفى نتيجهسنده، رحمتِ إلٰهيه ايله حقائقِ قرآنيهيه ياپيشهجغى أمارهلرى گورونويور. هم قرآنڭ حق و حقيقته، عقل و منطغه طايانان دليل و حجّته إستناد ايدن و بتون مسئلهلرينى عقله تثبيت ايتديرن بر كتابِ مقدّس اولديغنى، زمينڭ هر طرفنده و كائنات صفحاتنده نشر ايدن، إعلان و إثبات ايدن رسالۀِ نور بوگون عالمِ إسلام و إنسانيتڭ نظرِ تقدير و تحسيننى جلب ايتمش بولونويور. بو إعتبارله رسالۀِ نورڭ مظهر اولديغى كلّى موفّقيت و ماهيتنڭ و حضرتِ استادڭ مظهريتنڭ أساسلرينى إفاده ايتمك ايجاب ايدييور.
رسالۀِ نور خدمتنده تجلّى ايدن رضاىِ إلٰهى و توفيق نورلرينڭ توالى و دوام ايتمهسى ايچون هر حالده حضرتِ استاد بديع الزمانڭ تعقيب ايتديگى مسلك و مشربى، ياريم عصره ياقلاشان اوزون بر خدمت دورهسنده مختلف حادثهلر، شدّتلى تضييقات و هجوملر قارشيسنده مادّى و معنوى أنگللر ايچريسنده طاقينديغى طور، نياز و ياشاديغى حالتِ روحيه و گوسترديگى عظيم و صداقت گبى أحوالى اولان «صدّيقيت مسلگى»در كه نور طلبهلرى ايچون أهمّيتله بيلينمك، آڭلاشيلمق و ياشانمق ايجاب ايدر.
چوق دقّتله اوزرنده طورلماسى، تفكّر ايديلمسى گركن بديهى بر حقيقت واردر كه او ده شودر: رسالهلرده، مكتوبلرده، لاحقهلرده دفعهلرجه يازيلديغى گبى مبارك استاديمزه مراجعت ايدنلر و زيارته گلن بتون زيارتجيلر همان عموميتله دائما گورويورلردى كه:
استاديمز اونلرڭ نظرلرينى رسالۀِ نوره توجيه ايدييوردى. عجبا بونڭ سرِّ حكمتى نه ايدى؟ متماديًا نه ايچون بو نقطهده تحشيدات ياپييوردى؟
أوت بو، معظّم بر حقيقتدر و حضرتِ بديع الزمانه كافل بر معظّم حقيقتڭ إفادهسيدر كه درسمزى حقائقِ قرآنيهيه و أنوارِ ايمانيه خزينهسى اولان رسالۀِ نوردن آلديغمز گبى بربريمزله معنوى مناسبت، علاقه، اخوّت و محبّت دستورلريمزى ده هپ او رسالۀِ نوردن درس آلاجغز.
أوت بو زمانده، بو دهشتلى و جهانشمول حادثهلر هنگامنده قرآن شاكردلرى جزئى و كلّى، فردى و إجتماعى بتون درس و ايقاظلرينى رسالۀِ نورله تحصيل ايدهجكلردر. چونكه قرآنڭ بو عصره باقان وجههسنى و رسولِ أكرم عليه الصلاة والسلامڭ بو زماندهكى وظائفِ دينيه طورينى كلّى بر معنا ايله شيمدى بو صورتله رسالۀِ نورله گورمش، آڭلامش بولونويورز.
بو خدمت رهبرندهكى يازيلر، بحثلر؛ رسالۀِ نورڭ مكتوبات، لمعهلر، شعاعلر، مدافعهلر و لاحقه مكتوبلرندن آلينان و خدمتِ نوريهيه قسمًا مسلكِ نوريهيه تماس ايدن قسملردن آنجق برر جزئيدر. رسالۀِ نور باشدن باشه بتون حقائق و بحثلريله مكتوبات و مدافعات، هپسى ده بو عصرده بر جادّۀِ كبراءِ قرآنيه اولان بو صراطِ مستقيم آيينۀِ مجلاّسنى بيان و إفاده ايدرلر. رسالۀِ نور مؤلّفى معزّز استاديمز اوزون ييللر بوينجه خدمتِ نوريهنڭ مختلف صفحهلرنده طلبهلريله برلكده معروض بيراقيلديغى چشيدلى حاللرده زمان و زمينه مناسب و او حاللره موافق درس، ايقاظ و إرشادلرده بولونمشدر.
رسالۀِ نوردهكى حقائق، ناصل كه طوغريدن طوغرىيه فيضِ قرآندن ملهم حقائقِ ايمانيهدر، زمان و زمينه گوره دگيشمز أبدى حقيقتلردر. او قدسى حقائقڭ درس و تعليمنده، نشر و إعلاناتنده ده خدمته تعلّق ايدن إرشاد، ايقاظ، تشويق و ترغيبى تضمّن ايدن شو گلهجك مسئلهلر ده هر حالده دگيشمز درسلر و أساساتدر كه نور طلبهلرى حياتڭ و خدمتڭ مختلف ساحه و صفحهلرنده اونلردن إستفاده ايدرلر، مشكلاتلرينى گيدهررلر. داها گنيش إستفاده ايچون بو خدمت رهبرينڭ منبعى اولان كلّياتِ نوريه و مكتوباتى مطالعه ايتمليدرلر. بو خدمت رهبرى آنجق او كلّى و معظّم حقيقتڭ بر كوچك نمونهسيدر.
بو رهبردهكى بعض قيصه بحثلر و جملهلردن درحال او بحث و جملهلرڭ آلينديغى رسالهلره مراجعتله مطالعه گنيش إثبات و ايضاحاتله ألده ايتمك، درك ايتمك لازمدر.
خدمت رهبرينده أساس عمده و حقائق، إخلاص رسالهلرى ايله اخوّت رسالهلريدر. إخلاص رسالهسنڭ اون بش گونده بر دفعه اوقونماسنڭ أمر ايديلمهسيله، سرِّ إخلاص و اخوّتڭ نور طلبهلرى مابيْننده بِالذّات إستعمالنڭ عظمتى و أهمّيتى آڭلاشيلمقدهدر. بو خدمت رهبرى، كلّياتِ نوردن و مكتوبلردن، إخلاص و اخوّت رسالهلرندهكى دستورلرى و أساسلرى تأييد و تقويه ايدن بحثلردن متشكّلدر.
جنابِ أرحم الرّاحميندن بتون أسماءِ حسنىسنى شفاعتجى ياپوب نياز ايدرز كه بزلرى سرِّ إخلاصه موفّق أيلهسين، آمين!
نور طلبهلرى
* * *
﴿بِاسْمِهٖ سُبْحَانَهُ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
أى قارداشلرم!
سزلر بيلييورسڭز كه بزم مسلگمزده بنلك، أنانيت، شان و شرف پردهسى آلتنده مقام صاحبى اولمقدن، ئولديريجى زهر گبى اوندن قاچييورز. اونى إحساس ايدن حالاتدن شدّتله إجتناب ايدييورز. ألبته بوراده، آلتى يدى سنه گوزيڭزله و يگرمى سنهدن بَرى تحقيقاتڭزله آڭلامشسڭز كه بن شخصمه قارشى حرمت و مقام ويرمك ايستهمييورم. سزلرى او نقطهده شدّتله تكدير ايتمشم. بڭا حدّمدن فضله موقع ويرمهيڭز دييه سزدن داريلييورم...
تر. ٣٠٢
سعيد، تام طوپراق گبى محويت و تركِ أنانيت و تواضعِ مطلقده بولونمق شرطدر تا كه رسالة النورى بولانديرماسين، تأثيرينى قيرماسين.
ق. ١٨
صوڭره أڭ ضعيف بر طمارِ إنسانى اولان شان و شرف و رتبه نقطهسنده بڭا چوق أليم بر طرزده او ضعيف طماريمى طوتمق ايچون أمر ايديلمش إهانتلر، تحقيرلرله، طماره طوقونديرهجق إشكنجهلرله دخى هيچ بر شيئه موفّق اولاماديلر. و قطعيًا آڭلاديلر كه، اونلرڭ پرستش ايتديگى دنيا شان و شرفنى بر رياكارلق و ضررلى بر خودفروشلق بيلييورز، اونلرڭ فوق العاده أهمّيت ويردكلرى حبِّ جاه و شان و شرفِ دنيويهيه بش پاره أهمّيت ويرمييورز، بلكه اونلرى بو جهتده ديوانه بيلييورز.
تر. ٥١٥
بوندن اوتوز سنه أوّل، جنابِ حقّڭ عنايتيله دنياده موقّت شان و شرف و أنانيتلى خودفروشلق و شهرتپرستلك نه قدر ضررلى و نه قدر فائدهسز و معناسز اولديغنى حدسز شكر اولسون كه، قرآنڭ فيضيله آڭلامش بر آدم، او زماندن بَرى بتون قوّتيله نفسِ أمّارهسيله مجادله ايدوب، محويت ايتمك و بنلگى بيراقمق و تصنّع و رياكارلق ياپمامق ايچون، ألندن گلديگى قدر چاليشديغنه اوڭا خدمت ويا آرقداشلق ايدنلر قطعى بيلدكلرى حالده و يگرمى سنهدن بَرى هركس كندى حقّنده خوشلانديغى زياده حسنِ ظن و توجّهِ ناس و شخصنى مدح و ثنادن و كندينى معنوى مقام صاحبى اولديغنى بيلمكدن هركسه مخالف اولارق بتون قوّتيله قاچديغنى، هم خاص قارداشلرينڭ اونڭ حقّندهكى حسنِ ظنلرينى ردّ ايدوب او خاص قارداشلرينڭ خاطرلرينى قيرماسى و يازديغى جوابى مكتوبلرنده اونلرڭ كندى حقّنده مدحلرينى و زياده حسنِ ظنلرينى قيرماسى و كندينى فضيلتدن محروم گوستروب بتون فضيلتى قرآنڭ تفسيرى اولان رسالۀِ نوره و طولاييسيله نور شاكردلرينڭ شخصِ معنويسنه ويروب كندينى عادى بر خدمتكار بيلمسى قطعى إثبات ايدييور كه؛ شخصنى بگنديرمگه چاليشماديغى و ايستهمديگى و ردّ ايتديگى حالده…
تر. ٥٢٦
هم بو يڭى سعيد، أسكى سعيد گبى كندينه حرمت و توجّه قزانمق و شان و شرف بولمق؛ قطعيًا عليهندهدر، قبول ايتمز.
تر. ٤٩٥
بن نفسمى تبرئه ايتمييورم، نفسم هر فنالغى ايستر. فقط شو فانى دنياده، شو موقّت مسافرخانهده، إختيارلق زماننده، قيصه بر عمرده، آز بر لذّت ايچون؛ أبدى، دائمى حياتنى و سعادتِ أبديهسنى برباد ايتمك، أهلِ عقلڭ كارى دگل. أهلِ عقلڭ و ذىشعورڭ كارى اولماديغندن، نفسِ أمّارهم ايستر ايستهمز عقله تابع اولمشدر.
م. ٦٨
أوت نفسنى بگهنن و نفسنه إعتماد ايدن، بدبختدر. نفسنڭ عيبنى گورن، بختياردر.
م. ٣٢٩
مدارِ شرف طانيديغى بتون أجدادينى و مدارِ إفتخار بيلديگى بتون گچمشلرينى و روحًا نقطۀِ إستناد تلقّى ايتديگى سلفِ صالحينڭ جادّۀِ نورانيلرينى ترك ايدوب هوسكارانه، هواپرستانه، رياكارانه، شهرتپرورانه، بدعهكارانه ايشلرده و حركاتده بولونسه؛ معنًا بتون أهلِ حقيقت و أهلِ ايمانڭ نظرنده أڭ آلچاق موقعه دوشر.
م. ٤١٤
دردنجى خطوهده:
﴿كُلُّ شَىْءٍ هَالِكٌ اِلَّا وَجْهَهُ﴾
درسنى ويرديگى گبى: نفس، كندينى سربست و مستقل و بِالذّات موجود بيلير. اوندن بر نوع ربوبيت دعوا ايدر. معبودينه قارشى عداوتكارانه بر عصيانى طاشير. ايشته گلهجك شو حقيقتى درك ايتمكله اوندن قورتولور.
حقيقت شويلهدر كه: هر شى نفسنده معناىِ إسميله فانيدر، مفقوددر، حادثدر، معدومدر. فقط معناىِ حرفيله و صانعِ ذو الجلالڭ أسماسنه آيينهدارلق جهتيله و وظيفهدارلق إعتباريله شاهددر، مشهوددر، واجددر، موجوددر.
شو مقامده تزكيهسى و تطهيرى شودر كه: وجودنده عدم، عدمنده وجودى واردر. يعنى، كندينى بيلسه، وجود ويرسه؛ كائنات قدر بر ظلماتِ عدم ايچندهدر. يعنى، وجودِ شخصيسنه گووهنوب موجدِ حقيقيدن غفلت ايتسه، ييلديز بوجگى گبى بر شخصى ضياىِ وجودى؛ نهايتسز ظلماتِ عدم و فراقلر ايچنده بولونور، بوغولور. فقط أنانيتى بيراقوب، بِالذّات نفسى هيچ اولديغنى و موجدِ حقيقينڭ بر آيينۀِ تجلّيسى بولونديغنى گورديگى وقت، بتون موجوداتى و نهايتسز بر وجودى قزانير. زيرا بتون موجودات، أسماسنڭ جلوهلرينه مظهر اولان ذاتِ واجب الوجودى بولان بر قلب هر شيئى بولور.
م. ٤٦٠
غايۀِ خيال اولمازسه وياخود نسيان ويا تناسى ايديلسه، أذهان أنالره دونوب أطرافنده گزرلر.
م. ٤٧٢
بر فكره دعوت، جمهورِ علمانڭ قبولنه وابستهدر. يوقسه دعوت بدعتدر، ردّ ايديلير.
م. ٤٧٠
إحسانِ إلٰهيدن فضله إحسان، إحسان دگلدر. هر شيئى، اولديغى گبى توصيف ايتمك گركدر.
م. ٤٧٣
جماعتده واحدِ صحيح اولمازسه؛ جمع و ضم، كسر ضربى گبى كوچولتور. إنسانلرده صحّت و إستقامت ايله وحدت اولمازسه زيادهلشمكله كوچولور، بوزوق اولور، قيمتسز اولور.
م. ٤٧٥
﴿بِاسْمِهٖ سُبْحَانَهُ ۞ اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
عزيز، صدّيق قارداشم!
بِالمقابله بز ده رمضانڭزى تبريك ايدييورز. رؤيالريڭز پك چوق مباركدرلر. إن شاء اللّٰه، جنابِ حق سزى بيوك إحسانلره مظهر أيلهيهجك، دييه بر إشارتدر.
بنجه بو زمانده أڭ بيوك بر إحسان، بر وظيفه، ايماننى قورتارمقدر، باشقهلرڭ ايماننه قوّت ويرهجك بر صورتده چاليشمقدر. صاقين، بنلك و غروره مدار شيلردن چكڭ. تواضع، محويت و تركِ أنانيت، بو زمانده أهلِ حقيقته لازم و ألزمدر. چونكه بو عصرده أڭ بيوك تهلكه، بنلكدن و خودفروشلقدن ايلرى گلديگندن؛ أهلِ حق و حقيقت، محويتكارانه دائما قصورينى گورمك و نفسنى إتهام ايتمك گركدر. سزڭ گبى آغير شرائط ايچنده قهرمانجهسنه ايماننى و عبوديتنى محافظه ايتمهسى، بيوك بر مقامدر.
…
مادام سزده بيوك بر همّت و قوّتلى بر ايمان وار؛ تام بر إخلاص و تام بر محويتله، ثباتكارانه رسالۀِ نوره شاكرد اول. تا بيڭلر، بلكه يوز بيڭلر شاكردلرڭ شركتِ معنويۀِ اخرويهلرينه حصّهدار اول. تا سنڭ خيرلرڭ، اييلكلرڭ جزئيتدن چيقوب كلّيلشسين، آخرتده تام كارلى بر تجارت اولسون.
سعيد النورسى
تر. ٤٨٢
٭٭٭
بر قارداشمز قصورينى گورمديگى مناسبتيله، اونى ايقاظ ايچون يازيلمش اينجه بر مسئلهدر. بلكه سزه فائدهسى اولور دييه يازدق.
بر زمان أولياءِ عظيمهدن نفسِ أمّارهسندن قورتولانلردن بر قاچ ذاتدن، شدّتلى مجاهدۀِ نفسيهلر و نفسِ أمّارهدن شكوالرينى گوردم. چوق حيرت ايدييوردم.
خيلى زمان صوڭره، نفسِ أمّارهنڭ كندى دسائسندن باشقه، داها شدّتلى و داها زياده سوز ديڭلهمز و داها زياده أخلاقِ سيّئهيى إدامه ايدن و هوس و طمار و أعصاب، طبيعت و حسّيات خليطهسندن چيقان و نفسِ أمّارهنڭ صوڭ تحصّنگاهى بولونان و نفسِ أمّارهيى تزكيهدن صوڭره اونڭ أسكى وظيفۀِ سيّئهسنى گورن و مجاهدهيى آخر عمره قدر دوام ايتديرن، بر معنوى نفسِ أمّارهيى گوردم. و آڭلادم كه، او مبارك ذاتلر حقيقى نفسِ أمّارهدن دگل؛ بلكه مجازى بر نفسِ أمّارهدن شكوا ايتمشلر. صوڭره گوردم كه، إمامِ ربّانى دخى بو مجازى نفسِ أمّارهدن خبر ويرييور.
بو ايكنجى نفسِ أمّارهده شعورسز كور حسّيات بولونديغى ايچون، عقل و قلبڭ سوزلرينى آڭلامييور و ديڭلهميور كه، اونلرله إصلاح اولسون و قصورينى آڭلاسين. يالڭز طوقاتلر و ألملر ايله نفرت ايدوب ويا تام بر فدائيلكله هر حسّنى مقصدينه فدا ايتسين. و رسالۀِ النورڭ أركانلرى گبى هر شيئنى، أنانيتنى بيراقسين.
بو عجيب عصرده دهشتلى بر آشيلامق و شرينغه ايله هم حقيقى، هم مجازى ايكى نفسِ أمّاره إتّفاق ايدوب؛ اويله سيّئاته اويله گناهلره سوهرك گيرييور، كائناتى حدّته گتيرييور. حتّى كندم، بر دقيقه ظرفنده يگرمى پارهلق بر صيقنتى ايله، آلتمش ليرالق بر حسنهيه ترجيح ايتمگه چاليشدم. هم اون دقيقه ظرفنده، بيوك بر مجاهدۀِ معنويده، بنم جبههمده قرق ايكيلك بر طوپ گبى دشمنلريمه آتوب يول آچديغى حالده؛ او ايكى نفسِ أمّارهنڭ موقّت بر غفلت فرصتنده، خودكاملق و مَيلِ تفوّق گبى غايت ظلملى و ظلماتلى حسّيله، بيوك بر شكر و تشكّر يرينه، «نه ايچون بن آتمادم» دييه أڭ چركين بر ريا و رقابت طمارينى حسّ ايتدم.
جنابِ حقّه يوز بيڭ شكر ايدييورم كه، رسالۀِ النور و بِالخاصّه إخلاص رسالهلرى او ايكى نفسڭ بتون دسائسنى إزاله و اونلرڭ آچديغى يارهلرى تداوى ايتديگى گبى، او بر دقيقه و اون دقيقهدهكى حالتلرى بردن إزاله ايتدى. و معنوى بر إستغفار اولان قصوريمى بيلدم. او خطانڭ معجّل جزاسى اولان ايچندهكى ألمدن و عذابدن قورتولدم.
ق. ٢٣٣
بنم بو اوتوز سنه حياتمده و يڭى سعيد تعبير ايتديگم زمانمده بتون رسالۀِ نورده يازدقلرم و شخصمه تماس ايدن حقيقتلرينڭ تصديقيله و بنمله جدّى گوروشن أهلِ إنصاف ذاتلرڭ و آرقداشلرڭ شهادتلريله إدّعا ايدييورم كه:
بن نفسِ أمّارهمى أليمدن گلديگى قدر خودفروشلقدن، شهرتپرستلكدن، تفاخردن منعه چاليشمشم و شخصمه زياده حسنِ ظن ايدن نور طلبهلرينڭ بلكه يوز دفعه خاطرلرينى قيروب جرح ايتمشم.
بن مال صاحبى دگلم، قرآنڭ مجوهرات دكّاننڭ بر بيچاره دلاّلىيم ديديگمى هم ياقين دوستلرم، هم قارداشلريمڭ تصديقلريله و أمارهلرينى گورمهلريله، بن دگل دنيوى مقاماتى و شان و شرفى شخصمه قزانديرمق، بلكه معنوى بيوك مقامات فرضا بڭا ويريلسه ده، فقط خدمتده إخلاصمه نفسمڭ حصّهسى قاريشمق إحتمالنه بناءً قورقهرق او مقاماتى ده خدمتمه فدا ايتمگه قرار ويرديگم و فعلًا ده اويلهجه حركت ايتديگم حالده…
ش. ٣٩٥
بونى ده سزه قطعيًا بيان ايدييورم:
شخصمه تحقير و إهانت و چوروتمك و إشكنجه، جزا گبى نه گلسه؛ (رسالۀِ نوره و شاكردلرينه بنم يوزمدن ضرر گلمهمك شرطيله، شيمديكى مسلگم إعتباريله) قبوله قرار ويرمشم. بونده ده آخرتم ايچون بر ثواب وار. و نفسِ أمّارهنڭ شرّندن قورتولمامه بر وسيلهدر دييه بر جهتده آغلاركن ممنون اولويورم.
أگر بو بيچاره معصوملر بنمله برابر بو مسئلهده حپسه گيرمسه ايديلر، محكمهڭزده پك شدّتلى قونوشهجقدم.
ش. ٣٩٧
بو مسئله يالڭز شخصمه تعلّق ايتسه ايدى، بن جدًّا نفسِ أمّارهمى تام قيرمق ايچون اوڭا منّتدار اولوردم. مسلگمز، بو زمانده حقّه خدمت، بتون بتون تركِ أنانيتله اولابيلهجگنى قطعى قناعتمز اولديغى گبى؛ يگرمى سنهدر نفسِ أمّارهم ايستر ايستهمز او مسلگه إطاعته مجبور اولمش. رسالۀِ نور و مقدّماتلرى، بوڭا بر حجّتِ قاطعهدر.
فقط غرض و عناد و بر نوع تعصّبِ مسلكيهيى إحساس ايدن و أسرارِ مستورهيى إشاعه صورتنده گلن إعتراض و عيبلره قارشى أسكى سعيد (رض) لسانيله ديرم: ايشته ميدان! أڭ متعصّب علمادن و أڭ بيوك وليدن طوت، تا أڭ دينسز فيلسوفلره و مدقّق حكمالره، رسالۀِ نوردهكى دعوالرى إثبات ايتمگه حاضرم و هم ده إثبات ايتمشم كه، بنم محويمه و إعداممه متماديًا چاليشان زنديق فيلسوفلر و ملحدلر، او دعوالرى جرح ايدهمييورلر و ايدهمهمشلر!
ست. ٦٢
إنسان نسياندن آلينديغى ايچون، نسيانه مبتلادر. نسيانڭ أڭ كوتوسى ده نفسڭ اونوتلماسيدر. فقط خدمت، سعى، تفكّر زمانلرنده نفسڭ اونوتلماسى، يعنى نفسه بر ايش ويريلمهمسى ضلالتدر. خدمتلر گورولدكدن صوڭره نتيجهده، مكافات زمانلرنده نفسڭ اونوتلماسى كمالدر. بو إعتبارله أهلِ ضلال ايله أهلِ كمال، نسيان و تذكّرده متعاكسدرلر.
أوت ضالّ اولان كيمسه، بر ايش و بر عبادت تكليفنده باشنى هوايه قالديرهرق فرعونلاشير. لٰكن مكافاتڭ، منفعتڭ توزيعنده بر ذرّهيى بيله ترك ايتمز. امّا نفسنى اونوتان أهلِ كمال سعى، تفكّر، سلوك زمانلرنده هر شيدن أوّل نفسنى ايلرى سورييور؛ فقط نتيجهلرده، فائدهلرده، منفعتلرده نفسنى اونوتمقله أڭ گرىيه بيراقييور.
مث. ٢٣٨
أگر اونڭ تحقيرى و بيان ايتديگى قصورلر، شخصمه و نفسمه عائد ايسه؛ اللّٰه اوندن راضى اولسون كه، بنم نفسمڭ عيبلرينى سويلر. أگر طوغرى سويلهمش ايسه، بنى نفسمڭ تربيهسنه سَوق ايدر و غروردن بنى قورتارمغه يارديمدر. أگر يالان سويلهمش ايسه، بنى ريادن و ريانڭ أساسى اولان شهرتِ كاذبهدن قورتارمغه يارديمدر.
م. ٦٤
اوچنجى خستهلق: «غرور»در.
أوت غرور ايله إنسان مادّى و معنوى كمالات و محاسندن محروم قالير. أگر غرور سائقهسيله باشقهلرڭ كمالاتنه تنزّل ايتمهيوب، كندى كمالاتنى كافى و يوكسك گورورسه، او إنسان ناقصدر. بويله إنسانلر، معلومات و كشفياتلرينى داها يوكسك گورمكله، أسلافِ عظامڭ إرشادات و كشفياتلرندن محروم قاليرلر. و أوهامه معروض قالارق بتون بتون چيزگيدن چيقارلر.
مث. ٦٦
جنابِ حق طرفندن إنسانلره ويريلن بنلك و حرّيت، الوهيت صفتلرينى فهم ايتمك اوزره بر واحدِ قياسى وظيفهسنى گورويور. مع الأسف سوءِ إختيار ايله حاكميت و إستقلاليته آلَت ايدهرك تام بر فرعون اولور.
مث. ٦٧
ممكناتڭ ده ايكى وجهى واردر:
بريسى: أنانيت ايله وجوددر. بو ايسه، عدمه گيدر و عدمه قلب اولور.
ايكنجيسى: أنانيتڭ تركيله عدمدر. بو ايسه واجب الوجوده باقار بر وجود قزانير. بناءً عليه وجود ايسترسهڭ، منعدم اول كه وجودى بولاسڭ!..
مث. ٧٠
أى شان و شرفى، نام و شهرتى ايستهين آدم! گل، او درسى بندن آل. شهرت عينِ ريادر و قلبى ئولديرن زهرلى بر بالدر. و إنسانى إنسانلره عبد و كوله ياپار.
سعيد النورسى
مث. ٨٣
* * *
عزيز، صدّيق قارداشلرم!
قسطمونيده أهلِ تقوا بر ذات، شكوا طرزنده ديدى: «بن سقوط ايتمشم. أسكى حالمى و ذوقلرى و نورلرى غيب ايتمشم.»
بن ده ديدم: بلكه ترقّى ايتمشسڭ كه، نفسى اوقشايان و اُخروى ميوهسنى دنياده طاتديران و خودبينلك حسّنى ويرن ذوقلرى، كشفلرى گرى بيراقوب، داها يوكسك مقامه، محويت و تركِ أنانيت و فانى ذوقلرى آرامامق ايله اوچمشسڭ.
أوت بر أهمّيتلى إحسانِ إلٰهى؛ إحساننى، أنانيتنى بيراقميانه إحساس ايتمهمكدر.. تا عُجب و غروره گيرمهسين.
قارداشلرم! بو حقيقته بناءً، بو آدم گبى دوشونن ويا حسنِ ظنّڭ ويرديگى پارلاق مقاملرى نظره آلان ذاتلر، سزلره باقوب ايچڭزده محويت و تواضع و خدمتكارلق كسوهسيله گورونن شاكردلرى عادى، عامى آدملر گورور و دير: «بونلر مى حقيقت قهرمانلرى و دنيايه قارشى ميدان اوقويان؟ هيهات! بونلر نرهده، أوليالرى بو زمانده عاجز بيراقان بو قدسى خدمت مجاهدلرى نرهده؟» دييهرك دوست ايسه إنكسارِ خياله اوغرار، معارض ايسه كندى مخالفتنى حقلى بولور.
سعيد النورسى
ش. ٣١٧
بعضًا بر شيئه شدّتلى محبّت، او شيئڭ إنكارينه سبب اولور. و كذا شدّتِ خوف و غايت عظمت و عقلڭ إحاطهسزلغى ده إنكاره سبب اولور.
مث. ١٠٣
أى نفس! أگر تقوا و عملِ صالح ايله خالقڭى راضى ايتدى ايسهڭ، خلقڭ رضاسنى تحصيله لزوم يوقدر؛ او كافيدر. أگر خلق ده اللّٰهڭ حسابنه رضا و محبّت گوستررلرسه، اييدر. شايد اونلرڭكى دنيا حسابنه اولورسه قيمتى يوقدر. چونكه اونلر ده سنڭ گبى عاجز قوللردر.
مع هذا ايكنجى شقّى تعقيب ايتمكده شركِ خفى اولديغى گبى، تحصيلى ده ممكن دگلدر. أوت بر مصلحت ايچون سلطانه مراجعت ايدن آدم، سلطانى إرضا ايتمش ايسه، او ايش گورولور. ايتمهمش ايسه خلقڭ إلتماسيله چوق زحمت اولور. معمافيه ينه سلطانڭ إذنى لازمدر. إذنى ده رضاسنه متوقّفدر.
مث. ١٨٥
رسالۀِ نوره قوّت ويرمك و گنيشلمهسنه چاليشمق و شاكردلرينى تشويق ايتمك و بر بوز پارچهسى اولان أنانيتنى، تام بر حوض قزانمق ايچون، او دائرهدهكى آبِ حيات حوضنه آتوب أريتمك گركدر. يوقسه باشقه بر چيغير آچمقله هم او ضرر ايدر، هم بو مستقيم و متين جادّۀِ قرآنيهيه بيلميهرك ضرر ويرر؛ بلكه زندقهيه بيلميهرك بر نوع يارديم حسابنه گچر.
سعيد النورسى
تر. ٣٢٠
… بيوكلگڭ شأنى تواضع و محويتدر. تكبّر و تحكّم دگلدر. ديمك تكبّر ايدن، صبىِ متشيّخدر. سز ده بيوك طانيمايڭز.
من. ٢٤
أوّلا: هم او ذات، هم سزلر بيليڭز كه: بن، رسالۀِ نورڭ خدمتكارىيم و او دكّانڭ بر دلاّلىيم. رسالۀِ نور ايسه، عرشِ أعظمه باغلى اولان قرآنِ عظيم الشان ايله باغلانمش بر حقيقى تفسيردر. بنم شخصمدهكى قصورات، اوڭا سرايت ايتمز.
تر. ٣١٣
أهلِ حقيقتڭ بر قسمى ناصلكه إسمِ ودوده مظهردرلر و أعظمى بر مرتبهده او إسمڭ جلوهلريله، موجوداتڭ پنجرهلريله واجب الوجوده باقييورلر.. اويله ده: شو هيچ أندر هيچ اولان قارداشڭزه، يالڭز خدمتِ قرآنه إستخدامى هنگامنده و او خزينۀِ بىنهايهنڭ دلاّلى اولديغى بر وقتده، إسمِ رحيم و إسمِ حكيم مظهريتنه مدار بر وضعيت ويريلمش. بتون سوزلر، او مظهريتڭ جلوهلريدر.
م. ١٩
رسالۀِ النورڭ گوزيله باقمق و نه قدر مشكلات زيادهلشسه قدسى وظيفه إعتباريله داها زياده جدّيت و شوقله حركت ايتمكدر. چونكه باشقهلرڭ فتورى و چكيلمهسى، أهلِ همّتڭ شوقنى، غيرتنى زيادهلشديرمگه سببدر. زيرا گيدنلرڭ وظيفهلرينى ده بر درجه ياپمغه كندينى مجبور بيلير و بيلمليدرلر.
ق. ٦٦
أوت، دينڭ و شريعتڭ و قرآنڭ يوزدن زياده طلسملرينى، معمّالرينى حلّ و كشف ايدن و أڭ معنّد دينسزلرى صوصديروب إلزام ايدن و معراج و حشرِ جسمانى گبى عقلدن چوق اوزاق ظن ايديلن قرآن حقيقتلرينى أڭ متمرّد و أڭ معنّد فيلسوفلره و زنديقلره قارشى گونش گبى إثبات ايدن و اونلرڭ بر قسمنى ايمانه گتيرن رسالۀِ نور أجزالرى، ألبته كُرۀِ أرض و كُرۀِ هوائيهيى كندى ايله علاقهدار ايدر و بو عصرى و إستقبالى كندى ايله مشغول ايدهجك بر حقيقتِ قرآنيهدر و أهلِ ايمان ألنده بر ألماس قلنجدر.
ست. ٢١٠