قلبلردن بر قسمنى ئولديرييورلر. بر قاچ سنه نامحرم هوساتنه گوسترمهنڭ تام جزاسى اولارق؛ او بيچاقلى باجاقلر جهنّمڭ اودونلرى اولوب، أڭ أوّل او باجاقلر ياناجقلرينى و دنياده أمنيت و صداقتى غيب ايتديگى ايچون، خلقةً چوق ايستديگى و فطرةً چوق محتاج اولديغى مناسب قوجه يى داها بولاماز. بولسه ده باشنه بلا بولور. حتّى بو حالڭ نتيجهسى اولارق او آخر زمانده، بعض يرلرده نكاحه رغبتسزلك و رعايتسزلك يوزندن، قرق قادينه بر أركك نظارت ايدهجك درجهده أهمّيتسز، صاحبسز، قيمتسز بر صورته گيرهجگى، حديثڭ روايتندن آڭلاشيلييور.
مادام حقيقت بودر. و مادام هر گوزل، گوزللگنى سَور و ألندن گلديگى قدر محافظه ايتمك ايستر و بوزولماسنى ايستهمز. و مادام گوزللك بر نعمتدر. نعمته شكر ايديلسه معنًا زيادهلشير. شكر ايديلمزسه دگيشير، چركينلشير. ألبته عقلى وارسه، حسن و جمالنى