تشكّل ميدر؟» دييه صوردم. «أوت» ديدكلرى ايچون، «سزڭ يالڭز ايمانى و قرآنى مسائلدهكى مشكللريڭزى و ايضاحنى آرزو ايتديگڭز نقطهلرى رسالۀِ نورڭ يارديمى ايله حلّه چاليشيرم. بنم مسلگم، إختيار و شعورم تعلّق ايتمهدن رسالۀِ نور دائرهسنده إستخدامدن عبارتدر. ايمان و قرآن مسئلهلريڭزه همفكريڭزم. فقط سياستله إشتغال ايدهمم.» مئالنده جواب ويردم. يالڭز بو زمرهدن نورلرله علاقهدار اولانلر وار. اونلرڭ أل أله ويرهرك هم أثرلرى اوقومالرينى و آڭلايهمدقلرى يرلرى صورمالرينى، قرآنى خطّى اوگرنمگه غيرت ايتمهلرينى رجا ايتدم. مَلاطيه، اورفه، عينتابدهكيلرى أثرلرى ايدينمگه و علاقهلرينى آرتديرمغه عاجزانه يازيلرمله تشويق ايتمكدهيم. شيمديلك مساعئِ نوريهم بويلهدر.
جنابِ حقّه نهايتسز حمد و شكر اولسون كه، حسابسز قصورلرمله برابر بو قرآنى و ايمانى خدمتده إستخدامه لايق گورمشدر. ألبته مبارك و مشفق استاديمڭ دعالرى بركتيله زمرۀِ نوريهنڭ عاجز بر فردى اولمقده دوام و اويلهجه لواء أحمدى عليه الصلاة والسلام تحتنده طوپلانانلردن اولورم.
تكرار تكرار مبارك أللريڭزى كمالِ تعظيمله تقبيل أيلر، علاقهدار قارداشلريمڭ ده سلام، دعا و إحتراملرينى عرض ايدرم. محيطڭزدهكى مادّةً و معنًا ياقين بتون آرقداشلره عرضِ إحترام أيلرم. أرحم الراحمين اولان ربّمزدن دائمى نيازم؛ عزيز، محترم و مشفق استادمدن أبديًا راضى اولسون و بتون مقصدينى حاصل أيلهسين. آمين.
اَلْبَاقِى اَلْحُبُّ فِى اللّٰه
محبِّ مخلصڭز
خلوصى
* * *