بو نقطه ايچون بن كندى قوّتمه، مزيتمه هيچ إعتماد ايتميهرك، يالڭز حقيقتِ قرآنيه و اونڭ تفسيرى اولان حقائقِ ايمانيهدهكى قوّته إستنادًا دنيايه إعلان ايدييورم كه: بتون دينسزلر طوپلانسهلر، بن اونلره قارشى چكينميهرك ميدان اوقويورم. و باشمى أگمييورم و عزّتِ علميهيى قيرمييورم. أگر بو بر بنلك ايسه، او هيچ بر جهتله بڭا عائد دگل و بنلك اولاماز. صلابتِ ايمانيه اولور. ذاتًا بن ناصل طبيعتى، ايجاد إعتباريله إنكار ايدييورم و رسالۀِ نور بونى قطعى إثبات ايتمش. اويله ده؛ بشرى غروره، أنانيته، فرعونلغه سَوق ايدن إقتدارى ده طبيعت گبى إنكار ايدييورم. يالڭز بشرڭ دعاسى، بر فعلى دعا نوعنده صميمى بر إحتياج ايله جزئى كسبى، بر مقبول دعا حكمنه گچر. اونى ده جنابِ حق قبول ايدر، كشفيات نامندهكى بشره لازم اولان خارقهلرى إحسان ايدر دييه قطعى دليللرله علمِ اصول الدينڭ علماسى، قدر و جزءِ إختيارى بحثنده إثبات ايتدكلرى گبى.. بن ده عين اليقين درجهسنده قطعى قناعتله فيضِ قرآنى ايله رسالۀِ نورڭ حجّتلريله أوّلا كندى نفسمده، صوڭره هركسدهكى بنلك و إقتدارڭ، ايجاد و إحسان و توفيقِ إلٰهينڭ يالڭز بر پردهسى اولدقلرينى قطعى بيلديگم ايچون نورلره و قارداشلريمه إعلان ايتمشم كه: بن بر چكردكدم، چورودم. عجز و إحتياج و صميمى ايستهمك و فعلى دعا ايتمك نتيجهسنده جنابِ أرحم الراحمين، رسالۀِ نورى او چكردكدن خلق ايدوب إحسان ايتمش. نورڭ مكتوباتندهكى بتون مدارِ مدح فقرهلر، او نورانى آغاجه عائددر. بنم حصّهم قطعيًا هيچ بر جهتده فخر اولاماز. بلكه يالڭز و يالڭز شكردر. اويله ايسه كائنات عددنجه اَلشُّكْرُ لِلّٰهِ الحمد لِلّٰهِ
اَلْبَاقِى هُوَ الْبَاقِى
سعيد النورسى
* * *