او مجهول ذات، عزّتِ علميهيى فرعونجقلره قارشى محافظهمى بر أنانيت توهّم ايتمش. نور طلبهلرينڭ حقّمده حسنِ ظنلرينى بتون بتون قيرمديغمى بر بنلك تخيّل ايتمش. و ايمان حقيقتلرينه دائر بياناتمه طلبهلرڭ تام إعتماد و قناعتلرينى تأمين ايتمك فكريله، أهلِ ولايتڭ و بعض آياتڭ قطعى قناعت ايتديگم بيڭه ياقين أمارات و إشارتلرينڭ إظهارينه مجبور اولديغم ايچون بر قسمنى خاص قارداشلريمه بيان ايتمهمى بر نوع خودفروشلق ظن ايتمش.
أوت بو زمانده دينسزلك حسابنه، بنلكلرى فرعونلاشمش درجهده و ايمانه و رسالۀِ نوره هجوملرى زماننده اونلره قارشى تدافع وضعيتمزده تواضع و محويت گوسترمك، بيوك بر جنايت و خيانتدر. و او تواضع، تذلّل حكمنده بر أخلاقِ رذيله اولور. اونلره قارشى عزّتِ دينيهيى و شرافتِ علميهيى محافظه ايتمك ايچون قهرمانجهسنه بر ثبات بر قوّۀِ معنويهيى گوسترمك، عجبا هيچ بر وجهله خودفروشلق اولور مى؟ هيچ بر شهرتپرستلك و أنانيت اولور مى كه، او ذات اويله توهّم ايتمش.
هم رسالۀِ نوره محتاج و ايماننى قوّتلنديرمك و قورتارمق ايچون نورلرى آرايانلره قارشى كه؛ اونده اوچى ويا دردى شخصمه باقمهيوب نوردهكى قطعى حجّتلرله إكتفا ايتديگى گبى، بش آلتى دانه حجّتلرڭ قيمتنى بيلمديگى ايچون بنم شخصمه باقار. عجبا بزى قانديردى مى، يوقسه حقيقت مى سويلهيور؟ دييه شخصمه قارشى حسنِ ظنلرينى قيرمهمغه مجبور اولديغمدن، شخصمڭ گيزلى فنالقلرينه پرده چكمك بر أنانيت اولور مى؟
﴿وَمَٓا اُبَرِّئُ نَفْسٖٓى اِنَّ النَّفْسَ لَاَمَّارَةٌ بِالسُّٓوءِ اِلَّا مَا رَحِمَ رَبّٖى﴾
آيتِ كريمهسنڭ سرّيله نفسِ أمّارهمه إعتماد ايدهمم. نفس قصورسز اولماز. فقط شيمدى بو زمانده أژدرهالر، عفريتلر حكمنده دينسزلك قوميتهلرينڭ هجوملرى و تخريباتلرى زماننده مدافعهمده، بنده گورونن او سينك قنادى قدر قصورلرى گورمك، او هجوم ايدنلره بر يارديم حكمنه گچمكدر. و اون عدد محتاجلردن بش آلتى بيچارهيى نورڭ علاجلرندن محروم ايتمكدر.