صوقديرمشلر. أللرندهكى رسالهلرى مخزنلره آتديرمشلر. (حاشيه) حتّى حپسخانه ايچريسنده بيله راحت بيراقمامشلر، خصوصى پلانلرله ايچلرينه خفيهلر بيراقيلهرق استاددن و رسالۀِ نوردن صوغوتمغه چاليشمشلر. بِالخاصّه آفيون حپسنده استاديمزى قيشڭ أڭ شدّتلى گونلرنده غيرِ منتظم بر اوطهده، طبان تختهلرينڭ بربرندن بر ايكى سانتيم آيريلقلى اولان و پنجرهلرى ده تام قاووشمديغى ايچون آچيق قالان يرلرنده جاملرڭ بر بچق - ايكى ميلم بوز طوتماسيله برابر بعضًا ده ياغان قارلر، تيپى و ياغمورلر ايچرىيه دولان بر اوطهده بر قاچ گون صوباسز، مانغالسز و بعض زمانلرده ده غداسز بيراقيلديغى گبى، زهر ده ويريلهرك ئولومى بكلهنلمشدر. غايت إختيار، ضعيف و خسته اولان مبارك استادڭ ياننه هيچ بر طلبهسى و خدمتجيلرى بيراقيلمامش، صاقلى و گيزلى اولارق ياننه چيقان طلبهلرى و خدمتجيلرى دوگولمش، إشكنجهلرڭ أڭ وحشيسى تطبيق ايديلمش، اويله بر آن گلمش كه مبارك استادڭ محكمهيه ويرهجگى مدافعهلرى طلبهلرى طرفندن يازيلماسنه إذن ويريلمهمش، گيزلى اولارق يازمق ايستهين طلبهلر ده مدير طرفندن حقارته اوغرامشلردر.
بو إشكنجهلرڭ و بو ظلم و حيله پرنسيبلرينڭ قارشيسنده قرآنڭ حقيقى خادملرى اولان نورڭ قيمتدار طلبهلرى هيچ چكينميهرك استادلرينڭ تعقيب ايتديگى ايمان و قرآن يولنده رضاءِ إلٰهى اوغرنده چاليشمشلر. ايشته بو آغير شرائط آلتنده دڭزلى مدرسۀِ يوسفيهسنده ميوه رسالهسى، آفيون مدرسۀِ يوسفيهسنده ده الحجّة الزّهرا گبى مهمّ رسالهلر يازيلمشدر. أهلِ ايمانه بِالخاصّه بو رسالهلرى اوقومالرى توصيه اولونور.
___
(حاشيه): حپسخانهدن چيقدقدن صوڭره بر قاچ دفعه برائت ويريلديگى حالده، رسالهلر حالا مخزنلرده طوتولمقدهدر.