و حقّه توكّل ايله برابر؛ إستقبالده گلهجك نفرت و تحقيردن صاقينمق ايچون و إستقبال عصرلرى، بو عصرڭ سيماسنه و غيرتسز آدملرڭ يوزلرينه «توه!» ديدكلرى زمان، توكروكلرى يوزيمزه گلمهمك ايچون ويا سيلمك ايچون يازيلمش بر لايحهدر. و آوروپانڭ إنسانيتپرور ماسكهسى آلتنده صاغير قولاقلرينى چينلاتمق و بو وجدانسز غدّارلرى بزه مسلّط ايدن او إنصافسز ظالملرڭ گورمهين گوزلرينه صوقمق و بو عصرده، يوز بيڭ جهتدن «ياشاسين جهنّم!» ديديرتن ميمسز مدنيتپرستلرڭ باشلرينه وورمق ايچون يازيلمش بر عرضحال و أهلِ إلحاد و بدعتجيلرى إلزام و إسكات ايدهجك «آلتى سؤال»در.
يگرمى طوقوزنجى مكتوبڭ يدنجى قسمى إشاراتِ سبعه
﴿فَاٰمِنُوا بِاللّٰهِ وَرَسُولِهِ النَّبِىِّ الْاُمِّىِّ الَّذٖى يُؤْمِنُ بِاللّٰهِ وَكَلِمَاتِهٖ وَاتَّبِعُوهُ لَعَلَّكُمْ تَهْتَدُونَ ۞ يُرٖيدُونَ اَنْ يُطْفِئُوا نُورَ اللّٰهِ بِاَفْوَاهِهِمْ وَيَاْبَى اللّٰهُ اِلَّٓا اَنْ يُتِمَّ نُورَهُ وَلَوْ كَرِهَ الْكَافِرُونَ﴾
آيتلرينڭ بر سرّينى و مهمّ بر حقيقتنى «يدى إشارت» ايله و يدى مهمّ سؤاله يدى قطعى و قوّتلى جوابله تفسير ايدييور.
برنجى سؤال: «أجنبيلردن إهتدا ايدنلر، كندى ديللريله شعائرِ إسلاميهيى ترجمه ايدييورلر. عالمِ إسلامڭ اونلره قارشى سكوتى و إعتراض ايتمهمسى، جوازِ شرعى اولديغنى گوسترمز مى؟» ديين أهلِ بدعتڭ سؤالنه قارشى، غايت قطعى و قوّتلى بر جوابدر.
ايكنجيسى: «فرنكلردهكى إنقلابجيلر و فيلسوفلر، قاتولك مذهبنده إنقلاب ياپمقله ترقّى ايتدكلرندن، عجبا إسلاميتده بويله بر إنقلابِ دينى اولاماز مى؟» ديين أهلِ بدعتڭ سؤالنه قارشى؛ غايت قطعى، ظاهر و باهر و مسكت بر جوابدر.