لوحۀِ حكمت اولارق تعليق ايتمشم. هر صباح و آقشام اوڭا باقارم، درسمى آليرم:
دوست ايسترسه‌ڭ اللّٰه يتر. أوت او دوست ايسه، هر شى دوستدر.
ياران ايسترسه‌ڭ قرآن يتر. أوت اونده‌كى أنبياء و ملائكه ايله خيالًا گوروشور و وقوعاتلرينى سير ايدوب اُنسيت ايدر.
مال ايسترسه‌ڭ قناعت يتر. أوت قناعت ايدن، إقتصاد ايدر؛ إقتصاد ايدن، بركت بولور.
دشمن ايسترسه‌ڭ نفس يتر. أوت كندينى بگه‌نن، بلايى بولور زحمته دوشر؛ كندينى بگنمه ين، صفايى بولور، رحمته گيدر.
نصيحت ايسترسه‌ڭ ئولوم يتر. أوت ئولومى دوشونن، حبِّ دنيادن قورتولور و آخرتنه جدّى چاليشير.
❊ ❊ ❊