دينسه سزادر كه سڭا مرآتِ حقائق
وجهڭده جلى نيجه بيڭ حكمتلى دقائق
رشد منبعى نطقڭدهكى معناىِ رقائق
نورِ أزلڭ مشكاتيسڭ أى رسالۀِ نور
برجِ أبدڭ مرصاديسڭ أى رسالۀِ نور
أى دُرّۀِ كنزِ كمال، رويڭده صفا وار
أى شعلۀِ شمسِ جمال، صدرڭده شفا وار
ألبته كه فاسقه برقڭده جفا وار
نورِ أزلڭ مشكاتيسڭ أى رسالۀِ نور
برجِ أبدڭ مرصاديسڭ أى رسالۀِ نور
شهبال آچارق سبع سماواتى گزرسڭ
بو كُونْ مكاندن نيجه أسرارى سوزرسڭ
شاكردلريڭى دونهرك عرفانله بزهرسڭ
نورِ أزلڭ مشكاتيسڭ أى رسالۀِ نور
برجِ أبدڭ مرصاديسڭ أى رسالۀِ نور
سحر إبطالنه لمعِ عصا سنده گوروندى
هم نَفَسِ فيضِ مسيحا سنده گوروندى
بر جلوۀِ خلقِ عظيما سنده گوروندى
نورِ أزلڭ مشكاتيسڭ أى رسالۀِ نور
برجِ أبدڭ مرصاديسڭ أى رسالۀِ نور