الحجّة الزّهرانڭ قيصهجه فهرستهسى
ايمان حقيقتلرندن بر جهتده محروم قالان حپسلرڭ ايمانلرينى قورتارمق ايچون استاد حضرتلرى أسكيشهرده اوتوزنجى لمعه و ايكنجى شعاع گبى بش آلتى مهمّ رسالهلرى، دڭزليده ميوه رسالهسنى، آفيون مدرسۀِ يوسفيهسنده ده الحجّة الزّهرايى تأليف ايتمشلردر. بو رساله ظاهرًا كوچك، حقيقةً پك بيوك و چوق قوّتلى و پك گنيش اولمقله برابر ايكى مقامدر.
برنجى مقامى اوچ قسمدر.
برنجى قسمى:
دهشتلى بر شكلده اللّٰهى و آخرتى إنكار ايدن و اونوتان جريانلرڭ ناشرِ أفكارى اولان غزتهلرى اوقويان بيچاره گنجلرڭ و إختيارلرڭ و مدرسۀِ يوسفيهده بولونان حپسلرڭ ايمانِ بِاللّٰهدن موجوديت و وحدانيتِ إلٰهيهيه دائر غايت قطعى و قوّتلى درسلره پك زياده إحتياجلرى اولديغندن، هر صباح نمازندن صوڭره اوقونان و بر روايتده إسمِ أعظم مرتبهسنى طاشييان تهليل و توحيدِ أعظم اولان:
﴿لَا اِلٰهَ اِلَّا اللّٰهُ وَحْدَهُ لَا شَرٖيكَ لَهُ لَهُ الْمُلْكُ وَلَهُ الْحَمْدُ يُحْيٖى وَيُمٖيتُ وَهُوَ حَىٌّ لَا يَمُوتُ بِيَدِهِ الْخَيْرُ وَهُوَ عَلٰى كُلِّ شَىْءٍ قَدٖيرٌ وَاِلَيْهِ الْمَصٖيرُ﴾
شو قدسى توحيدڭ اون بر كلمهسى اولوب، هر بر كلمهسنده بر برهانِ وجوبِ وجود و وحدتِ ربّانيه، هم اون بر مژده غايت پارلاق گونش گبى تفصيلاتيله گوستريلمكدهدر.