﴿بِاسْمِهٖ سُبْحَانَهُ ۞ وَاِنْ مِنْ شَىْءٍ اِلَّا يُسَبِّحُ بِحَمْدِهٖ ۞ وَبِهٖ نَسْتَعٖينُ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
عزيز، صدّيق قارداشلرم!
أوّلا: بوگونلرده سورۀِ عنكبوتده، (مَثَلُ الَّذٖينَ اتَّخَذُوا مِنْ دُونِ اللّٰهِ اَوْلِيَٓاءَ كَمَثَلِ الْعَنْكَبُوتِ اتَّخَذَتْ بَيْتًا وَاِنَّ اَوْهَنَ الْبُيُوتِ لَبَيْتُ الْعَنْكَبُوتِ لَوْ كَانُوا يَعْلَمُونَ) آيتنى اوقوركن بردن شدّتلى بر وهم گلدى كه: «أڭ ضعيف خانه ئورومجگڭ خانهسيدر. اللّٰهه شريك ياپانلر فرضا بيلسهلر. يعنى، ايمانه گلمهين قُريش رؤسالرى أگر بيلسهلر...» معناسنده اولان بو آيتڭ بلاغتنه مناسب بر وضعيت گورولمدى.
بردن عين زمانده ذوالفقار معجزاتِ أحمديهيى تصحيح ايچون آچدم. بردن شو سطرلر نظريمه ايليشدى: برنجى حادثه: معنوى تواتر درجهسنده بر شهرت ايله، رسولِ أكرم عليه الصلاة والسلام، أبو بكر الصدّيق ايله كفّارڭ تضييقندن قورتولمق ايچون تحصّن ايتدكلرى غارِ حرانڭ قپوسنده، ايكى نوبتجى گبى ايكى گوگرجينڭ گلوب بكلهمهلرى و ئورومجك دخى پردهدار گبى، خارقه بر طرزده، قالين بر آغ ايله مغاره قپوسنى اورتمهسيدر.
حتّى رؤساىِ قُريشدن، رسولِ أكرم عليه الصلاة والسلامڭ أليله غزوۀِ بدرده ئولديريلن اُبَىّ ابن خَلَف مغارهيه باقمش. آرقداشلرى ديمشلر: مغارهيه گيرهلم. او ديمش: «ناصل گيرهلم؟ بوراده بر آغ گورويورم كه، محمّد (عصم) تولّد ايتمهدن بو آغ ياپيلمش گبيدر.»