گناهلرى قزانمق و قزانديرمق و چركين و زهرلى ياپمق و او نعمتى كفران ايله مدارِ عذاب بر صورته چويرمكدن بتون قوّتيله قاچه‌جق. و او فانى، بش اون سنه‌لك جمالى باقيلشديرمك ايچون، مشروع بر طرزده إستعمال ايله، او نعمته شكر ايده‌جك. يوقسه إختيارلقده اوزون زمان إستثقاله معروض قالوب، مأيوسانه آغلايه‌جق. و قبرنده، چوق گناهلرى قزانان و قزانديران او چيپلاق باجاقلرى ييلان صورتنده گوره‌جك و جهنّمده او چركينلشمش گوزل أعضالرينڭ يانمالرينڭ عذابلرينى چكه‌جك.
أگر تربيۀِ إسلاميه دائره‌سنده، آدابِ قرآنيه زينتيله او جمال گوزللشديريلسه؛ او فانى حُسن، معنًا باقى قالاجغى و جنّتده حوريلرڭ جمالندن داها شيرين و داها پارلاق بر طرزده كندينه ويريله‌جگى حديثده قطعيتله ثابتدر. أگر او گوزلڭ ذرّه مقدار عقلى وارسه، بو گوزل و پارلاق و أبدى نتيجه يى ألندن قاچيرميه‌جق...
❊ ❊ ❊