دردنجى نقطه: ايمان، إنسانى إنسان ايدر. بلكه إنسانى سلطان ايدر. اويله ايسه، إنسانڭ وظيفۀِ أصليهسى، ايمان و دعادر. كفر، إنسانى غايت عاجز بر جاناوار حيوان ايدر.
شو مسئلهنڭ بيڭلر دليللرندن يالڭز حيوان و إنسانڭ دنيايه گلمهلرندهكى فرقلرى، او مسئله يه واضح بر دليلدر و بر برهانِ قاطعدر. أوت إنسانيت، ايمان ايله إنسانيت اولديغنى؛ إنسان ايله حيوانڭ دنيايه گليشندهكى فرقلرى گوسترر. چونكه حيوان دنيايه گلديگى وقت عادتا باشقه بر عالمده تكمّل ايتمش گبى إستعدادينه گوره مكمّل اولارق گلير، يعنى گوندريلير. يا ايكى ساعتده، يا ايكى گونده ويا ايكى آيده، بتون شرائطِ حياتيهسنى و كائناتله اولان مناسبتنى و قوانينِ حياتنى اوگرنير، مَلكه صاحبى اولور. إنسانڭ يگرمى سنهده قزانديغى إقتدارِ حياتيه يى و مَلكۀِ عمليه يى، يگرمى گونده سرچه و آرى گبى بر حيوان تحصيل