چوق سَوْگيلى، مشفق استادم أفنديم حضرتلرى!
أوّلا: هم مبارك ليالئِ عشرهڭزى، هم قدسى بايرامڭزى روح جانمله تبريك ايدر، عرضِ حرمتلرمله نور نشر ايدن أللريڭزدن اوپر، قصوراتمڭ عفوينى إسترحام ايدرم.
ثانيًا: بو گناهكار، عادى، عاجز، قصورلى، لياقتسز، مسكين، تنبل طلبهڭزى رسالۀِ نورڭ حقائقِ قدسيۀِ ايمانيه و قرآنيهسنه و سَوْگيلى استادڭ تربيۀِ معنويه و مادّيهسنه مظهر بيوران جنابِ أرحم الرّاحمينه حدسز شكر ايدييورم.
﴿اَلْحَمْدُ لِلّٰهِ هٰذَا مِنْ فَضْلِ رَبّٖى﴾
سَوْگيلى استادم! تربيۀِ معنويهڭزڭ آثارينى هر وقت بزه إحساس ايدن ربِّ رحيممه نه قدر شكر ايتسهم ينه آزدر. تحديثِ نعمت اولمق اوزره شونى ده عرض ايتمك ايسترم كه: خستهلغمدن مشتكى دگلم. چونكه لِلّٰهِ الحمد نورِ عينم و سرورِ روحم و غداءِ قلبم اولان رسالۀِ نورڭ حقيقتلرينى بِالفعل و بِالتجربه درس آلمامه سبب اولدى.
هم حقيقةً عمرى قرقنجى سنۀِ دوريهسنده مدهش بر طرزدهكى مادّى و معنوى خستهلقلريمه هر بر رجاسنده روحه و قلبه بيڭلر نورِ توحيدى و ضياىِ تسلّىيى سرپن إختيارلر رسالهسى،
هم هر بر دواسنده بىنهايه شفاىِ معنوى بولونان خستهلر رسالهسى،
هم اون بر كلمۀِ قدسيۀِ توحيديهنڭ پك خارقه و أمثالسز بر طرزده طلسملرينى كشف ايدن و هر بر جملهسندن نورِ توحيد فيشقيران يگرمنجى مكتوب،